ខេត្តសៀមរាប ៖ នៅទីបំផុតតុលាការខត្តសៀមរាបបានសម្រេចផ្តន្ទាទោសលោក រូដូលស៏ អ៊ីកនូចែល( Rudolf Eknujhel )ជាជនជាតិស្វីសវ័យ៦៧ឆ្នាំ ដែលឧស្សាហ៏ប្រព្រឹត្តរឿងអាស្រូវផ្លូវភេទជាមួយកុមារភេទដូចគ្នា ឲ្យជាប់គុករយៈពេល២ឆ្នាំ និងបណ្តេញចេញពីព្រះរាជាណាចក្រកម្ពុជាជារៀងរហូត ក្រោមបទចោទប្រកាន់ទិញពេស្យាកម្មកុមារ។
លោកសួន សុភា មេធាវីការពារក្តីឲ្យជនជាប់ចោទឈ្មោះ រូដូលស៏ អ៊ីកនូចែល(Rudolf Eknujhel) បានថ្លែងថា សាលក្រមផ្តន្ទាទោសកូនក្តីរបស់លោកត្រូវបានប្រកាសជាសាធារណៈ កាលពីព្រឹកថ្ងៃទី២៥ កក្កដា ដោយលោកចៅក្រម ឆាយ គង់ បន្ទាប់ពីបើកសវនាការតាមរយៈក្រុមប្រឹក្សា កាលពីព្រឹកថ្ងៃទី១៦ កក្តដា កន្លងទៅ។ លោកមេធាវីបន្តថា នៅក្នុងរឿងនេះចៅក្រមបានសម្រេចផ្តន្ទាទោសឲ្យកូនក្តីលោកជាប់គុករយៈពេល២ឆ្នាំ តែអនុវត្តទោសនៅក្នុងពន្ធនាគារមួយឆ្នាំ និងព្យួរទោសរយៈពេលមួយឆ្នាំ ព្រមទាំងតម្រូវឲ្យបង់ប្រាក់សំណងទៅដើមបណ្តឹចំនួន១០លានរៀល។ លើសពីនោះទៅទៀតមិនអនុញ្ញាតឲ្យបន្តស្នាក់នៅក្នុងព្រះរាជាណាចក្រកម្ពុជាតទៅទៀត ក្រោយពីអនុវត្តន៏ទោសនៅក្នុងពន្ធនាគាររួចរាល់។
លោកធ្លាប់បានបញ្ជាក់នៅក្នុងសេចក្តីសន្និដ្ឋានក្នុងសវនាការថា កូនក្តីរបស់លោកជាមនុស្សវ័យចាស់ និងមានជំងឺប្រចាំកាយធ្ងន់ធ្ងរ ដូចជាជំងឺមហារីក ពោះវៀន ជំងឺបេះដូង ដែលតម្រូវឲ្យក្រុមវេជ្ជបណ្ឌិតធ្វើការវះកាត់ជាបន្ទាន់ និងទទួលទានថ្នាំជាប្រចាំ បើពុំនោះគាត់នឹងត្រូវជួបគ្រោះថ្នាក់ដល់ជីវិត។
សូមបញ្ជាក់ថា ជនជាប់ចោទឈ្មោះរូដូលស៏ អ៊ីកនូចែល(RudolfEknujhel)ជាជនជាតិស្វីស អាយុ៦៧ឆ្នាំ កាន់លិខិតឆ្លងដែន F0084063 ត្រូវបានសមត្ថកិច្ចនគរបាលប្រឆាំងការជួញដូរមនុស្សខេត្តឃាត់ខ្លួន កាលពីរសៀលថ្ងៃទី៣១ តុលា ២០១៣កន្លងទៅ ៕
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ