ខេត្តក្រចេះ ៖ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា បានអញ្ជើញជាអធិបតីក្នុងពិធីប្រកាសតែងតាំងនាយក និងមន្ត្រីសាខាធនាគារជាតិនៃកម្ពុជា ខេត្តក្រចេះ និងសំណេះសំណាលជាមួយមន្ត្រី-បុគ្គលិក…
ខេត្តក្រចេះ ៖ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា បានអញ្ជើញជាអធិបតីក្នុងពិធីប្រកាសតែងតាំងនាយក និងមន្ត្រីសាខាធនាគារជាតិនៃកម្ពុជា ខេត្តក្រចេះ និងសំណេះសំណាលជាមួយមន្ត្រី-បុគ្គលិក នាព្រឹកថ្ងៃទី ១១ ខែមីនា ឆ្នាំ ២០២៥ នៅសាខាធនាគារជាតិនៃកម្ពុជា ខេត្តក្រចេះ ។
លោកជំទាវទេសាភិបាល មានប្រសាសន៍ក្នុងពិធីនេះថា ការកែសម្រួលភារកិច្ច គឺមានគោលបំណងបំពេញតម្រូវការរបស់ស្ថាប័ន តាមរយៈការនាំមកនូវជំនាញ និងបទពិសោធន៍ថ្មីបន្ថែមទៀត ដើម្បីបន្តនិរន្តរភាពការងារ និងប្រតិបត្តិការរបស់សាខាឱ្យប្រព្រឹត្តទៅបានរលូននិងមានប្រសិទ្ធភាពខ្ពស់។
លោកជំទាវក៏បានលើកសសើរ និងវាយតម្តៃខ្ពស់ពីសមិទ្ធផលការងាររបស់សាខាខេត្តក្រចេះនាពេលកន្លងមក និងបានជំរុញលើកទឹកចិត្តមន្ត្រី-បុគ្គលិកទាំងអស់ឱ្យបន្តខិតខំបំពេញការងារកាន់តែសកម្ម និងមានសាមគ្គីភាពល្អ ព្រមទាំងពង្រឹងទំនាក់ទំនងកាន់តែប្រសើរជាមួយមន្ទីរ-អង្គភាពពាក់ព័ន្ធនៅក្នុងខេត្ត ។ បន្ថែមលើនេះ លោកជំទាវក៏បានសង្កត់ធ្ងន់ពីសារៈសំខាន់នៃសកម្មភាពបញ្ជ្រាបចំណេះដឹងផ្នែកហិរញ្ញវត្ថុដល់ប្រជាជនក្នុងមូលដ្ឋានសំដៅលើកកម្ពស់ការប្រើប្រាស់សេវាហិរញ្ញវត្ថុឱ្យកាន់តែមានប្រសិទ្ធភាពបន្ថែមទៀត ។
បន្ទាប់ពីកម្មវិធីនេះ លោកជំទាវ ទេសាភិបាល ក៏បានដឹកនាំគណៈប្រតិភូ ធនាគារជាតិនៃកម្ពុជា អញ្ជើញជួបសំណេះសំណាលការងារជាមួយថ្នាក់ដឹកនាំនៃរដ្ឋបាលខេត្តក្រចេះ ដឹកនាំដោយឯកឧត្តម ទុយ ប៊ុនសេរីរ័ត្នមុនី អភិបាលរង នៃគណៈអភិបាលខេត្តក្រចេះ ក្នុងគោលបំណងស្វែងយល់អំពីស្ថានភាពសេដ្ឋកិច្ច និងជីវភាពរបស់ប្រជាពលរដ្ឋ ស្ថានភាពនៃការប្រើប្រាស់សេវាហិរញ្ញវត្ថ ព្រមទាំងស្វែងរកកិច្ចសហការនានា សំដៅលើកកម្ពស់ប្រសិទ្ធភាពនៃការប្រើប្រាស់សេវាហិរញ្ញវត្ថុ និងរួមចំណែកអភិវឌ្ឍសេដ្ឋកិច្ចខេត្ត ៕ អត្ថបទសហការ
ចែករំលែកព័តមាននេះ