រាជធានីភ្នំពេញ ៖ ការប្រកួតប្រដាល់ដណ្តើមខ្សែក្រវាត់ស្រាបៀរភ្នំពេញក្នុងប្រភេទទម្ងន់៦៣,៥គីឡូក្រាមនៅលើសង្វៀន CTN នាថ្ងៃព្រហស្បតិ៍ ទី២៣ កក្កដា ស្អែកនេះ បានឈានចូលដល់សប្តាហ៍ទី៣ហើយ ។ កីឡាករ ធី តុងហ៊ី មកពីក្លិបសាលវ័ន្តកីឡា ត្រូវជួបប្រកួតជាមួយកីឡាករ កន ចន្ថា មកពីសមាគមកីឡាប្រដាល់ក្រសួងការពារជាតិ ចំណែកកីឡាករ ឃីម ឌីមា៉ មកពីក្លិបរស្មីភូមិគាប ខេត្តបន្ទាយមានជ័យ ជួបជាមួយកីឡាករ វីវា៉ បាចា មកពីក្លិបមហិទ្ធិឫទ្ធិតាដំបងដែក ។
ធី តុងហ៊ី និង កន ចន្ថា ឆ្លងកាត់ការប្រកួតបានមួយលើកម្នាក់រួចមកហើយ ក្នុងនោះ ធី តុងហ៊ី រកបាន៣ពិន្ទុ ចំណែក កន ចន្ថា រកបានតែ១ពិន្ទុប៉ុណ្ណោះ ។ ធី តុងហ៊ី មានភាពប៉ិនប្រសប់ខាងប្រើស្នៀតកែង និងជង្គង់ ប៉ុន្តែចលនាវាយចេញរបស់គេហាក់មានភាពយឺតយ៉ាវបន្តិច ។ ធី តុងហ៊ី មានកម្ពស់ខ្ពស់ជាង ដូច្នេះ កន ចន្ថា ប្រសិនជាចង់យកឈ្នះគេ គឺមិនមែនជាការងាយស្រួលប៉ុន្មានឡើយ ។ ទោះបីយា៉ងណា កន ចន្ថា ក៏មានចិត្តសឿង ឯចលនាវាយចេញរបស់គេក៏មានភាពរហ័សរហួនគ្រាន់បើ គ្រាន់តែគេចាញ់ប្រៀបកម្ពស់ ធី តុងហ៊ី បន្តិចប៉ុណ្ណោះ ។ យ៉ាងណាក៏ដោយ រវាងគូនេះគេមានជំនឿចិត្តលើ ធី តុងហ៊ី ច្រើនជាងក្នុងការស្វែងរក៣ពិន្ទុបន្ថែម ។
ប៉ុន្តែ ធី តុងហ៊ី ក៏មិនហ៊ានមើលស្រាល កន ចន្ថា នោះដែរ ដោយសារ កន ចន្ថា មិនបណ្តោយឱ្យរូបគេចាញ់ម្តងទៀតដោយងាយនោះឡើយ ។
ឃីម ឌីមា៉ ជួប វីវា៉ បាចា លើកនេះ គេមានជំនឿចិត្តច្រើនក្នុងការស្វែងរក៣ពិន្ទុបន្ថែម ទៀត ។ គូនេះក៏ប្រកួតបានមួយលើកម្នាក់រួចមកហើយដែរ ប៉ុន្តែមានតែ ឃីម ឌីមា៉ ប៉ុណ្ណោះ ដែលទទួលបាន៣ពិន្ទុពីការប្រកួតលើកមុននោះ។ ចំណែកឯការប្រកួតលើកនេះទៀត ទោះបី វីវា៉ បាចា ចង់ឈ្នះដើម្បីទទួល៣ពិន្ទុក៏ដោយក៏មិនអាចទៅរួចឡើយ ដោយសារគេគ្រាន់តែជាអ្នកប្រដាល់ជើងថ្មីម្នាក់ប៉ុណ្ណោះ ល្បិចប្រយុទ្ធនៅលើសង្វៀនរបស់គេក៏នៅអន់ បើប្រៀបធៀបជាមួយ ឃីម ឌីមា៉ នោះ ។
ដូច្នេះសម្រាប់ការមកប៉ះ ឃីម ឌីមា៉ លើកនេះ គេមានសង្ឃឹមតិចតួចបំផុត ព្រោះ ឃីម ឌីម៉ា គេគឺជាកីឡាករជើងខ្លាំងមួយរូបដែលពិបាកយកឈ្នះបំផុត ។ ចាំមើល វីវា៉ បាចា អាចតស៊ូប្រកួតជាមួយ ឃីម ឌីមា៉ បានដល់ទឹកទី៥ឬអត់ ៕
ចែករំលែកព័តមាននេះ