សហរដ្ឋអាមេរិក និងសហភាពអឺរ៉ុប ប្រកាសកាលពីថ្ងៃទី២៩ កក្កដា ពីទណ្ឌកម្មថ្មីៗប្រឆាំងក្រុងមូស្គូ ដោយសារតួនាទីរបស់ខ្លួនក្នុងវិបត្តិនៅអ៊ុយក្រែន ខណៈការប្រយុទ្ធនៅបន្តយ៉ាងខ្លាំងក្លានៅភាគខាងកើតប្រទេសនេះ រវាងកងទ័ពរដ្ឋាភិបាល និងពួកបំបែកខ្លួននិយម ។
ប្រធានាធិបតីអាមេរិកលោក ប៉ារ៉ាក់ អូបាម៉ា ប្រកាសពីទណ្ឌកម្មថ្មីទាំងនោះប្រឆាំងរុស្ស៊ី ដែលសំដៅលើផ្នែកថាមពល ការពារ និងហិរញ្ញវត្ថុជាមួយការផ្អាកការនាំចេញ ផ្អាកជាផ្លូវការនូវឥណទានសម្រាប់ការនាំចេញ និងការផ្គត់ផ្គង់ហិរញ្ញវត្ថុសម្រាប់ការអភិវឌ្ឍសេដ្ឋកិច្ចរុស្ស៊ី និងបន្ថែមទណ្ឌកម្មដល់បណ្តាធនាគារ និងសហគ្រាសខាងផ្នែកការពារ ។
ចំណែកសហភាពអឺរ៉ុបវិញ បានចេញប៉ុន្មានម៉ោងមុននេះពីវិធានការរឹតត្បិតថ្មីៗ ដែលនឹងរួមបញ្ចូលការបិទច្រកចេញ-ចូលដែលមានដើមទុនរបស់សហភាពអឺរ៉ុបចំពោះបណ្តាធនាគាររុស្ស៊ីគ្រប់គ្រងដោយរដ្ឋ ហើយនឹងសំដៅលើផ្នែកការពារនិងបណ្តាបច្ចេកវិទ្យារសើប ។
ផ្ទុយពីសហរដ្ឋអាមេរិក ប្រទេសទាំង២៨ជាសមាជិកសហភាពអឺរ៉ុប ដោយសារតែផលប្រយោជន៍សេដ្ឋកិច្ចសំខាន់របស់ខ្លួន ត្រូវការពេលវេលាច្រើនខែ មុនពេលចាត់វិធានការខ្លាំងក្លាមួយប្រឆាំងរុស្ស៊ី ។ ក៏ប៉ុន្តែក្រោយការបាញ់ធ្លាក់យន្តហោះប៊ូអុីង៧៧៧របស់ម៉ាឡេស៊ី បណ្តាលឱ្យជនស៊ីវិលស្លាប់២៩៨នាក់ ក្នុងនោះមានជនជាតិហូឡង់ដល់១៩៤នាក់ នៅខាងផ្នែកអ៊ុយក្រែនដែលកាន់កាប់ដោយពួកបំបែកខ្លួននិយមស្និទ្ធរុស្ស៊ី ធ្វើឱ្យសហភាពអឺរ៉ុបសម្រេចចិត្តទាំងស្រុង ។
កាលពីថ្ងៃទី២៩ កក្កដា លោកស្រី អេនហ្សឺឡា ម័រកែល អធិការបតីអាល្លឺម៉ង់ ថ្លែងថា ការសម្រេចចិត្តរបស់សហភាពអឺរ៉ុប ដាក់ទណ្ឌកម្មរុស្ស៊ី គឺចៀសពុំរួច ។ លោកស្រីបន្តថា បណ្តាមេដឹកនាំអឺរ៉ុប បានព្រមានជាច្រើនលើកដល់ក្រុងមូស្គូទាក់ទិនដល់បណ្តាផលវិបាកនៃការបញ្ចូលដែនដីគ្រីមេ ទៅក្នុងប្រទេសរុស្ស៊ី និងការបង្កអស្ថិរភាពនៅភាគខាងកើតអ៊ុយក្រែន ៕
ចែករំលែកព័តមាននេះ