ក្រោយពីបាននាំមុខនៅលើតារាងថិរវេលាសរុបអស់ជាច្រើនដំណាក់ ទីបំផុត Vincenzo Nibali បានក្លាយជាអ្នកលើកពានព្រឹត្តិការណ៍ប្រណាំងកង់ដ៏ធំលំដាប់ពិភពលោក Tour de France ប្រចាំឆ្នាំ២០១៤ ។ ការប្រណាំងដែលមាន២១ដំណាក់ និងទើបតែបានបញ្ចប់ទៅកាលពីថ្ងៃម្សិលមិញនៅវិមាន Champs-Élysées ក្រុងប៉ារីស ប្រទេសបារាំងបានចាប់ផ្តើមនៅទីក្រុង Leeds ទឹកដីអង់
ក្រោយពីបាននាំមុខនៅលើតារាងថិរវេលាសរុបអស់ជាច្រើនដំណាក់ ទីបំផុត Vincenzo Nibali បានក្លាយជាអ្នកលើកពានព្រឹត្តិការណ៍ប្រណាំងកង់ដ៏ធំលំដាប់ពិភពលោក Tour de France ប្រចាំឆ្នាំ២០១៤ ។ ការប្រណាំងដែលមាន២១ដំណាក់ និងទើបតែបានបញ្ចប់ទៅកាលពីថ្ងៃម្សិលមិញនៅវិមាន Champs-Élysées ក្រុងប៉ារីស ប្រទេសបារាំងបានចាប់ផ្តើមនៅទីក្រុង Leeds ទឹកដីអង់គ្លេសតាំងពីថ្ងៃទី៥ ខែកក្កដាមកម៉្លេះ ។
ក្នុងរយៈចម្ងាយផ្លូវសរុប៣៦៦៣,៥គីឡូម៉ែត្រ Nibali ក្នុងនាមជាអ្នកជិះកង់ឱ្យក្រុម Astana Pro Team បានប្រើអស់ថិរវេលាសរុបតិចជាងគេបំផុត គឺ៨៩ម៉ោង ៥៩នាទីនិង ៦វិនាទីក្លាយជាម្ចាស់ពាន Tour de France លើកទី១០១ ។ ឯកីឡាករម្ចាស់ផ្ទះបារាំង Jean-Christophe Péraud ជិះឱ្យក្រុម AG2R La Mondiale ដណ្តើមបានត្រឹមចំណាត់ថ្នាក់លេខ២បន្ទាប់ពីប្រើអស់ថិរវេលាច្រើនជាង Nibali ៧នាទីនិង៣៧វិនាទី ខណៈម្ចាស់ជ័យលាភីលេខ៣បានទៅលើកីឡាករបារាំងម្នាក់ទៀតគឺ Thibaut Pinot ជិះឱ្យក្រុម FDJ.fr ។ កីឡាកររូបនេះប្រើថិរវេលាច្រើនជាង Nibali ៨នាទីនិង១៥វិនាទី។
សម្រាប់ Nibali ជ័យជម្នះលើកនេះបាននាំឱ្យគេក្លាយជាជនទី៦ លើលោកដែលអាចយកឈ្នះពានជើងឯកក្របខ័ណ្ឌ Tour ទាំង៣ ។ កាលឆ្នាំ២០១០ គេឈ្នះជើងឯក Tour of Spain ខណៈឆ្នាំ២០១៣ ឈ្នះជើងឯក Tour of Italy ។ គេគឺជាកីឡាករអុីតាលីទី២ បន្ទាប់ពី Marco Pantani ដែលបានយកឈ្នះពានជើងឯកនៅទីនេះ ។
គេបានថ្លែងថា ៖ «វាពិតជាពិបាកក្នុងការប្រៀបធៀបរវាងជ័យជម្នះរបស់ Marco Pantani និងជ័យជម្នះរបស់ខ្ញុំ ។ បន្ទាប់ពីបានយកឈ្នះជើងឯកព្រឹត្តិការណ៍ Tour of Spainនិង Tour of Italy រួចមក ខ្ញុំក៏បានផ្តោតការយកចិត្តទុកដាក់លើក្របខ័ណ្ឌធួធំៗមួយចំនួនទៀត ។ បើទុកណា Tour of Italy ជាព្រឹត្តិការណ៍ប្រណាំងដ៏ធំសម្រាប់បណ្តាជនអុីតាលីក្តី ប៉ុន្តែបើប្រៀបនឹង Tour de France គឺពិតជាមិនដល់ទេ» ។
ដោយឡែក ជ័យជម្នះក្នុងដំណាក់ផ្តាច់ព្រ័ត្រទី២១ បានទៅលើកីឡាករអាល្លឺម៉ង់ Marcel Kittel ។ អ្នកជិះកង់ឱ្យក្រុម Team Giant-Shimano រូបនេះបានបញ្ចប់ដំណាក់មានចម្ងាយផ្លូវ១៣៧,៥គីឡូម៉ែត្រចេញពីទីក្រុង Évry ខាងលើនេះក្នុងថិរវេលា៣ម៉ោង២០នាទីនិង៥០វិនាទី នាំមុខកីឡាករន័រវែស Alexander Kristoff ជិះឱ្យក្រុម Team Katusha ដែលប្រើថិរវេលាច្រើនជាងស្មើជាមួយកីឡាករលីទុយអានី Ramunas Navardauskas ដែលជិះឱ្យក្រុម Garmin- Sharp ។
សូមបញ្ជាក់ថា ព្រឹត្តិការណ៍ប្រណាំង Tour de France លើកទី១០១ឆ្នាំនេះ ចែកចេញ២១ដំណាក់លើចម្ងាយផ្លូវសរុប៣៦៦៣,៥គីឡូម៉ែត្រ ។ ការប្រណាំងបានចាប់ផ្តើមនៅថ្ងៃទី៥ ខែកក្កដា នាទីក្រុង Leeds ប្រទេសអង់គ្លេស ៕
ចែករំលែកព័តមាននេះ