រាជធានីភ្នំពេញ ៖ ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ បានប្រកាស មុននេះថា នៅវេលាម៉ោង១៥:៣០នាទីរសៀល ថ្ងៃទី១៣ ខែកក្កដា…
រាជធានីភ្នំពេញ ៖ ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ បានប្រកាស មុននេះថា នៅវេលាម៉ោង១៥:៣០នាទីរសៀល ថ្ងៃទី១៣ ខែកក្កដា ឆ្នាំ២០២៥ មានករណីអគ្គិភ័យឆេះនៅចំណុចភូមិគោកខ្សាច់ សង្កាត់ភ្លើងឆេះរទេះ ខណ្ឌកំបូល។
ហេតុការណ៍អគ្គិភ័យឆាបឆេះនេះបណ្តាលមកពីដុតផ្ទះ បង្កជាអគ្គិភ័យ (ម្ចាស់ផ្ទះមានសតិមិនគ្រប់ដុតផ្ទះខ្លួនឯង)។ អគ្គិភ័យនេះធ្វើឱ្យឆេះខូចខាតផ្ទះឈើលើថ្មក្រោមចំនួន០១ខ្នង ហើយពុំបណ្តាលឲ្យឆេះរាលដាលដល់អ្នកក្បែរខាងឡើយ ។
នៅវេលាម៉ោង១៦:០០នាទីល្ងាច ខែឆ្នាំដដែល អគ្គិភ័យនេះត្រូវបានពន្លត់បានទាំងស្រុង ដោយប្រើប្រាស់រថយន្តការិយាល័យអគ្គិភ័យរាជធានីភ្នំពេញ ចំនួន០១គ្រឿង ប្រើប្រាស់ទឹកអស់ចំនួន០១ឡានស្មើនឹង ០៤ម៉ែត្រគូប ។
បើតាមប្រជាពលរដ្ឋបានប្រាប់ឲ្យដឹងថា បុរសនេះរស់នៅក្នុងផ្ទះខាងលើនោះតែម្នាក់ឯងប៉ុណ្ណោះ ដោយឪពុកម្ដាយ ក្រុមគ្រួសារបាននាំគ្នាទៅរស់នៅភ្នំពេញ ហើយកាលពីពេលកន្លងទៅ បុរសនេះបានធ្វើសកម្មភាពដុតផ្ទះខាងលើម្ដងរួចមកហើយ ប៉ុន្តែបានពួកគាត់ឃើញ និងនាំគ្នាជួយពន្លត់ទាន់ពេល ។ ពេលនោះ បុរសខាងលើបានរត់រួចគេចខ្លួនបាត់ ប៉ុន្តែអត់ដឹងថាទៅណាទេ លុះច្រើនខែក្រោយមក ទើបត្រលប់ចូលផ្ទះវិញ ហើយទើបតែបានរយៈពេលប៉ុន្មានថ្ងៃប៉ុណ្ណោះ ក៏បានដុតផ្ទះម្ដងទៀត បណ្ដាលឲ្យឆេះហ្មត់បែបនេះតែម្ដង ។
ប្រភពដដែលបានប្រាប់ឲ្យដឹងបន្តទៀតថា នៅថ្ងៃកើតហេតុពួកគាត់មិនបានឃើញបុរសនោះដុតផ្ទះភ្លាមៗនោះទេ ដោយភ្លើងបានឆេះខ្លាំងយ៉ាងសន្ធោសន្ធៅទៅហើយ ទើបបានដឹង ពួកគាត់បានាំគ្នាយកទុយោទឹកជួយបាញ់ពន្លត់ ។ មិនតែប៉ុណ្ណោះមេឃក៏កំពុងភ្លៀងផងដែរ ប៉ុន្តែពន្លត់មិនឈ្នះឡើយ ខណៈនោះពួកគាត់ម្នាក់ៗបានត្រឹមតែឆោរឡោប៉ុណ្ណោះ ហើយពេលភ្លើងកំពុងឆេះ និងកំពុងមានការភ្ញាក់ផ្អើលនោះ ស្រាប់តែបុរសវិកលចរិកនោះ ក៏បានរត់គេចខ្លួនបាត់ស្រមោល ។
ប្រជាពលរដ្ឋបានបញ្ជាក់ប្រាប់ថា បន្ទាប់មកពួកគាត់ក៏បានរាយការណ៍ទៅកាន់សមត្ថកិច្ចឲ្យជួយអន្តរាគមន៍ ហើយក្រោយមកក៏មានរថយន្តពន្លត់អគ្គិភ័យ១គ្រឿងទៅដល់បាញ់ទឹកពន្លត់អស់១រថយន្តក៏រលត់ទៅវិញ ។ ប៉ុន្តែមិនអាចជួយសង្គ្រោះផ្ទះនោះបានឡើយ ទីបំផុតបានក្លាយជា ចំណីអគ្គិទាំងស្រុង តែមិនបានឆេះរាលដាលដល់ផ្ទះអ្នកផ្សេងទៀតនោះឡើយ ហើយក៏មាននរណាម្នាក់រងរបួសដែរ ៕
ចែករំលែកព័តមាននេះ