រាជធានីភ្នំពេញ ៖ ឯកឧត្តមរដ្ឋមន្ត្រី ហេង សួរ និងលោកជំទាវ រួមទាំងថ្នាក់ដឹកនាំ និងមន្ត្រីរាជការនៃក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី១…
រាជធានីភ្នំពេញ ៖ ឯកឧត្តមរដ្ឋមន្ត្រី ហេង សួរ និងលោកជំទាវ រួមទាំងថ្នាក់ដឹកនាំ និងមន្ត្រីរាជការនៃក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី១ ខែមិថុនា ឆ្នាំ២០២៥ នេះ បានបរិច្ចាគថវិកាចំនួន ១១១,១១១,១១១ រៀល ជូនមូលនិធិគន្ធបុប្ផាកម្ពុជា ដើម្បីគាំទ្រយុទ្ធនាការ «១ម៉ឺនរៀល ១ម៉ឺននាក់» ដែលផ្ដួចផ្ដើម និងដឹកនាំដោយលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសមូលនិធិគន្ធបុប្ផាកម្ពុជា ។
សូមបញ្ជាក់ថា យុទ្ធនាការ «១ម៉ឺនរៀល ១ម៉ឺននាក់» ដែលមានរយៈពេលពេញ ១ខែមិថុនានេះ គឺជាគំនិតផ្តួចផ្តើមដោយលោកជំទាវបណ្ឌិត ពេជ្រ ចន្ទមុន្នី ហ៊ុនម៉ាណែត ប្រធានកិត្តិយសមូលនិធិគន្ធបុប្ផាកម្ពុជា ដែលមានគោលបំណងជំរុញចលនាកៀរគរថវិកាសប្បុរសធម៌ ឱ្យកាន់តែផុសផុល និងសកម្មបន្ថែមទៀត ពីគ្រប់មជ្ឈដ្ឋានទាំងអស់ក្នុងមហាចលនាមនុស្សធម៌របស់ជាតិ និងក្នុងស្មារតី “ខែ្មរជួយខ្មែរ” ដើម្បីរួមគ្នាគឺនាំក្តីសង្ឃឹម និងភាពញញឹមដល់ទារក និងកុមារដែលត្រូវការសេវាពិនិត្យ និងព្យាបាល នៅមន្ទីរពេទ្យគន្ធបុប្ផា ដោយឥតគិតថ្លៃ ប្រកបដោយគុណភាព និងមិនមានការរើសអើង ។
ជាមួយគ្នានេះ ក្រសួងការងារ និងបណ្តុះបណ្តាលវិជ្ជាជីវៈ សូមអំពាវនាវ និងលើកទឹកចិត្តសប្បុរសជនក្នុងនិងក្រៅប្រទេសដែលមានបំណងចូលរួមនាំក្ដីសង្ឃឹម និងភាពញញឹមដល់ទារក និងកុមារដែលជាអនាគតដ៏ភ្លឺស្វាងរបស់កម្ពុជា សូមជួយផ្សព្វផ្សាយអំពីយុទ្ធនាការនេះតាមមធ្យោបាយរៀងៗខ្លួន និងចូលរួមបរិច្ចាគឱ្យបានទូលំទូលាយបន្ថែមទៀត ៕ អត្ថបទសហការ
ចែករំលែកព័តមាននេះ