រាជធានីភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី ២០ ខែសីហា ឆ្នាំ ២០២៥ នេះ…
រាជធានីភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី ២០ ខែសីហា ឆ្នាំ ២០២៥ នេះ បានចាប់ផ្តើមផ្តល់ព័ត៌មានឱកាសការងាររាប់សិបម៉ឺនកន្លែង នៅតាមបណ្តាគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ និងសាខាបេឡាជិតសន្តិសុខសង្គម (ប.ស.ស.) ទូទាំងប្រទេស ដើម្បីបង្កភាពងាយស្រួលបន្ថែមទៀតជូនដល់ពលករខ្មែរទើបត្រឡប់មកពីប្រទេសថៃ ដែលមានបំណងស្វែងរកការងារធ្វើ ។
ការផ្តល់ព័ត៌មានឱកាសការងារបន្ថែមទៀត នៅតាមគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ និងសាខាបេឡាជិតសន្តិសុខសង្គម (ប.ស.ស.) នៅទូទាំងប្រទេសនេះ ធ្វើឡើងបន្ទាប់ពីមានការណែនាំដ៏ខ្ពង់ខ្ពស់របស់ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី១៣ ខែសីហា អំពីការសហការផ្តល់ព័ត៌មានឳកាសការងារ ជូនដល់បងប្អូនពលករខ្មែរដែលទើបត្រឡប់មកពីប្រទេសថៃ ។
ឯកឧត្តមបណ្ឌិត យ៉ោក សុទ្ធី នាយកវិទ្យាស្ថានជាតិបណ្តុះបណ្តាលបច្ចេកទេស បានឱ្យដឹងថា តាមរយៈការផ្តល់ព័ត៌មានឱកាសការងារនេះ វិទ្យាស្ថានជាតិបណ្តុះបណ្តាលបច្ចេកទេស បានបង្កើតស្នាក់ការដើម្បីផ្តល់ព័ត៌មានឱកាសការងារជូនដល់សាធារណជន ជាពិសេស ពលករខ្មែរទើបត្រឡប់មកពីប្រទេសថៃ។ នៅស្នាក់ការផ្ទាល់ អ្នកចូលរួមអាចដាក់ពាក្យសម្ភាសការងារភ្លាមៗ ព្រមទាំងបានយល់ដឹងពីរបៀបប្រើប្រាស់ Telegram bot និងការទំនាក់ទំនងទៅលេខ ១២៩៧ផងដែរ ។
ឯកឧត្តមថ្លែងថា ៖«នេះជាឱកាសដ៏ល្អមួយសម្រាប់ប្រជាពលរដ្ឋ ដែលត្រឡប់មកពីប្រទេសថៃវិញគាត់រកការងារធ្វើ។ យើងមានវេទិកាការងារនេះ ស្រួលជួយសម្រួលការងារដល់គាត់ យើងជួយបំពេញការស្វែងរកការងារដល់គាត់ នៅក្នុងហ្នឹងយើងជួយបង្ហាញរបៀបប្រើ telegram bot ក៏ដូចជាការខលទៅ ១២៩៧» ។
សូមបញ្ជាក់ថា តាមការណែនាំរបស់ឯកឧត្តមរដ្ឋមន្ត្រី ហេង សួរ ចាប់ពីថ្ងៃទី ២០ ខែសីហា ឆ្នាំ ២០២៥ នេះតទៅ នៅគ្រប់រាជធានី ខេត្តទាំង២៥ មានវេទិកាការងារយ៉ាងតិចចំនួន ២កន្លែង គឺទី ១. នៅសាខាបេឡាជាតិសន្តិសុខសង្គម និងទី ២. នៅវិទ្យាស្ថានពហុបច្ចេកទេស/មជ្ឈមណ្ឌលបណ្ដុះបណ្ដាល វិជ្ជាជីវៈ នៅតាមទីរួមខេត្ត ។ ដោយឡែក នៅរាជធានីភ្នំពេញ មានចំនួន ៤កន្លែង គឺទី ១. នៅទីស្ដីការក្រសួងការងារ និងបណ្តុះបណ្តាលវិជ្ជាជីវៈ ទី ២. នៅវិទ្យាស្ថានជាតិពហុបច្ចេកទេសកម្ពុជា (NPIC) ទី ៣. នៅវិទ្យាស្ថានជាតិបណ្ដុះបណ្តាលបច្ចេកទេស (NTTI) និងទី ៤ នៅវិទ្យាស្ថានជាតិពាណិជ្ជសាស្ត្រ (NIB) ៕ អត្ថបទសហការ
ចែករំលែកព័តមាននេះ