រាជធានីភ្នំពេញ ៖ ការប្រកួតកីឡាវាយកូនបាល់យុវជនវ័យក្មេងដណ្តើមពានរង្វាន់ថ្នាក់ជាតិប្រចាំឆ្នាំ២០១៤ លើកទី៣ ដែលបានចាប់ផ្តើមធ្វើតាំងពីថ្ងៃទី២៥ កក្កដា មកនោះបានបញ្ចប់ហើយ កាលពីរសៀលថ្ងៃទី២៧ កក្កដា ឆ្នាំ២០១៤ នៅមជ្ឈមណ្ឌលជាតិកីឡាវាយកូនបាល់កម្ពុជា រាជធានីភ្នំពេញ ។ សម្រាប់ការប្រកួតនេះមាន៣ប្រភេទ អាយុដែលបានចូលរួមដូចជា ប្រភេទអាយុក្រោម១២ឆ្នាំ បុរស-នារី, ក្រោម១៤ឆ្នាំ បុរស-នារី និងក្រោម១៨ឆ្នាំបុរស-នារី ។
សរុបកីឡាករ-កីឡាការិនីចូលរួមមានចំនួន៦១នាក់មកពីខេត្តបាត់ដំបង, ខេត្តកែប, មណ្ឌលកុមារកំព្រាកោះក្របី, មណ្ឌលកុមារកំព្រាបឹងខ្យាង, សាលាបឋមសិក្សាព្រះនរោត្តម និងសាលាបឋមសិក្សាចតុមុខដែលសុទ្ធតែជាសាលាបានទទួលកម្មវិធីវាយកូនបាល់ខ្នាតតូច (Mini-Tennis) កន្លងមក ។ ចំពោះលទ្ធផលចំណាត់ថ្នាក់មានដូចខាងក្រោម ៖
ប្រភេទអាយុក្រោម១៨ឆ្នាំផ្នែកនារីលេខ១ បានទៅកីឡាការិនី អិុត លក្ខិណា និងលេខ២ កីឡាការិនី ចេង ចាន់នាង ។ ផ្នែកបុរសលេខ១ បានទៅលើកីឡាករ ឈាង វណ្ណសាក់ និងលេខ២ កីឡាករ ឆាយ ឆេន ។ ប្រភេទអាយុក្រោម១៤ឆ្នាំផ្នែកនារី លេខ១បានទៅកីឡាការិនី ហួ ស្រីពៅ និងលេខ២កីឡាការិនី សារី សូដានី ។ ផ្នែកបុរស លេខ១បានទៅកីឡាករ ឃ្លាំង ពន្លក និងលេខ២កីឡាករ សែនសុផុន ។ ប្រភេទអាយុក្រោម១២ឆ្នាំដែលមាន២ប្រភេទ A និង B នោះ សម្រាប់ប្រភេទ A លេខ១បានទៅកីឡាករ ឈឹម សីហា និងលេខ២ កីឡាករ ឡេង សារិនរាជ ។ ចំពោះប្រភេទ B លេខ១បានទៅកីឡាករ និល សំណាង និងលេខ២ កីឡាករ ងួន សាន ។
អគ្គលេខាធិការសហព័ន្ធកីឡាវាយកូនបាល់កម្ពុជា លោក ទេព រិទ្ធីវិទ្ធ បានឱ្យដឹងក្នុងឱកាសនោះថា យើងតែងតែយកចិត្តទុកដាក់ដល់ក្មេងៗដែលបានចូលរួមប្រកួត ជាពិសេសមិនថាតែក្នុងសាលាមួយចំនួននៅក្នុងរាជធានីភ្នំពេញទេ តែនៅតាមបណ្តាខេត្តមួយចំនួនទៀតក៏យើងតែងតែមានកម្មវិធីប្រកួតខ្នាតតូចសម្រាប់ពួកគេផង ដែរ ។ យើងសង្ឃឹមយា៉ងមុតមាំថា តាមរយៈការរៀបចំការប្រកួតកីឡាខ្នាតតូច និងការបណ្តុះបណ្តាលក្មេងៗជំនាន់ក្រោយនេះ ពួកគេនឹងអាចក្លាយទៅជាកីឡាករ-កីឡាការិនីដែលមានបច្ចេកទេស សមត្ថភាពពិតប្រាកដ ក្នុងការចូលរួមប្រកួតប្រជែងក្នុងព្រឹត្តិការណ៍ថ្នាក់ជាតិ និងអន្តរជាតិនានា និងជាពិសេសនោះគឺសម្រាប់ឆ្នាំ២០២៣ ដែលកម្ពុជាយើងធ្វើជាម្ចាស់ផ្ទះរៀបចំការប្រកួតកីឡា SEA Games ។
លោក ទេព រិទ្ធីរិទ្ធ បានថ្លែងអំណរគុណដល់អ្នកឧបត្ថម្ភគាំទ្រដូចជា ក្រុមហ៊ុនភេសជ្ជៈកូកាកូឡា ក្រុមហ៊ុនអីុស៊ីខម អង្គការហាហ្គាដែលបានផ្តល់ជាចំណីអាហារដល់ក្មេងៗ និងសណ្ឋាគារ Cambodian Country Club ដែលតែងតែផ្តល់ទីតាំងសម្រាប់ការប្រកួតដល់សហព័ន្ធកីឡាវាយកូនបាល់កម្ពុជាជារៀងរាល់លើក ។ លោកក៏បានសំណូមពរដល់បណ្តាដៃគូឧបត្ថម្ភ សូមបន្តជួយគាំទ្រដល់វិស័យកីឡាមួយនេះឱ្យកាន់តែមានការរីកចម្រើនដើម្បីជាទុនដើរឆ្ពោះទៅរកភាពជោគជ័យជូនជាតិទៅថ្ងៃខាងមុខទៀត ៕
ចែករំលែកព័តមាននេះ