រាជធានីភ្នំពេញ ៖ នៅថ្ងៃទី ១៧ ខែកញ្ញា ឆ្នាំ ២០២៥ នេះ កិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា លើកចុងក្រោយ…
រាជធានីភ្នំពេញ ៖ នៅថ្ងៃទី ១៧ ខែកញ្ញា ឆ្នាំ ២០២៥ នេះ កិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា លើកចុងក្រោយ ត្រូវបានសម្រេចក្នុងកំណត់ប្រាក់ឈ្នួលអប្បបរមា ចំនួន ២១០ ដុល្លារអាមេរិក សម្រាប់កម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ ២០២៦ ។
ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា ៖ «ជាការសម្រេចសម្រាប់ឆ្នាំ ២០២៦ ប្រាក់ឈ្នួលអប្បបរមាត្រូវបានដំឡើងពី ២០៨ ដុល្លារ ដល់ ២១០ ដុល្លារសម្រាប់បងប្អូនកម្មករ-កម្មការិនី ផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប ខណៈដែលគិតត្រឹមថ្ងៃទី ១៦ ខែកញ្ញា ឆ្នាំ ២០២៥ នេះ ប្រទេសក្នុងតំបន់អាស៊ាន ឬអាស៊ី ដែលជាប្រទេសគូប្រជែងរបស់កម្ពុជា មិនទាន់បាននិយាយពីការតំឡើងប្រាក់ឈ្នួលអប្បបរមានៅឡើយនោះទេ ។ តាមដែលយើងបានដឹង និងការវិភាគរបស់គេ គេប្រហែលជាទាល់តែខែមីនា ឆ្នាំក្រោយទើបប្រទេសផ្សេងទៀតមួយចំនួនក្នុងអាស៊ីអាចនឹងគិតពិចារណារឿងនឹង ។ និយាយរួមប្រទេសដទៃគេកំពុងរង់ចាំមើលស្ថានភាពពាណិជ្ជកម្ម សេដ្ឋកិច្ចពិភពលោកសិន បានគេអាចកំណត់ប្រាក់ឈ្នួលរបស់គេឡើងវិញ» ។
ឯកឧត្តម ហេង សួរ បន្តថា សរុបរោងចក្រ សហគ្រាស ក្នុងវិស័យកាត់ដេរយើងមានចំនួន ១៦០៥ រោងចក្រ ហើយកម្មករនយោជិកប្រមាណជា ៩៥ម៉ឺននាក់ ប៉ុន្តែឥឡូវយើងកំពុងធ្វើបច្ចុប្បន្នភាពបន្ថែម ដោយសារមានកម្មករជិត ២០ម៉ឺននាក់ថ្មីផ្សេងទៀត ដែលទើបតែត្រូវបានបញ្ចូលទៅក្នុងទីផ្សារការងារនៅក្នុងផ្នែកវិស័យកាត់ដេរនេះ ។ ជារួមយើងអាចប៉ាន់ប្រមាណបានថា ជិត ៩៧ម៉ឺននាក់ ដែលកំពុងធ្វើការក្នុងនោះបូករួមទាំងជាង ២០ម៉ឺនាក់ ដែលបងប្អូនយើងទើបតែមកពីថៃផងដែរ ។
លោក គឹម ចាន់សំណាង ប្រធានសមាភាពសិទ្ធិកម្មករកម្ពុជា ឱ្យដឹងដែរថា ៖ «អ្វីដែលជាការសម្រេចរួមចុងក្រោយនេះសហជីពបានពិនិត្យឃើញនូវអ្វីដែលជាផលប៉ះពាល់ទៅនឹងស្ថានភាពទាំងនៅក្នុងប្រទេសកម្ពុជា ក៏ដូចជាក្នុងសកលលោក ដូចនេះយើងបានពិភាក្សារវាងសហជីព និងនិយោជក និងត្រីភាគីផងដែរ ដោយយើងយល់ និងទទួលស្គាល់នូវផលប៉ះពាល់ក្នុងស្ថានភាពបច្ចុប្បន្ន ។ ពួកយើងបានសម្រេចថា ទុកតួនាទីឱ្យរាជរដ្ឋាភិបាលជាអ្នកសម្រេច ជាលទ្ធផល សម្តេចមហាបវរធិបតី ហ៊ុន ម៉ាណែត ក៏បានសម្រេចថា នឹងផ្តល់ជូន ២ដុល្លារ បន្ថែមលើប្រាក់ឈ្នួលដែលមានស្រាប់ ដូចនេះប្រាក់ឈ្នួលអប្បបរមាត្រូវបានដំឡើងពី ២០៨ ដុល្លារ ដល់ ២១០ ដុល្លារ» ។
លោក គឹម ចាន់សំណាង បានបន្តថា នេះជាលទ្ធផលមួយដែលល្អ ជាលទ្ធផលមួយដើម្បីយើងរក្សានូវកម្លាំង និងការងារបងប្អូនកម្មករ ក៏ដូចជាការស្រូបទាញវិស័យផ្សេងៗទៀតនូវអ្នកវិនិយោគមួយចំនួនដែលកំពុងមានបញ្ហា ដូចនេះជាឱកាសរបស់កម្ពុជាមួយដែរ ដើម្បីផ្តល់ជូនការងារឱ្យបងប្អូនដែលបានវិលត្រឡប់មកពីប្រទេសថៃ ប្រមាណជាជាង ៩០ម៉ឺននាក់» ៕ អត្ថបទសហការ
ចែករំលែកព័តមាននេះ