រាជធានីភ្នំពេញ ៖ នៅទីបំផុតអារម្មណ៍ពុុះកញ្ជ្រោលរបស់កីឡាករ អ៊ុំ ចំរើន ដែលជាជើងខ្លាំងមួយរូប ត្រូវបានរម្ងាប់ហើយ បន្ទាប់ពីបានយកឈ្នះកីឡាករ ឯម លីថូ ក្នុងជំនួបសងសឹកដ៏ក្តៅគគុក កាលពីថ្ងៃសុក្រកន្លងទៅ ។ នេះជាលទ្ធផលដ៏សំខាន់មួយដែលកីឡាកររូបនេះចង់បានបំផុត មុនការប្រលងបញ្ចប់ថ្នាក់បាក់ឌុបរបស់គេ នៅថ្ងៃទី៤ និងទី៥ សីហា ខាងមុខ ។
រាជធានីភ្នំពេញ ៖ នៅទីបំផុតអារម្មណ៍ពុុះកញ្ជ្រោលរបស់កីឡាករ អ៊ុំ ចំរើន ដែលជាជើងខ្លាំងមួយរូប ត្រូវបានរម្ងាប់ហើយ បន្ទាប់ពីបានយកឈ្នះកីឡាករ ឯម លីថូ ក្នុងជំនួបសងសឹកដ៏ក្តៅគគុក កាលពីថ្ងៃសុក្រកន្លងទៅ ។ នេះជាលទ្ធផលដ៏សំខាន់មួយដែលកីឡាកររូបនេះចង់បានបំផុត មុនការប្រលងបញ្ចប់ថ្នាក់បាក់ឌុបរបស់គេ នៅថ្ងៃទី៤ និងទី៥ សីហា ខាងមុខ ។
គ្មានអ្នកណាមិនភ្ញាក់ផ្អើលនោះទេ ក្នុងពេលដែលកីឡាករ អ៊ុំ ចំរើន មកពីក្លិបតាឡីដំរីមានឫទ្ធិសម្រេចចិត្តឡើងសងសឹកជាមួយកីឡាករ ឯម លីថូ មកពីក្លិបឫទ្ធិពោធិ៍សែនជ័យ កាលពីថ្ងៃទី២៥ កក្កដា នៅលើសង្វៀនទូរទស្សន៍បាយ័ន ក្នុងពេលការប្រលងបាក់ឌុបរបស់គេ កាន់តែរំកិលជិតដល់ ។ មនុស្សតិចណាស់ជឿថាគេអាចឈ្នះដោយសារទី១ កីឡាករ ឯម លីថូ ជាជើងខ្លាំងនៅក្នុងពិភពប្រដាល់ពិបាកទប់ជាប់ ។ ទី២ ឯម លីថូ ធ្លាប់ផ្តួលគេឱ្យសន្លប់ម្តងហើយក្នុងទឹកទី១ និងទី៣ គឺដោយសារតែកីឡាករ អ៊ុំ ចំរើន ពេលនេះ មិនមានពេលហ្វឹកហាត់ក្នុងក្លិបប្រដាល់ជាប់លាប់នោះទេ ព្រោះតែជាប់ត្រៀមប្រលងបញ្ចប់ថ្នាក់ទី១២ ។ រវាងពួកគេ បើនិយាយពីកេរ្តិ៍ឈ្មោះ គឺកំពុងឡើងកូដដូចគ្នា យ៉ាងណាក៏ដោយ ចំពោះទឹកដៃ និងបច្ចេកទេសគ្មានអ្នកណាជឿជាក់នោះទេថាកីឡាករ អ៊ុំ ចំរើន នឹងអាចទៅរួចជាមួយកីឡាករ ឯម លីថូ ។
កីឡាករ អ៊ុំ ចំរើន ប្រាប់ថា សប្បាយចិត្តណាស់ដែលអាចសងសឹក និងបានលុបភាពអាមា៉ស់ ដែលធ្លាប់ផ្តល់ឱ្យដោយកីឡាករ ឯម លីថូ ដើម្បីរក្សាក្រេឌីត ។ គេចាត់ទុកថា ជ័យជម្នះនោះគឺជាមោទនភាពធំមួយក្នុងពេលដែលគេមិនមានពេលហ្វឹកហាត់គ្រប់គ្រាន់បំប៉នសមត្ថភាព និងកំពុងវក់វីខ្លាំង ជាមួយការត្រៀមប្រលងបញ្ចប់ថ្នាក់ទី១២ច្រើនជាង ។ កីឡាកររូបនេះបញ្ជាក់ក្រោយឈ្នះគូសងសឹកថា «កាលពីថ្ងៃសុក្រ ទី២៥ កក្កដា នោះ ខ្ញុំមិនត្រូវឡើងសងសឹកជាមួយគាត់ (ឯម លីថូ) នោះទេ ព្រោះគិតថា ទី១រវល់រៀនគួត្រៀមប្រលងបាក់ឌុប និងទី២ គិតថាបើឡើងពេលនេះគឺមិនខុសពីឡើងមកចាញ់ទៀតនោះទេ ប៉ុន្តែមកពីខ្ញុំមិនស្ងប់ចិត្ត ទើបសុខចិត្តឡើងប្រកួតដើម្បីកុំឱ្យអារម្មណ៍ពុះកញ្ជ្រោលនោះប៉ះពាល់ដល់ថ្ងៃប្រលងបាក់ឌុបរបស់ខ្ញុំ!» ។ អ៊ុំ ចំរើន ទទួលស្គាល់ថា នោះជាការប្រថុយប្រថានដែលខ្លួនសម្រេចចិត្តសងសឹកជើងខ្លាំងម្នាក់ ក្នុងពេលសកម្មភាពត្រៀមប្រលងស្លាប់រស់ ក៏ជាសម្ពាធពិបាកដកឃ្លា ។ គេមានឱកាសហ្វឹកហាត់តែពីរបីល្ងាចប៉ុណ្ណោះ នៅមុនឡើងរេញដើម្បីកុំឱ្យប៉ះពាល់ដល់ការរៀនគួប្រចាំថ្ងៃ ។ អីុចឹងហើយ ទើបកីឡាកររូបនេះយល់ថា ជ័យជម្នះដែលគេសងសឹកបាន គឺដោយសារទឹកចិត្តពុះកញ្ជ្រោលដែលរុញឱ្យគេប្រឹងវាយមិនញញើតដៃរហូតគ្រប់គ្រងឆាកប្រយុទ្ធឱ្យមានប្រៀបលើកីឡាករ ឯម លីថូ ។ ដ្បិតថា កីឡាករ ឯម លីថូ វាយបកបានល្អ និងមានសន្ទុះមិនខុសពីសព្វដង ក៏កម្រិតវាយកែង និងមា៉ត់ផាំងៗរបស់ អ៊ុំ ចំរើន នៅតែអាចរក្សាលំនឹងបានល្អរហូតដល់ទឹកទី៥ ។ ការប្រកួតសងសឹករបស់ពួកគេត្រូវគេឱ្យពិន្ទុថា កក្រើក និងរញ្ជួយសង្វៀន ខណៈដែលមនុស្សយា៉ងហោច៨០%សរសើរថា ជក់ចិត្តតាំងពីដើមទីរហូតដល់ចប់ការប្រកួត ។ អ៊ុំ ចំរើន ប្រាប់ថា ទោះត្រឹមឈ្នះពិន្ទុ ក៏រំភើបចិត្តដែរ ព្រោះបើចាញ់ម្តងទៀត ពិតជាពិបាកប្រឈមនៅលើសង្វៀន ហើយស្រួលមិនស្រួលនឹងប៉ះទង្គិចដល់អារម្មណ៍នៅថ្ងៃប្រលងបាក់ឌុបនោះផង ដោយសារតែគេជាបុគ្គលដែលឈ្លក់វង្វេងនឹងលទ្ធផលចាញ់ឈ្នះនៅក្នុងពិភពប្រដាល់បែបនេះ ។ ក្រោយបញ្ចប់ការប្រលង ប្រសិនទទួលបានលទ្ធផលវិជ្ជមានគេសន្យាថា នឹងធ្វើឱ្យកាន់តែកក្រើកក្នុងអាជីពប្រដាល់ បើទោះជាដឹងថា មុខរបរនេះទទួលកម្រៃតិចឈឺខ្លួនច្រើន ហើយមិនអាចគ្រប់គ្រាន់សម្រាប់ការរស់នៅជាក់ស្តែងក្តី ៕
ចែករំលែកព័តមាននេះ