រាជធានីភ្នំពេញ ៖ ការប្រកួតកីឡាកាយសម្ព័ន្ធជ្រើសរើសជើងឯកទូទាំងប្រទេសប្រចាំឆ្នាំ២០១៤ ដែលរៀបចំធ្វើឡើងដោយក្រសួងអប់រំយុវជន និងកីឡា នឹងចាប់ផ្តើមដំណើរការជាផ្លូវការ នៅថ្ងៃទី២៤ កក្កដា នៅក្នុងសាលប្រកួតកីឡាកាយសម្ព័ន្ធ នៃពហុកីឡដ្ឋានជាតិដែលតាមគម្រោងកម្មវិធីប្រកួតនេះនឹងត្រូវបញ្ចប់នៅថ្ងៃទី២៩ ខែឆ្នាំដដែល ។
រាជធានីភ្នំពេញ ៖ ការប្រកួតកីឡាកាយសម្ព័ន្ធជ្រើសរើសជើងឯកទូទាំងប្រទេសប្រចាំឆ្នាំ២០១៤ ដែលរៀបចំធ្វើឡើងដោយក្រសួងអប់រំយុវជន និងកីឡា នឹងចាប់ផ្តើមដំណើរការជាផ្លូវការ នៅថ្ងៃទី២៤ កក្កដា នៅក្នុងសាលប្រកួតកីឡាកាយសម្ព័ន្ធ នៃពហុកីឡដ្ឋានជាតិដែលតាមគម្រោងកម្មវិធីប្រកួតនេះនឹងត្រូវបញ្ចប់នៅថ្ងៃទី២៩ ខែឆ្នាំដដែល ។
ការប្រកួតឆ្នាំនេះមាន កីឡាករ-កីឡាការិនីចូលរួមចំនួនជាង២០០នាក់ ក្នុងនោះកីឡាការិនីមានចំនួន៧៩នាក់មកពីក្លិបនិងសមាគមចំនួន១០រួមមាន ក្លិប៧មករាសែនជ័យ, ខេមឃីតឃុំខ្វាវ, ខេមឃីតត្រពាំងឃ្លោក, ហ្សាក់កឹះមា៉ញ់, កៀនរការ, កំពង់ត្រឡាចលើ, TLC, HRB, One 2 One និងក្លិបកំពង់ក្តារ ។ កីឡាករ-កីឡាការិនីទាំងនោះមាន២ប្រភេទគឺ កាយសម្ព័ន្ធអាទិសស្ទិក (Artistic) និងកាយសម្ព័ន្ធអាអេរ៉ូប៊ិក (Aerobic) ។
ការប្រកួតកីឡាកាយសម្ព័ន្ធ Artistic គឺ មាន ៖
វិញ្ញាសាឯកត្តជនក្របខ័ណ្ឌក-១ផ្នែកបុស សំដែងលើឧបករណ៍ចំនួន៥រួមមាន ៈ កម្រាល-សេះលោត-សេះកង-កង និងរបារស្រប ។ ឧបករណ៍ជំនាញបុរស ក-១ មានសេះលោត និងកម្រាល ។ វិញ្ញាសាឯកត្តជនក្របខ័ណ្ឌ ក-១ ផ្នែកនារី សំដែងលើឧបករណ៍ទាំង៣ មានកម្រាល-សេះលោត និងស្នួរលំនឹង ។ ឧបករណ៍ជំនាញនារី ក-១ មានសេះលោត និង កម្រាល ។ វិញ្ញាសាឯកត្តជនក្របខ័ណ្ឌ ក-២ ផ្នែកបុរស សំដែងជាមួយឧបករណ៍៤ប្រភេទគឺ កម្រាល-សេះលោត-សេះកង និងកង ។ ឧបករណ៍ជំនាញបុរសក្របខ័ណ្ឌ ក-២ គឺកម្រាល ។ ផ្នែកនារីគឺដូចក្របខ័ណ្ឌ ក-១ដែរ គឺការសំដែងឧបករណ៍ជំនាញសេះលោត ។
សម្រាប់ប្រភេទកីឡាកាយសម្ព័ន្ធ Aerobic គឺមានវិញ្ញាសា Aerobic ឯកត្តជនក្របខ័ណ្ឌ ក-១ បុរស-នារី, Aerobic គូចម្រុះបុរស-នារី, Aerobic Trio បុរស-នារី និង Aerobic ជាក្រុមដែលមានគ្នា៤នាក់ ។ ចំពោះក្របខ័ណ្ឌ ក-២វិញមាន Aerobic ឯកត្តជនបុរស-នារីដូចជា Aerobic ចម្រុះបុរស-នារី និង Aerobic Trio បុរស-នារី ។ លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជាបានឱ្យដឹងថា សម្រាប់ចំនួនកីឡាករ-កីឡាការិនី ដែលបានដាក់ពាក្យចូលប្រកួតក្នុងឆ្នាំនេះ គឺប្រហាក់ប្រហែលនឹងឆ្នាំមុនដែរ ដោយអ្នកចូលរួមភាគច្រើនមានវ័យក្មេងៗចាប់ពីអាយុ១៣ឆ្នាំឡើងទៅ ។
លោកបន្តថា ព្រឹត្តិការណ៍នេះដំណើរការទៅបានគឺដោយសារក្រសួងអប់រំយុវជន និងកីឡាអនុញ្ញាតឱ្យរៀបចំប្រកួតជ្រើសរើសជើងឯកថ្នាក់ជាតិជារៀងរាល់ឆ្នាំ ដែលអាចឱ្យយើងជ្រើសបានកីឡាករ-កីឡាការិនីដែលមានទេពកោសល្យ និងសមត្ថភាពពិតប្រាកដ ដែលជាថ្នាលបន្តវេនហ្វឹកហាត់ត្រៀមប្រកួតដណ្តើមមេដាយពេលកម្ពុជាធ្វើជាម្ចាស់ផ្ទះកីឡាស៊ីហ្គេមនាឆ្នាំ២០២៣ខាងមុខ ។ លោកបានអំពាវនាវដល់បណ្តាក្រុមហ៊ុននានាមេត្តាជួយគាំទ្រដល់វិស័យកីឡាកាយសម្ព័ន្ធបន្ថែមទៀតដើម្បីឱ្យអត្តពលិកយើងមានលទ្ធភាពប្រកួតប្រជែងលើឆាកអន្តរជាតិ ៕
ចែករំលែកព័តមាននេះ