រាជធានីភ្នំពេញ ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងជាប្រធានក្រុមប្រឹក្សាជាតិប្រាក់ឈ្នួលអប្បបរមា បានអញ្ជើញតំណាងអង្គការវិជ្ជាជីវៈ របស់និយោជក…
រាជធានីភ្នំពេញ ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងជាប្រធានក្រុមប្រឹក្សាជាតិប្រាក់ឈ្នួលអប្បបរមា បានអញ្ជើញតំណាងអង្គការវិជ្ជាជីវៈ របស់និយោជក តំណាងអង្គការវិជ្ជាជីវៈ របស់កម្មករនិយោជិត និងអ្នកសារព័ត៌មានទៅទស្សនាបន្ទប់ផ្តល់ព័ត៌មាន ២៤ម៉ោង តាមរយៈលេខទូរសព្ទ Hotline 1297 ដែលបម្រើដល់ការស្វែងរកការងារធ្វើរបស់បងប្អូនប្រជាពលរដ្ឋ ជាពិសេសពលករខ្មែរទើបមកពីប្រទេសថៃ ។
យោងតាមការបង្ហាញរបស់ ឯកឧត្តម ហេង សួរ បានឱ្យដឹងថា ៖ «យើងយកអ្នកចុះឈ្មោះឱ្យមកផ្គូរផ្គងជាមួយរោចក្រ សហគ្រាស ផ្សេងៗ ប្រសិនមើលទៅប្រហាក់ប្រហែលគ្នាហើយ យើងណាត់គាត់សម្ភាស ឬក៏ឱ្យគាត់សម្ភាសតាមទូរស័ព្ទ អ៉ីចឹងងាយស្រួលដល់បងប្អូនយើង មិនចាំបាច់ទៅដល់រោងចក្រ ដូចនេះរោងចក្រគេសម្ភាសតាមទូរស័ព្ទ បើត្រូវគឺទៅរោចក្រចូលធ្វើការតែម្តង ។ យើងមានបងប្អូនយើងចុះឈ្មោះ រាប់ម៉ឺននាក់ក្នុងសប្តាហ៍ៗ ។ ដើម្បីដោះស្រាយការងារជូនពលករយើង ឱ្យបានកាន់តែលឿន អ៉ីចឹងយើងត្រូវការមន្ត្រី និងយុវជនស្ម័គ្រចិត្ត ដើម្បីជួយផ្គូរផ្គងគ្នាក៏ច្រើនដែរ គឺជួយរវាងអ្នករកការងារ និងអ្នកផ្តល់ការងារ» ។
ឯកឧត្តម ហេង សួរ បន្តថា ឈ្មោះដែលបញ្ចូនចេញទៅឱ្យរោងចក្រខ្ទង់ម៉ឺននាក់ហើយ ជាធម្មតាឧទាហរណ៍ថា យើងបញ្ចូនឈ្មោះទៅ ១០០នាក់ អាចមានលទ្ធភាពជាប់ភ្លាមៗ យ៉ាងហោចណាស់ក៏ ៥០នាក់ដែរ ហើយអ្នកដែលមិនទាន់ជាប់នោះគឺ យ៉ាងយូរត្រូវចាំត្រឹម ១០ថ្ងៃ ។ ជាទូទៅយើងបញ្ចូនឈ្មោះទៅតាមរោងចក្ រ(ច្រើនកន្លែង) ហើយប្រសិនរោងចក្រមួយមិនជាប់ យើងរកមួយទៀត ។ បន្ថែមពីនេះ ឯកឧត្តម ហេង សួរ បញ្ជាក់ថា ឱកាសការងារមានមិនតិចជាង ២០ម៉ឺននាក់ទេ ក្នុងមួយអាទិត្យ ពីមុនយើងរកការងារឱ្យបងប្អូនយើង ១អាទិត្យបាន ២ម៉ឺន តែបច្ចុប្បន្ននេះ យើងរកបានប្រហែលជាង ៤ម៉ឺននាក់ក្នុងមួយអាទិត្យ ។
សូមជម្រាបផងដែរថា ដំណើរទស្សនកិច្ចរបស់តំណាងអង្គការវិជ្ជាជីវៈ របស់និយោជក តំណាងអង្គការវិជ្ជាជីវៈ របស់កម្មករនិយោជិត និងអ្នកសារព័ត៌មាន ធ្វើឡើងក្រោយពីកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមាអាណត្តិទី ៤ (២០២៥-២០២៦) លើកដំបូង ត្រូវបានបញ្ចប់ នាល្ងាចថ្ងៃទី ២០ ខែសីហា ឆ្នាំ ២០២៥ ៕ អត្ថបទសហការ
ចែករំលែកព័តមាននេះ