រាជធានីភ្នំពេញ៖ ថ្ងៃទី២៤ ខែកក្កដា ឆ្នាំ២០២៥ ក្រុមហ៊ុន អ៊ីដតខូ (ខេមបូឌា) ខូ អិលធីឌី ដែលជាក្រុមហ៊ុនផ្តល់សេវាហេដ្ឋារចនាសម្ព័ន្ធទូរគមនាគមន៍មួយដែលឈានមុខគេ…
រាជធានីភ្នំពេញ៖ ថ្ងៃទី២៤ ខែកក្កដា ឆ្នាំ២០២៥ ក្រុមហ៊ុន អ៊ីដតខូ (ខេមបូឌា) ខូ អិលធីឌី ដែលជាក្រុមហ៊ុនផ្តល់សេវាហេដ្ឋារចនាសម្ព័ន្ធទូរគមនាគមន៍មួយដែលឈានមុខគេ បានបញ្ជាក់ជាថ្មីពីការប្តេជ្ញាចិត្តរបស់ខ្លួនក្នុងការអភិវឌ្ឍ សហគមន៍ និងការអប់រំ តាមរយៈគំនិតផ្តួចផ្តើមទំនួលខុសត្រូវសង្គមរបស់សាជីវកម្ម (CSR) ដ៏រឹងមាំនៅសាលាបឋមសិក្សាស្នំប្រាំពីរក្នុងខេត្តកំពត ។
នៅឆ្នាំនេះ បុគ្គលិក ក្រុមហ៊ុន អ៊ីដតខូ (ខេមបូឌា) ខូ អិលធីឌី ចំនួន ៥៣ នាក់ បានចូលរួមជាមួយបុគ្គលិក សាស្ត្រាចារ្យ លោកគ្រូ អ្នកគ្រូ និងសិស្សានុសិស្សជាច្រើននាក់ ដែលនេះជាផ្នែកមួយនៃគំនិតផ្តួចផ្តើមលើទំនួលខុសត្រូវសង្គមរបស់សាជីវកម្ម បានរួមចំណែក ៤២៤ ម៉ោង ជួសជុលដំបូល លាបពណ៌ និងកែលម្អអគារបណ្ណាល័យរបស់សាលា ក៏ដូចជា ដាំដើមឈើទាំងនៅក្នុង និងជុំវិញបរិវេណសាលាបឋមសិក្សាផងដែរ ។ កម្មវិធីនេះ ក៏មានសកម្មភាពបរិច្ចាគសៀវភៅសិក្សា ដល់សិស្សចំនួន ៥០៦ នាក់ និងលោកគ្រូអ្នកគ្រូចំនួន ១៥ នាក់ និងការផ្តល់វគ្គសិក្សាអំពីសុខភាព និងសុវត្ថិភាពការងារ (OHS) ផងដែរ ។
គំនិតផ្តួចផ្តើមឆ្នាំនេះ ធ្វើឡើងបន្ទាប់ពីការទទួលបានជោគជ័យនៃកម្មវិធី CSR ឆ្នាំ ២០២៤ របស់ក្រុមហ៊ុន អ៊ីដតខូ (ខេមបូឌា) ខូ អិលធីឌី នៅសាលាបឋមសិក្សាស្រែរនោងក្នុងខេត្តតាកែវ ដែលមានបុគ្គលិកចំនួន ៤៦ នាក់ រួមជាមួយសាស្ត្រាចារ្យ លោក
គ្រូអ្នកគ្រូ ចំនួន ២៨ នាក់ និងសិស្សានុសិស្សចំនួន ៦៧៨ នាក់ បានរួមចំណែកជាង ៣៦៨ ម៉ោង ដោយស្ម័គ្រចិត្តដើម្បីកែលម្អស្ថានភាពសាលារៀនតាមរយៈការគូរគំនូរ ដាំដើមឈើ និងការបរិច្ចាគសៀវភៅ សម្ភារៈការិយាល័យ និងជំនួយសង្រោះបឋម ។
លោក Ashok Muthu អគ្គនាយកក្រុមហ៊ុន អ៊ីដតខូ (ខេមបូឌា) ខូ អិលធីឌី ប្រចាំប្រទេសកម្ពុជា បានមានប្រសាសន៍ថា៖ «យើងមានមោទនភាពណាស់ក្នុងការបន្តជួយគាំទ្រកិច្ចខិតខំប្រឹងប្រែងលើទំនួលខុសត្រូវសង្គមរបស់សាជីវកម្ម (CSR) របស់យើងតាមរយៈកែលម្អបរិយាកាសសិក្សារបស់សាលារៀននៅប្រទេសកម្ពុជា។ គំនិតផ្តួចផ្តើមទាំងនេះ ធ្វើឡើងស្របតាមចក្ខុវិស័យរយៈពេលវែងរបស់យើង ដើម្បីបង្កើតអនាគតដ៏ល្អប្រសើរតាមរយៈការអប់រំ ការគ្រប់គ្រងបរិស្ថាន និងការចូលរួមអភិវឌ្ឍន៍សហគមន៍» ។
នាយិកាសាលាបឋមសិក្សាស្នំប្រាំពីរ លោកស្រី លី ស្រីមុំ មានប្រសាសន៍ថា៖ «យើងសូមថ្លែងអំរគុណយ៉ាងជ្រាលជ្រៅចំពោះក្រុមហ៊ុន អ៊ីដតខូ (ខេមបូឌា) ខូ អិលធីឌី សម្រាប់ការគាំទ្រដ៏សប្បុរសក្នុងការកែលម្អបរិស្ថានសាលារៀនរបស់យើង។ បណ្ណាល័យដែលបានជួសជុល និងលាបពណ៌ថ្មីៗ រួមជាមួយនឹងការបរិច្ចាគសៀវភៅ និងការដាំដើមឈើជាច្រើន បាននាំមកនូវថាមពល និងមោទនភាពថ្មីដល់សាលារបស់យើង» ។
ក្រុមហ៊ុន អ៊ីដតខូ (ខេមបូឌា) ខូ អិលធីឌី បន្តអនុវត្តកម្មវិធី CSR ដែលលើកស្ទួយការអភិវឌ្ឍសហគមន៍ លើកស្ទួយតម្លៃបរិស្ថានបៃតង និងគាំទ្រដល់ការអភិវឌ្ឍប្រកបដោយបរិយាបន្ននៅទូទាំងព្រះរាជាណាចក្រកម្ពុជា ដែលនេះជាផ្នែកមួយនៃបេសកកម្មប្រកបដោយ និរន្តរភាពដ៏ទូលំទូលាយរបស់ខ្លួន ។
កម្មវិធីនេះ គឺជាគំនិតផ្តួចផ្តើមមួយក្នុងចំណោមគំនិតផ្តួចផ្តើមជាច្រើនដែលក្រុមហ៊ុនបាននិងកំពុងអនុវត្ត ដើម្បីផ្តល់ផលប្រយោជន៍ត្រឡប់ទៅសង្គមវិញ និងជំរុញការថែរក្សាបរិស្ថាន ដើម្បីបង្កើតផលជាវិជ្ជមានតាមរយៈផលិតផល សេវាកម្ម និងសកម្មភាពនានារបស់ខ្លួន ។
យុទ្ធនាការឆ្នាំ ២០២៤ របស់ក្រុមហ៊ុន អ៊ីដតខូ (ខេមបូឌា) ខូ អិលធីឌី ដែលបានធ្វើឡើងតាមរយៈភាពជាដៃគូជាមួយគណៈគ្រប់គ្រងសាលា និងអាជ្ញាធរមូលដ្ឋាន ត្រូវបានទទួលស្គាល់ថាបានបណ្តុះស្មារតីមោទនភាព និងការជំរុញលើកទឹកចិត្តក្នុងចំណោមសិស្សានុសិស្ស សាស្ត្រាចារ្យ លោកគ្រូអ្នកគ្រូ និងប្រជាពលរដ្ឋជាច្រើននៅក្នុងសហគន៍ផងដែរ ។ ទាំងនេះ បានគូសបញ្ជាក់យ៉ាងច្បាស់អំពីស្មារតីរបស់ក្រុមហ៊ុន អ៊ីដតខូ (ខេមបូឌា) ខូ អិលធីឌី ដែលលើកឡើងថាការអប់រំ គឺជាកត្តាជំរុញដ៏សំខាន់នៃការផ្លាស់ប្តូរជាវិជ្ជមានរយៈពេលវែង ។
អំពី ក្រុមហ៊ុន EDOTCO Group
ក្រុមហ៊ុន EDOTCO Group បានបង្កើតឡើងនៅក្នុងឆ្នាំ ២០១២ គឺជាក្រុមហ៊ុន ដែលផ្តល់សេវាកម្មផ្នែកហេដ្ឋារចនា សម្ព័ន្ធទូរគមនាគមន៍ដំបូងគេនៅអាស៊ី ដែលផ្តល់សេវាកម្ម និងដំណោះស្រាយតាំងពីចាប់ផ្តើមរហូតដល់ បញ្ចប់លើសេវាកម្ម ហេដ្ឋារចនាសម្ព័ន្ធ ដូចជា តម្លើង ជួសជុល ថែទាំបង្គោលសេវាអង់តែន ៕ អត្ថបទសហការ
ចែករំលែកព័តមាននេះ