យោងតាមការចុះផ្សាយដោយទីភ្នាក់ងារព័ត៌មាន CNN ឱ្យដឹងថា ព្រឹត្តិការណ៍ប្រណាំងរថយន្តហ្វមមូឡាវ័ននឹងបង្ហាញខ្លួនជាលើកដំបូងនៅប្រទេសអាស៊ែបៃហ្សង់ នាឆ្នាំ២០១៦ ខាងមុខ ។ វិថីមួយចំនួននៅក្រុងបាគូ នឹងត្រូវគេយកមកធ្វើជាទីលានប្រណាំងដែលមានមួួយឆ្នាំម្តងនេះ ។
សូមបញ្ជាក់ថា ប្រជាជាតិដ៏សម្បូរធនធានប្រេងកាតមួយនេះត្រូវបានក្លាយជាការប៉ុនប៉ងពីម្ចាស់ហ្វមមូឡាវ័នពិភពលោកគឺលោកបឺនី អេឡេស្តូនជាយូរមកហើយ ។ តាមការដកស្រង់សម្តីដោយភ្នាក់ងារព័ត៌មានអង់គ្លេស Press Association លោកអេឡេស្តូនបានបញ្ជាក់ថា ៖ «យើងសប្បាយរីករាយជាខ្លាំងដែលទីក្រុងបាគូបានចូលរួមក្នុងគ្រួសារហ្វមមូឡាវ័ន ។ នេះគឺជាការប្រណាំងតាមដងផ្លូវដែលនឹងឆ្លងកាត់កន្លែងគួរឱ្យចាប់អារម្មណ៍ជាច្រើនរបស់ទីក្រុងបាគូ» ។
ថ្មីៗនេះ ហ្វមមូឡាវ័ន បានវាយលុកចូលកាន់តែជ្រៅក្នុងទីផ្សារបណ្តាប្រទេសអឺរ៉ុបខាងកើតដោយក្នុងនោះមានទាំងប្រទេសរុស្ស៊ីជាដើម ។ រដ្ឋមន្ត្រីក្រសួងយុវជន និងកីឡាអាស៊ែបៃហ្សង់លោក Azad Rahimov បានថ្លែងថា ៖ «ទីតាំងរបស់យើងនៅចំណុចប្រសព្វរវាងអឺរ៉ុបខាងកើត និងអាស៊ីភាគខាងលិច គឺជាព្រំប្រទល់ថ្មីមួយសម្រាប់ការប្រណាំងហ្វមមូឡាវ័ន ។ អាស៊ែបៃហ្សង់គឺជាប្រទេសអឺរ៉ុបដ៏ទំនើបជឿនលឿនដែលបង្កើតបាននូវកត្តិស័ព្ទក្នុងនាមជាមជ្ឈមណ្ឌលកីឡាយ៉ាងល្អឥតខ្ចោះ ។ រដ្ឋមន្ត្រីរូបនេះបានបន្តថា ៖ «កុងត្រាដែលនាំយកហ្វមមូឡាវ័នមកកាន់ទីក្រុងបាគូ គឺជាការបើកសករាជថ្មីមួយនៅក្នុងជោគជ័យនៃការទាក់ទាញព្រឹត្តិការណ៍កីឡាធំៗលើលោកផ្សេងៗទៀតមកកាន់ប្រទេសរបស់យើង ។ ទីលានប្រណាំងដែលយើងនឹងរៀបចំគម្រោងគូរប្លង់ គឺប្រហាក់ហែលគ្នាទៅនឹងទីលានប្រណាំងរបស់ហ្វមមូឡាវ័ននានាដែលមានស្រាប់នៅតាមបណ្តាប្រទេសលើលោក» ។
សូមបញ្ជាក់ថា ព្រឹត្តិការណ៍ប្រណាំងរថយន្តហ្វមមូឡាវ័នត្រូវបានបង្កើតឡើងនាឆ្នាំ១៩៥០ ក្រោយកិច្ចសហការពីសហព័ន្ធប្រណាំងរថយន្តអន្តរជាតិ (FIA) ។ មួយរដូវកាលប្រណាំងគឺមានបែងចែកជាកម្មវិធីដែលប្រើពាក្យ Grand Prix នៅខាងចុង ។ ទោះជាយ៉ាងណា F1មិនត្រូវបានគេទទួលស្គាល់ និងបញ្ចូលទៅក្នុងព្រឹត្តិការណ៍កីឡាអូឡាំពិកឡើយ បើទោះណាមានការស្នើសុំជាច្រើនលើកដ្បិតវាជាប្រភទកីឡាដែលប្រណាំងប្រជែងផ្នែកគ្រឿងម៉ាស៊ីន ពោលគឺមិនមែនដោយកម្លាំងមនុស្សឡើយ ៕
ចែករំលែកព័តមាននេះ