រាជធានីភ្នំពេញ ៖ ការប្រកួតកីឡាប្រដាល់ជាលក្ខណៈមិត្តភាពអន្តរជាតិនៅលើសង្វៀនទូរទស្សន៍អប្សរា ក្រោមការជួយឧបត្ថម្ភពីសណ្ឋាគារណាហ្គាវើល ដែលតែងតែរៀបចំធ្វើឡើងរៀងរាល់មួយខែម្តងនោះ នៅថ្ងៃសៅរ៍ ទី៣០ សីហា ស្អែកបានវិលមកកំដរអារម្មណ៍ប្រិយមិត្តសាជាថ្មីទៀតហើយ ។
សម្រាប់បេក្ខភាពដែលត្រូវឡើងប្រកួតនៅថ្ងៃស្អែកមានកីឡាករជើងខ្លាំង សែន រ៉ាឌី មកពីក្លិបអប្សរាគុនខ្មែរ ប្រកួតជាមួយកីឡាករថៃ Sang Phat Sarsakontharng ក្នុងប្រភេទទម្ងន់៥៧គីឡូក្រាម ។
អ្នករៀបចំកម្មវិធីប្រកួតបានឱ្យដឹងថា កីឡាករថៃរូបនេះមានប្រវត្តិប្រកួតបានចំនួន៥៣ដង ឈ្នះ៤០ដង និងចាញ់១០ដង ។ រីឯ សែន រ៉ាឌី វិញនោះ គឺជាកីឡាករជើងខ្លាំងមួយរូបដែលមានប្រវត្តិប្រកួតមិនធម្មតាឡើយ ។ ប៉ុន្តែប៉ុន្មានប្រកួតចុងក្រោយមកនេះ សែន រ៉ាឌី ហាក់មានការស្រុតចុះសន្ទុះវាយលុកជាងមុនបន្តិច ដោយសារការហ្វឹកហាត់មិនសូវដិតដល់ដោយជាប់រវល់សិក្សា ។ ចាំមើល សែន រ៉ាឌី មានស្នៀតអីយកមកបំបាក់កីឡាករថៃ ដែលត្រូវការឈ្នះក្នុងឱកាសបានមកជាន់សង្វៀនស្រុកខ្មែរជាលើកដំបូងនេះ ?
កីឡាករយ៉េន ឌីណា មកពីសមាគមកីឡាប្រដាល់ក្រសួងកសិកម្ម ប្រកួតជាមួយកីឡាករថៃ Meodam Kiet Kamphong ក្នុងប្រភេទទម្ងន់៦០គីឡូក្រាម ។ យ៉េន ឌីណា ក៏ជាជើងខ្លាំងម្នាក់ដែលចេះប្រើស្នៀតកែង និងជង្គង់បានយ៉ាងស្ទាត់ជំនាញ។ រីឯកីឡាករថៃដែលជាគូប្រកួត ក៏មិនអន់ខ្សោយបុ៉ន្មានឡើយ ។ ជាក់ស្តែង កីឡាករថៃរូបនេះក្នុងប្រវត្តិប្រកួតបានចំនួន៤៧ដង ក្នុងនោះគេឈ្នះ៤០ដង ចាញ់៥ដង និងស្មើ២ដងប៉ុណ្ណោះ។ អ្នកប្រដាល់ថៃរូបនេះត្រូវបានអ្នករៀបចំកម្មវិធី ប្រកួតអះអាងថា ជាកំពូលអ្នកប្រើស្នៀតកែង និងជង្គង់យ៉ាងស្ទាត់ជំនាញ ថែមទាំងមានចិត្តហ៊ានទៀតផង ។ ទោះបីយ៉ាងណា យ៉េន ឌីណា ក៏បានត្រៀមខ្លួនរួចជាស្រេចហើយដែរសម្រាប់ស្វាគមន៍គូប្រកួតរបស់ខ្លួន មិនឱ្យអ្នកគាំទ្រខកចិត្តឡើយ ។
ដោយឡែក អ៊ុង វិរៈ មកពីក្លិបកងពលតូចឆត្រយោង៩១១ ជួបប្រកួតជាមួយកីឡាករថៃ Ploy Kiet Kamphnon ក្នុងប្រភេទទម្ងន់៦៩គីឡូក្រាម ។ អ៊ុង វិរៈ គឺជាអ្នកប្រដាល់ម្នាក់ដែលមានកាយសម្បទាល្អ ហើយមួយរយៈមកនេះ គេប្រកួតកម្រចាញ់ខ្លាំងណាស់។ តែការមកជួបជាមួយកីឡាករថៃដែលមានប្រវត្តិប្រកួតបានចំនួន៧២ដង ឈ្នះ៦៨ដង ស្មើ២ដង និងចាញ់តែ២ដងនោះមិនទាន់ដឹងថាយ៉ាងណានោះទេ ។ ដូច្នេះបើចង់ដឹងនរណាខ្លាំងជាងនរណា មានតែរង់ចាំមើលពួកគេទាំង២សាកកណ្តាប់ដៃគ្នាមើលសិនប៉ុណ្ណោះ ៕
ចែករំលែកព័តមាននេះ