ក្នុងរយៈពេលប៉ុន្មានឆ្នាំកន្លងមកនេះ ដោយទទួលបានការយកចិត្តទុកដាក់ និងទំនុកបម្រុងពីបក្ស និងរដ្ឋវៀតណាម បានជួយឱ្យជីវភាពរស់នៅរបស់ប្រជាជនខ្មែរនៅតំបន់ភាគខាងត្បូង នៃប្រទេសវៀតណាម ត្រូវបានកែលម្អ និងអភិវឌ្ឍយ៉ាងទូលំទូលាយជាបន្តបន្ទាប់។ សមិទ្ធផលទាំងនេះបានរួមចំណែកដល់ការពង្រឹងជំនឿទុកចិត្តរបស់ប្រជាពលរដ្ឋខ្មែរ ចំពោះការដឹកនាំរបស់បក្ស…
ក្នុងរយៈពេលប៉ុន្មានឆ្នាំកន្លងមកនេះ ដោយទទួលបានការយកចិត្តទុកដាក់ និងទំនុកបម្រុងពីបក្ស និងរដ្ឋវៀតណាម បានជួយឱ្យជីវភាពរស់នៅរបស់ប្រជាជនខ្មែរនៅតំបន់ភាគខាងត្បូង នៃប្រទេសវៀតណាម ត្រូវបានកែលម្អ និងអភិវឌ្ឍយ៉ាងទូលំទូលាយជាបន្តបន្ទាប់។ សមិទ្ធផលទាំងនេះបានរួមចំណែកដល់ការពង្រឹងជំនឿទុកចិត្តរបស់ប្រជាពលរដ្ឋខ្មែរ ចំពោះការដឹកនាំរបស់បក្ស និងរដ្ឋវៀតណាម ព្រមទាំងជំរុញស្មារតីពឹងផ្អែកលើខ្លួនឯង ភាពម្ចាស់ការ និងការប្រកួតប្រជែងក្នុងការងារ ផលិតកម្ម និងការកសាងជីវភាពឱ្យបានសម្បូរបែបនិងដោយស្របច្បាប់។
ជនជាតិខ្មែរដែលរស់នៅលើទឹកដីវៀតណាម គឺជាផ្នែកមួយដែលមិនអាចបំបែកចេញពីមហាសាមគ្គីរបស់ជនជាតិវៀតណាម។ បច្ចុប្បន្នជនជាតិខ្មែររស់នៅប្រមូលផ្តុំភាគច្រើននៅក្រុងកឹនធើ អានយ៉ាង វិញឡុង កាម៉ៅ ជាដើម ហើយក្នុងនោះ ក្រុងកឹនធើ គឺជាតំបន់ដែលមានប្រជាជនខ្មែររស់នៅច្រើនជាងគេ។
ក្នុងរយៈពេលកន្លងមក បក្ស និងរដ្ឋវៀតណាម បានអនុវត្តគោលការណ៍ណែនាំ ព្រមទាំងគោលនយោបាយអាទិភាពជាច្រើនដើម្បីលើកកម្ពស់ជីវភាពរស់នៅឱ្យប្រជាពលរដ្ឋខ្មែរ។ ប្រព័ន្ធហេដ្ឋារចនាសម្ព័ន្ធនៅតំបន់ដែលមានជនជាតិខ្មែររស់នៅ ត្រូវបានវិនិយោគកែលម្អឱ្យកាន់តែសមស្រប ដោយមានការសាងសង់ផ្លូវជនបទ បណ្តាញអគ្គិសនីជាតិ សាលារៀន មណ្ឌលសុខភាព និងប្រព័ន្ធធារាសាស្ត្រជាច្រើន។ កម្មវិធីកាត់បន្ថយភាពក្រីក្រ ការគាំទ្រលំនៅឋាន បណ្តុះបណ្តាលវិជ្ជាជីវៈ ផ្តល់ប្រាក់កម្ចីអនុគ្រោះ និងគាំទ្រផលិតកម្ម បានជួយឱ្យគ្រួសារខ្មែរជាច្រើនអាចរីកចម្រើន រួចផុតពីភាពក្រីក្រ និងមានជីវភាពស្ថិរភាពជាបន្តបន្ទាប់។
គោលនយោបាយអភិវឌ្ឍន៍ពិសេសសម្រាប់ជនជាតិខ្មែរ ដូចជា សារាចរណែនាំលេខ 19-CT/TW ចុះថ្ងៃទី១០ ខែមករា ឆ្នាំ២០១៨ របស់លេខាធិការដ្ឋានមជ្ឈិមបក្ស ស្តីពី “ការពង្រឹងការងារនៅតំបន់ជនជាតិខ្មែរ ក្នុងស្ថានភាពថ្មី” បានប្រមូលផ្តុំធនធានគ្រប់ផ្នែក ដើម្បីវិនិយោគនិងអភិវឌ្ឍន៍ និងអនុវត្តគម្រោងអភិវឌ្ឍន៍សេដ្ឋកិច្ច-សង្គម យ៉ាងទូលំទូលាយ នៅតាមឃុំជាប់ព្រំដែន ជាពិសេសតំបន់ដែលមានជនជាតិខ្មែររស់នៅច្រើន។
លោក ថាច់ បុង ជាបុគ្គលមានឈ្មោះបោះសម្លេងក្នុងសហគមន៍ខ្មែរ (តំណាងភូមិត្រាបេត ឃុំង៉ុកតូ ក្រុងកឹនធើ) បានឱ្យដឹងថា ប្រព័ន្ធហេដ្ឋារចនាសម្ព័ន្ធដឹកជញ្ជូនមានភាពងាយស្រួលជាងមុន សម្រាប់ការធ្វើដំណើរ និងអភិវឌ្ឍសេដ្ឋកិច្ចកសិកម្ម។ លោកបានបង្ហាញពីភាពរីករាយថា ពីមុនគ្រាន់តែជាមាត់ប្រឡាយ បច្ចុប្បន្នត្រូវបានសាងសង់ជាផ្លូវធំទូលាយ ស្អាត និងភ្ជាប់ភូមិ ស្រុក ទៅទីប្រជុំជន ឃុំ-សង្កាត់ ព្រមទាំងភ្ជាប់ទៅគម្រោងហេដ្ឋារចនាសម្ព័ន្ធធំៗផ្សេងទៀត។ ទន្ទឹមនឹងនេះ គ្រួសារខ្មែរមួយចំនួនក៏ទទួលបានការគាំទ្រជួយសាងសង់ផ្ទះថ្មី និងបង្កើតការងារ ដែលរួមចំណែកជំរុញការអភិវឌ្ឍសេដ្ឋកិច្ច-សង្គម និងលើកកម្ពស់ជីវភាពរបស់ពួកគាត់ផងដែរ។
ជាមួយគ្នានេះ វិស័យកសិកម្មនៅតំបន់ដែលមានជនជាតិខ្មែររស់នៅច្រើន ក៏មានការរីកចម្រើនជាវិជ្ជមានផងដែរ។ ប្រជាពលរដ្ឋខ្មែរត្រូវបានណែនាំឱ្យអនុវត្តវិទ្យាសាស្ត្រ និងបច្ចេកទេសក្នុងផលិតកម្ម ផ្លាស់ប្តូរការដាំដំណាំ និងចិញ្ចឹមសត្វឱ្យសមស្របនឹងលក្ខខណ្ឌធម្មជាតិ និងអភិវឌ្ឍគំរូសេដ្ឋកិច្ចមានប្រសិទ្ធភាព ដូចជា ការដាំស្រូវគុណភាពខ្ពស់ វារីវប្បកម្ម ចិញ្ចឹមសត្វ អភិវឌ្ឍទេសចរណ៍សហគមន៍ និងសិប្បកម្មប្រពៃណី។កត្តាទាំងនេះហើយបាននាំឱ្យ ចំណូល និងកម្រិតជីវភាពរស់នៅរបស់គ្រួសារខ្មែរជាច្រើន ត្រូវបានកែលម្អជាបន្តបន្ទាប់។
លោក ថាច់ ចាញ់ សូន ក៏ជាបុគ្គលម្នាក់ដែលមានឈ្មោះបោះសម្លេងនៅក្នុងសហគមន៍ខ្មែរ នៅភូមិតាន់ហៀប A ឃុំអុកអែវ ខេត្តអានយ៉ាង បានបង្ហាញជំនឿចិត្តយ៉ាងជ្រាលជ្រៅចំពោះគោលនយោបាយ និងវិធានការរបស់បក្ស និងរដ្ឋវៀតណាម សម្រាប់តំបន់ជនជាតិខ្មែរ។ តាមលោក ការយកចិត្តទុកដាក់នេះ បង្ហាញយ៉ាងច្បាស់តាមរយៈគោលនយោបាយជាក់ស្តែង ដូចជា ការកាត់បន្ថយភាពក្រីក្រ ផ្តល់ប្រាក់កម្ចីសម្រាប់ចិញ្ចឹមសត្វ ណែនាំបច្ចេកទេសកសិកម្ម និងជាពិសេស គោលនយោបាយធានារ៉ាប់រងសុខភាព។ “ប័ណ្ណធានារ៉ាប់រងសុខភាព ពិតជាក្លាយជាទូកសង្គ្រោះជីវិតសម្រាប់គ្រួសារក្រីក្រ ជួយឱ្យពួកគេអាចទទួលបានសេវាសុខាភិបាលប្រកបដោយគុណភាព ដោយមិនបារម្ភអំពីបន្ទុកសេដ្ឋកិច្ច”។
មិនត្រឹមតែយកចិត្តទុកដាក់លើផ្នែកសេដ្ឋកិច្ចប៉ុណ្ណោះទេ រដ្ឋក៏បានផ្តោតសំខាន់លើការលើកកម្ពស់ជីវភាពផ្លូវចិត្ត និងការអភិរក្សអត្តសញ្ញាណវប្បធម៌របស់ជនជាតិខ្មែរ។ តម្លៃវប្បធម៌ប្រពៃណីដូចជា បុណ្យចូលឆ្នាំថ្មី បុណ្យសែនដូនតា បុណ្យអកអំបុក ពិធីបុណ្យភ្ជុំបិណ្ឌ សិល្បៈរបាំប្រជាប្រិយ និងពិធីប្រពៃណីផ្សេងៗ ត្រូវបានថែរក្សា និងលើកកម្ពស់។ វត្តខ្មែរជាច្រើនត្រូវបានជួសជុល និងកែលម្អ ឱ្យក្លាយជាមជ្ឈមណ្ឌលសម្រាប់សកម្មភាពវប្បធម៌ ជំនឿសាសនា និងការអប់រំសហគមន៍ សម្រាប់ប្រជាពលរដ្ឋខ្មែរ ដើម្បីធានាសិទ្ធិសេរីភាពខាងជំនឿ និងទប់ស្កាត់ការប្រើប្រាស់ ឬបោកបញ្ឆោតពីក្រុមជនអាក្រក់ ដែលអាចនាំទៅដល់អំពើខុសច្បាប់។
ក្រៅពីនេះ ក្នុងព្រឹត្តិការណ៍សហគមន៍ខ្មែរ ក៏មានការតាំងបង្ហាញរូបភាព និងផលិតផលវប្បធម៌ប្រពៃណីខ្មែរ ព្រមទាំងសកម្មភាពផ្សព្វផ្សាយទេសចរណ៍ក្នុងតំបន់ ដើម្បីបង្កើតឱកាសឱ្យប្រជាពលរដ្ឋ និងភ្ញៀវអាចស្វែងយល់កាន់តែស៊ីជម្រៅអំពីតម្លៃបេតិកភណ្ឌវប្បធម៌ខ្មែរ។
ព្រះចៅអធិការ លី ក្វាង ឡុង ព្រះចៅអធិការវត្តកាយ៉ា (ខេត្តកាម៉ៅ) បានមានសង្ឃដីកាថា ក្នុងឱកាសបុណ្យទានរបស់ប្រជាពលរដ្ឋខ្មែរភាគនៅខាងត្បូង វត្តតែងរៀបចំការប្រណាំងទូកងខ្នាតតូចតាមប្រពៃណី រួមជាមួយការតាំងបង្ហាញរូបភាព និងផលិតផលខ្មែរ។ នេះគឺជាសកម្មភាពសម្រាប់ថែរក្សា និងលើកកម្ពស់វប្បធម៌ក្នុងតំបន់ ព្រមទាំងបម្រើដល់ការអភិវឌ្ឍទេសចរណ៍ផងដែរ។
ការងារអប់រំ និងបណ្តុះបណ្តាល ក៏ត្រូវបានយកចិត្តទុកដាក់យ៉ាងខ្លាំង។ សាលាបឋម និងមធ្យមសិក្សាសម្រាប់ជនជាតិភាគតិចជាច្រើន ត្រូវបានសាងសង់ឡើង ដើម្បីបង្កលក្ខណៈងាយស្រួលដល់កូនចៅជនជាតិខ្មែរ ក្នុងការសិក្សា។ ការបង្រៀន និងរៀនភាសាខ្មែរ ត្រូវបានរក្សាទុកនៅតាមតំបន់ជាច្រើន ដែលរួមចំណែកដល់ការថែរក្សាភាសា និងអក្សរសាស្ត្រជាតិខ្មែរ។ ទន្ទឹមនឹងនេះ និស្សិត បញ្ញវន្ត និងមន្ត្រីជនជាតិខ្មែរជាច្រើន មានភាពរីកចម្រើន និងកាន់តំណែងសំខាន់ៗក្នុងស្ថាប័ន្តរដ្ឋ និងអង្គការនយោបាយ-សង្គម ដែលរួមចំណែកយ៉ាងសកម្មក្នុងការអភិវឌ្ឍតំបន់ និងប្រទេសជាតិ។
ស្របពេលជាមួយគ្នានេះ ការថែទាំសុខភាពប្រជាពលរដ្ឋ ក៏ត្រូវបានពង្រឹងតាមរយៈការពង្រីកបណ្តាញសុខាភិបាលដល់មូលដ្ឋានសម្រាប់គ្រួសារក្រីក្រ និងគាំទ្រការពិនិត្យព្យាបាលជំងឺសម្រាប់ប្រជាពលរដ្ឋនៅតំបន់ដាច់ស្រយាល។ សកម្មភាពផ្សព្វផ្សាយច្បាប់ ការលើកកម្ពស់ការយល់ដឹងពីសង្គម ការបង្ការអំពើអបាយមុខ និងការកសាងជីវភាពវប្បធម៌ថ្មី ក៏ត្រូវបានអនុវត្តជាប្រចាំផងដែរ ដើម្បីលើកកម្ពស់គុណភាពជីវភាពរបស់ប្រជាពលរដ្ឋខ្មែរ។
ការយកចិត្តទុកដាក់ខ្ពស់ទាំងផ្នែកសម្ភារ: និងស្មាតីចំពោះជនជាតិខ្មែរ មិនត្រឹមតែជាកាតព្វកិច្ចរបស់ បក្ស និងរដ្ឋវៀតណាមប៉ុណ្ណោះទេ ប៉ុន្តែថែមទាំងជាភារកិច្ចរួមរបស់សង្គមទាំងមូល។ តាមរយៈការយកចិត្តទុកដាក់នេះ បានជួយឱ្យជីវភាពរស់នៅ សកម្មភាពសាសនា និងជំនឿរបស់ប្រជាពលរដ្ឋខ្មែរ ត្រូវបានលើកកម្ពស់ឱ្យកាន់តែប្រសើរឡើង និងបានធ្វើឱ្យប្រជាពលរដ្ឋកាន់តែមានជំនឿទុកចិត្តដ៏រឹងមាំបន្ថែមទៀតចំពោះបក្ស និងរដ្ឋវៀតណាម ហើយបានរួមចំណែកកសាងប្រទេសវៀតណាមមួយ ដែលមានការអភិវឌ្ឍ សាមគ្គីភាព ស្ថិរភាព និងមានអត្តសញ្ញាណវប្បធម៌សម្បូបែបក្នុងយុគសម័យថ្មី៕ អត្ថបទសហការ
ចែករំលែកព័តមាននេះ