រាជធានីភ្នំពេញ ៖ ក្នុងខែសីហាកន្លងទៅនេះ សកម្មភាពកីឡានៅក្នុងប្រទេសកម្ពុជា ហាក់មានការមមាញឹកច្រើនទាំងការប្រកួតនៅក្នុងប្រទេស និងក្រៅប្រទេស ដោយក្នុងនោះបានទៅប្រកួតប្រជែងនៅបណ្តាប្រទេសមួយចំនួនដូចជា ថៃ ឡាវ ព្រុយណេ ចិន ជាដើម ថែមទាំងបានដណ្តើមមេដាយជូនជាតិទៀតផង។ ពេលនេះកោះសន្តិភាពសូមលើកយកសកម្មភាពកីឡាដែលអត្តពលិកកម្ពុជាចូលរួមប្រកួតទាំងក្នុង និងក្រៅប្រទេសដូចខាងក្រោម ៖
ថ្ងៃទី៣ សីហា ក្រុមកីឡាសីប៉ាក់តាក្រកម្ពុជា បានចេញទៅចូលរួមប្រកួតកីឡាសីប៉ាក់តាក្រដណ្តើមពានរង្វាន់ព្រះមហាក្សត្រថៃលើកទី២៩ (29th King’s Cup Sepak Takraw Championship) ក្របខ័ណ្ឌ Division-2 នៅប្រទេសថៃ ដោយមាន២៧ប្រទេសចូលរួម ហើយជាលទ្ធផលកម្ពុជាដណ្តើមបានមេដាយមាសលើវិញ្ញាសា៣នាក់ទល់៣នាក់ផ្នែកបុរស ។ ថ្ងៃទី៩ សីហា ក្រុមកីឡាករបាល់ទាត់ជម្រើសជាតិអាយុក្រោម២១ឆ្នាំ (U21) កម្ពុជាទៅចូលរួមព្រឹត្តិការណ៍ប្រកួតបាល់ទាត់ដណ្តើមពានរង្វាន់ព្រះមហាក្សត្រព្រុយណេ (Hassanal Bolkiah Trophy 2014) (HBT) ហើយធ្លាក់ក្នុងវគ្គជម្រុះ ។
បុ៉ន្តែក៏បានយកឈ្នះចំនួន៣ប្រកួតផងដែរ គឺឈ្នះក្រុមម្ចាស់ផ្ទះព្រុយណេ ១ទល់០, ឈ្នះក្រុមសិង្ហបុរី ៣ទល់១, ឈ្នះក្រុមឥណ្ឌូណេស៊ី ២ទល់១ ចាញ់ក្រុមម៉ាឡេស៊ី ០ទល់១ និងបន្តចាញ់ក្រុមវៀតណាម ០ទល់៣ ។ ថ្ងៃទី១៦ សីហា ក្រុមអត្តពលិកកម្ពុជាបានទៅចូលរួមព្រឹត្តិការណ៍កីឡាអូឡាំពិកយុវជន (YOG) ក្នុងទីក្រុងណានជីងនៃសាធារណរដ្ឋប្រជាមានិតចិន លើ៣ប្រភេទកីឡាមាន ហែលទឹក អត្តពលកម្ម និងចំបាប់ បុ៉ន្តែមិនទទួលបានលទ្ធផលចំណាត់ថ្នាក់អ្វីឡើយ ។ ទោះបីយ៉ាងណា លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានលើកឡើងថា ទោះចាញ់ឬឈ្នះ ជាបទពិសោធន៍ដែលវានឹងក្លាយជាទុនទៅថ្ងៃមុខអាចឱ្យយើងបានដឹងពីសមត្ថភាពគូប្រកួត និងចេះត្រៀមលក្ខណៈទុកមុន ។
ថ្ងៃទី១៥ សីហា កម្ពុជាបានទទួលធ្វើជាម្ចាស់ផ្ទះបិទបញ្ចប់ព្រឹត្តិការណ៍ប្រណាំងរថយន្ត និងម៉ូតូឆ្លងកាត់ឧបសគ្គជ្រើសរើសជើងឯកអាស៊ីលើកទី៤ (Asia Cross Country Rally 2014) ដែលមាន៧ប្រទេសចូលរួម ជាលទ្ធផលកីឡាករប្រណាំងម៉ូតូកម្ពុជាមួយរូបបានជាប់ចំណាត់ថ្នាក់លេខ២។ ថ្ងៃទី១៧ សីហា កម្ពុជាបានរៀបចំព្រឹត្តិការណ៍ប្រកួតកីឡារត់ប្រណាំងម៉ារ៉ាតុងលើកដំបូងនៅខេត្តសៀមរាប ដែលមានឈ្មោះថា «រត់ប្រណាំងម៉ារ៉ាតុង អន្តរជាតិ ចក្រភពអង្គរលើកទី១» ។ ព្រឹត្តិការណ៍នេះមានអ្នកចូលរួម២.៦៣០នាក់ មកពី៤២ប្រទេសដែលភាគច្រើនមកពីប្រទេសចិន លំដាប់ទី១, ជបុ៉នទី២, ម៉ាឡេស៊ីទី៣ និងអត្តពលិកកម្ពុជាមានចំនួន១.៣៧០នាក់ ។
ថ្ងៃទី២៤ សីហា កម្ពុជាធ្វើជាម្ចាស់ផ្ទះបើកការប្រកួតបាល់ទាត់លក្ខណៈមិត្តភាពអន្តរជាតិដណ្តើមពានរង្វាន់ Yamaha Challenge International Friendly លើកទី១ នៅខេត្តតាកែវ ដែលមាន៣ប្រទេសចូលរួម គឺសិង្ហបុរី ជបុ៉ន និងកម្ពុជាម្ចាស់ផ្ទះ ហើយពានរង្វាន់ត្រូវបានធ្លាក់ទៅលើក្រុម U15 ភ្នំពេញក្រោន ។
ក្រៅពីព្រឹត្តិការណ៍ជាលក្ខណៈមិត្តភាពអន្តរជាតិនេះ នៅមានការប្រកួតថ្នាក់ជាតិជាច្រើនទៀតដូចជា កីឡាមហាជនជ្រើសរើសជើងឯកថ្នាក់ជាតិក្របខ័ណ្ឌក១, ក២ ប្រចាំឆ្នាំ២០១៤ ដោយមានប្រភេទកីឡាបាល់ទាត់ បាល់ទះ បាល់បោះ និងអត្តពលកម្ម នៅខេត្តកំពត ដែលបានចាប់ផ្តើមនៅថ្ងៃទី១២ រហូតដល់ថ្ងៃទី២៤ ខែសីហា ។
បន្ទាប់មកនៅថ្ងៃទី៣០ សីហា ឆ្នាំ២០១៤នេះ មានរៀបចំការប្រកួតកីឡាសូរីនហ្សុិ កាំប៉ូ ជ្រើសរើសជើងឯកថ្នាក់ជាតិលើកទី២ ប្រចាំឆ្នាំ២០១៤ ដោយជ័យលាភីដណ្តើមមេដាយមាសភាគច្រើនបានទៅលើក្លិបយុវជន និងជម្រើសជាតិ ៕
ចែករំលែកព័តមាននេះ