រាជធានីភ្នំពេញ ៖ នារសៀលថ្ងៃអង្ការ ១០ កើត ខែភទ្របទ ឆ្នាំម្សាញ់ សប្តស័ក ពុទ្ធសករាជ ២៥៦៩…
រាជធានីភ្នំពេញ ៖ នារសៀលថ្ងៃអង្ការ ១០ កើត ខែភទ្របទ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី ២ ខែកញ្ញា ឆ្នាំ ២០២៥ ក្រុមហ៊ុនធានារ៉ាប់រងអាយុជីវិត ទីតាន ស្តូន ឡាយហ្វ៍ អ៉ិនសួរេន និង គ្រឹះស្ថានមីក្រូហិរញ្ញវត្ថុ ប្រាយម៍ អិមអេហ្វ អិលធីឌី បានរៀបចំកម្មវិធីចុះហត្ថលេខាលើអនុស្សរណៈយោគយល់គ្នា ។ នៅក្នុងកម្មវិធីដ៏មហោឡារិកនោះ យើងសង្កេតឃើញថា មានការចូលរួមពីសំណាក់ថ្នាក់ដឹកនាំ និងបុគ្គលិកគ្រប់ជាន់ថ្នាក់របស់ក្រុមហ៊ុនទាំងពីរ ។
សូមគូសបញ្ជាក់ផងដែរថា ក្រុមហ៊ុន ធានារ៉ាប់រងអាយុជីវិត ទីតាន ស្តូន ឡាយហ្វ៍ អ៉ិនសួរេន បានទទួលអាជ្ញាប័ណ្ណអាជីវកម្ម ធានារ៉ាប់រងអាយុជីវិតពី និយ័តករធានារ៉ាប់រងកម្ពុជា នៅថ្ងៃទី ២៦ ខែកុម្ភៈ ក្នុងឆ្នាំ ២០២០ ដែលគិតមកទល់ពេលនេះមានប្រតិបត្តិការរយៈពេល ៥ ឆ្នាំ មកហើយ និងបានចូលរួមយ៉ាងសកម្ម ក្នុងការផ្តល់សេវាធានារ៉ាបរងអាយុជីវិត រួមទាំងលើកកម្ពស់ចំណេះដឹងអំពីអត្ថប្រយោជន៍នៃការធានារ៉ាប់រង ជូនប្រជាជនកម្ពុជាផងដែរ ។ បច្ចុប្បន្នក្រុមហ៊ុនធានារ៉ាប់រងអាយុជីវិត ទីតាន ស្តូន ឡាយហ្វ៍ អ៉ិនសួរេន បាននិងកំពុងបង្កើតផលិតផលមួយចំនួនបន្ថែមទៀត ដើម្បីឆ្លើយតបទៅនឹង តម្រូវការទីផ្សារដែលមានភាពបត់បែន និងងាយស្រួលដល់ដៃគូរអាជីវកម្ម ក៏ដូចជាអតិថិជនផងដែរ ។
គ្រឹះស្ថានមីក្រូហិរញ្ញវិត្ថុ ប្រាយម៍ អិមអេហ្វ អិលធីឌី បានចុះបញ្ជីការជាមួយក្រសួងពាណិជ្ជកម្មក្នុង ខែសីហា ឆ្នាំ ២០១០ និងទទួលបានអាជ្ញាប័ណ្ណពីធានាគារជាតិជាគ្រឹះស្ថានមីក្រូហិរញ្ញវត្ថុក្នុង ខែធ្នូ ឆ្នាំ២០១០ ។ ដើម្បីផ្តល់គុណតម្លៃបន្ថែមជូនអតិថិជន គ្រឹះស្ថានមីក្រូហិរញ្ញវត្ថុ ប្រាយម៍ អិមអេហ្វ អិលធីឌី បានសម្រេចជ្រើសរើសផលិតផល ក្រុមហ៊ុនធានារ៉ាប់រងអាយុជីវិត ទីតាន ស្តូន ឡាយហ្វ៍ អ៉ិនសួរេន ក្នុងការផ្តល់ការធានារ៉ាប់រងដោយឥតគិតថ្លៃ ជូនអតិថិជនរបស់ខ្លួន ។
កិច្ចសហការនេះ ក៍បានបង្ហាញអោយឃើញអំពីវឌ្ឃនៈ ភាពវិស័យធានារ៉ាប់រង ក្នុងប្រទេសកម្ពុជាផងដែរ ។ ក្រុមហ៊ុនធានារ៉ាប់រងអាយុជីវិត ទីតាន ស្តូន ឡាយហ្វ៍ អ៉ិនសួរេន ក៏បានប្តេជ្ញាផ្តល់សេវាកម្មធានារ៉ាប់រងជូនដល់ប្រជាជនកម្ពុជា ប្រកបដោយភាពទទួលខុសត្រូវខ្ពស់ និងមានតម្លាភាព ៕ អត្ថបទសហការ
ចែករំលែកព័តមាននេះ