កីឡាករប្រដាល់ទម្ងន់ធ្ងន់អង់គ្លេសថៃសាន់ ហ្វឺរី នឹងឡើងសង្វៀនប្រកួតជាមួយកីឡាករបេឡារុសអាឡិចសាន់ឌ័រ អ៊ូស្ទីណូវ នៅសង្វៀន Phones 4u Arena ក្រុង Manchester ប្រទេសអង់គ្លេស នារាត្រីថ្ងៃសៅរ៍សប្តាហ៍នេះបន្ទាប់ពីការប្រកួតដណ្តើមខ្សែក្រវាត់ពិភពលោករបស់គេជាមួយកីឡាករមិត្តរួមជាតិ ឌីរ៉េក ស៊ីសូរ៉ា ត្រូវបានលុបចោល ។
ហ្វឺរី វ័យ២៥ឆ្នាំអាចទុកជាកីឡាករជើងខ្លាំងជំនាន់ថ្មីរបស់អង់គ្លេស ។ ២២ប្រកួតដែលគេបានឆ្លងកាត់នៅលើសង្វៀន គឺមិនដែលបរាជ័យម្តងណាឡើយ ។ អ្វីដែលកាន់តែពិសេស គឺគេធ្លាប់បានផ្តួលដៃគូឱ្យសន្លប់បានដល់ទៅ១៦លើក ។ ប្រកួតលើកចុងក្រោយកាលពីថ្ងៃទី១៥ ខែកុម្ភៈដើមឆ្នាំនេះ ផ្តួលកីឡាករអាមេរិក Joey Abell ឱ្យចុះចាញ់ក្នុងទឹកទី៤ ។
ធ្លាប់បានជួបប្រទះការខកបំណងដូចជាពេលនេះ២លើករួចមកហើយជាមួយកីឡាករដេវីដ ហេ ។ យ៉ាងណាក៏ដោយ ការឡើងសង្វៀនរបស់គេនៅពេលនេះ គឺជាការជម្នះចិត្តមួយផងដែរ ។ គេបានថ្លែងថា ៖ «ខ្ញុំបានប្រឹងប្រែងហ្វឹកហាត់ជាច្រើនខែមកហើយ ដូច្នេះខ្ញុំត្រូវតែឡើងប្រកួត បើទោះណា កីឡាករដែលខ្ញុំត្រូវជួបខ្លាំងប៉ុនណាក៏ដោយ ។ ខ្ញុំនឹងបញ្ចេញកំហឹងទាំងអស់លើពួកគេ» ។
ឯកីឡាករអ៊ូស្ទីណូវ វិញ ៣០ប្រកួត គឺគេចាញ់តែ១លើកប៉ុណ្ណោះ ។ គេធ្លាប់ផ្តួលគូប្រកួតឱ្យសន្លប់២១លើក ។ សូមបញ្ជាក់ថា កីឡាករវ័យ៣៧ឆ្នាំរូបនេះហើយដែលធ្វើឱ្យស៊ីសូរ៉ា បាក់ដៃអំឡុងពេលហាត់សម ៕
ចែករំលែកព័តមាននេះ