លោកជំទាវ ជា សិរី សាកសួសុខទុក្ខប្រជាពលរដ្ឋមកព្យាបាលជំងឺភ្នែក របស់ក្រុមគ្រូពេទ្យមកពីប្រទេសអូស្ត្រាលី
រាជធានីភ្នំពេញ ៖ កាលពីទីថ្ងៃ ២០ ខែសីហាឆ្នាំ ២០២៥ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា …
រាជធានីភ្នំពេញ ៖ កាលពីទីថ្ងៃ ២០ ខែសីហាឆ្នាំ ២០២៥ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា រួម និងលោកវេជ្ជបណ្ឌិត ងី ម៉េង បានអញ្ជើញសាកសួសុខទុក្ខប្រជាពលរដ្ឋមកព្យាបាលជំងឺភ្នែកដែលបាននិងកំពុងតែបន្តពិនិត្យនិងព្យាបាលពីក្រុមគ្រូពេទ្យមនុស្សធម៌មកពីប្រទេសអូស្ត្រាលី តាមរយៈអង្គការ AHHA (Australian Health Humanitarian Aid) មូលនិធិចក្ខុខ្មែរ (Khmer Sight Foundation)នៅមន្ទីរពេទ្យមិត្តភាពខ្មែរ សូវៀត ។
តាមការបញ្ជាក់ពីមន្ត្រីសម្របសម្រួលការងាររបស់ធនាគារជាតិនៃកម្ពុជា បានឲ្យដឹងថា ប្រជាពលរដ្ឋមានជំងឺភ្នែកដែលមកទទួលការពិនិត្យនិងព្យាបាលជម្ងឺភ្នែកលើកនេះគឺមកពីស្រុកសន្ទុកខេត្តកំពង់ធំ ប្រមាណជា ៣០០នាក់ ។ ហើយសម្រាប់ការពិនិត្យនិងព្យាបាលជំងឺភ្នែកឥតគិតថ្លៃពីក្រុមគ្រូពេទ្យមនុស្សធម៌មកពីប្រទេសអូស្ត្រាលី លើកនេះក៏ដូចលើកមុនៗដែរ គឺទទួលការជួយឧបត្ថម្ភ និងទំនុបបម្រុងដូចជាការធ្វើដំណើរការស្នាក់នៅ និងការហូបទាំងពីសំណាក់លោកជំទាវ ជា សិរី ។
សូមបញ្ជាក់ជូនថា សកម្មភាពមនុស្សធម៌នេះបានរៀបចំធ្វើការពិនិត្យនិងព្យាបាលជូនចាប់តាំងពីថ្ងៃទី ១៦ ខែសីហា ឆ្នាំ ២០២៥ មកម្លេះនៅមន្ទីរពេទ្យមិត្តភាពខ្មែរ សូវៀត ។ ជារួមសកម្មភាពកម្មវិធីពិនិត្យ និងព្យាបាលជំងឺភ្នែកជូនប្រជាពលរដ្ឋដែលមានជម្ងឺភ្នែកលើកនេះគឺមានការចូលរួមពីក្រុមយុវជនស្ម័គ្រចិត្តរបស់ធនាគារជាតិ នៃកម្ពុជានិងកិច្ចសហការដោយការយកចិត្តទុកដាក់ពីយ៉ាងសកម្មពីក្រុមគ្រូពេទ្យមនុស្សធម៌មកពីប្រទេសអូស្ត្រាលី តាមរយៈអង្គការ AHHA (Australian Health Humanitarian Aid) មូលនិធិចក្ខុខ្មែរ (Khmer Sight Foundation) ក្នុងនោះក៏មានការរួមពីក្រុមបុគ្គលិករបស់ធនាគារឯកជនជាដៃគូផងដែរ ។
សូមរំលឹកជូនថា ប្រជាពលរដ្ឋដែលមកទទួលយកការព្យាបាលជម្ងឺភ្នែទាំងអស់សុទ្ធតែមានការវិនិច្ឆ័យយ៉ាងច្បាស់លាស់កាលពីអំឡុងនៃពិនិត្យកាលពីថ្ងៃទី ៨ ដល់ថ្ងៃទី ១០ ខែមិថុនា ឆ្នាំ ២០២៤នៅស្រុកសន្ទុកកន្លងទៅនេះ ។ ហើយនៅក្នុងអំឡុងពេលពិនិត្យ និងព្យាបាលនេះគឺទទួលបានការតាមដានដោយយកចិត្តទុកដាក់យ៉ាងហ្ម៉ត់ចត់បំផុតពីលោកជំទាវបណ្ឌិត ជា សិរី ក្នុងនោះរួមទាំងដូចជាការស្នាក់នៅនិងការឧបត្ថម្ភនានាផងដែររហូតដល់ការរួចរាល់ និងការវិលត្រឡប់ទៅផ្ទះវិញផងដែរមិនឲ្យប្រជាពលរដ្ឋយើងមានការបារម្ភនោះឡើយ ៕ អត្ថបទសហការ
ចែករំលែកព័តមាននេះ