រាជធានីភ្នំពេញ ៖ រាជរដ្ឋាភិបាលកម្ពុជា តាមរយៈគណៈកម្មាធិការជាតិអភិវឌ្ឍន៍វិស័យទេសចរណ៍ កំពុងរៀបចំគោលនយោបាយស្តីពី «ទេសចរណ៍ពិសិដ្ឋឆ្នាំ ២០២៥-២០៣៥» ដែលមានចក្ខុវិស័យប្រែក្លាយតំបន់ដែលមានសក្តានុពលនៅកម្ពុជា ទៅជាគោលដៅទេសចរណ៍ «តំបន់ទេសចរណ៍ពិសិដ្ឋ»…
រាជធានីភ្នំពេញ ៖ រាជរដ្ឋាភិបាលកម្ពុជា តាមរយៈគណៈកម្មាធិការជាតិអភិវឌ្ឍន៍វិស័យទេសចរណ៍ កំពុងរៀបចំគោលនយោបាយស្តីពី «ទេសចរណ៍ពិសិដ្ឋឆ្នាំ ២០២៥-២០៣៥» ដែលមានចក្ខុវិស័យប្រែក្លាយតំបន់ដែលមានសក្តានុពលនៅកម្ពុជា ទៅជាគោលដៅទេសចរណ៍ «តំបន់ទេសចរណ៍ពិសិដ្ឋ» ពិសេសគឺដើម្បីទាក់ទាញទេសចរពិសេស និងទេសចរគុណភាពលំដាប់ខ្ពស់ឱ្យមកទស្សនា ស្នាក់អាស្រ័យ ធ្វើធុរកិច្ច និងវិនិយោគនៅកម្ពុជា ។
សូមជម្រាបថា កាលពីឆ្នាំ ២០១៨ រាជរដ្ឋាភិបាលកម្ពុជាបានខិតខំតាក់តែងគោលនយោបាយទេសចរណ៍ពិសិដ្ឋនេះដែរ ប៉ុន្តែដោយសារការរាតត្បាតជំងឺកូវីដ ១៩ នោះ កិច្ចការរៀបចំទាំងនេះក៏ហាក់ដូចជានៅទ្រឹងសិន ។ រហូតដល់មានការបង្កើតគណៈកម្មាធិការជាតិអភិវឌ្ឍន៍វិស័យទេសចរណ៍កាលពីពេលថ្មីៗនេះ ទើបគណៈកម្មាធិការជាតិថ្មីនេះចាប់ផ្ដើមដឹកនាំការរៀបចំឱ្យមានគោលនយោបាយស្តីពីទេសចរណ៍ពិសិដ្ឋឡើងវិញ ។
ជាក់ស្ដែងក្នុងកិច្ចប្រជុំលើកទី ២ របស់គណៈកម្មាធិការជាតិអភិវឌ្ឍន៍វិស័យទេសចរណ៍ នាថ្ងៃទី ១៨ ខែកុម្ភៈ ឆ្នាំ ២០២៥ នៅទីស្ដីការគណៈរដ្ឋមន្ត្រី ឯកឧត្តមបណ្ឌិត ថោង ខុន ទេសរដ្ឋមន្ត្រី និងជាប្រធានគណៈកម្មាធិការជាតិអភិវឌ្ឍន៍វិស័យទេសចរណ៍ បានដឹកនាំកិច្ចប្រជុំពិគ្រោះយោបល់លើសេចក្ដីព្រាងគោលនយោបាយស្តីពី «ទេសចរណ៍ពិសិដ្ឋឆ្នាំ ២០២៥-២០៣៥» ដោយមានការចូលរួមពីឯកឧត្តមហួត ហាក់ រដ្ឋមន្ត្រីក្រសួងទេសចរណ៍ ជាអនុប្រធានអចិន្ត្រៃយ៍ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ជាអនុប្រធាន ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជាអនុប្រធាន ព្រមទាំងថ្នាក់ដឹកនាំ និងសមាជិកគណៈកម្មាធិការជាតិអភិវឌ្ឍន៍វិស័យទេសចរណ៍ជាច្រើនរូប ។ អង្គប្រជុំបានពិភាក្សាយ៉ាងផុសផុលលើកិច្ចការជាច្រើន ហើយក៏បានផ្ដោតសំខាន់លើការពិគ្រោះយោបល់លើសេចក្ដីព្រាងគោលនយោបាយស្តីពី «ទេសចរណ៍ពិសិដ្ឋឆ្នាំ២០២៥-២០៣៥» នេះដែរ ។
ឯកឧត្តមទេសរដ្ឋមន្ត្រី ថោង ខុន បានឱ្យដឹងថា រាជរដ្ឋាភិបាលបានដាក់ចេញនូវគោលនយោបាយស្តីពីទេសចរណ៍ពិសិដ្ឋឆ្នាំ ២០២៥-២០៣៥ សំដៅលើកកម្ពស់កិត្យានុភាពកម្ពុជាឱ្យក្លាយជាគោលដៅទេសចរណ៍គុណភាព ប្រកបដោយការស្ថាបនា និងអភិវឌ្ឍមូលដ្ឋានផលិតផល និងសេវាកម្មទេសចរណ៍អាទិភាព ស្របតាមនិន្នាការវិវត្តនៃវិស័យទេសចរណ៍ ទាក់ទាញទេសចរគុណភាពលំដាប់ខ្ពស់ឱ្យមកទស្សនា ស្នាក់អាស្រ័យ ធ្វើធុរកិច្ច និងវិនិយោគ ដែលជាការរួមចំណែកជំរុញកំណើនសេដ្ឋកិច្ច និងការអភិវឌ្ឍសង្គមយើង» ។
អ្វីទៅជា «ទេសចរណ៍ពិសិដ្ឋ» ? តំបន់ទេសចរណ៍ពិសិដ្ឋ សំដៅដល់តំបន់ដែលមានសក្តានុពលទេសចរណ៍ខ្ពស់នៅកម្ពុជា ដែលត្រូវបានកំណត់ដោយរាជរដ្ឋាភិបាល ។ តំបន់ទេសចរណ៍ពិសិដ្ឋនីមួយៗប្រមូលផ្តុំដោយសម្បទា និងសេវាកម្មទេសចរណ៍សំខាន់ៗ រួមមាន ៖ សេវាកម្មស្នាក់នៅ និវេសនដ្ឋានទេសចរណ៍ សេវាកម្មម្ហូបអាហារ និងភេសជ្ជៈ មណ្ឌលសម្រាកលម្ហែកម្សាន្តទេសចរណ៍ មណ្ឌលកីឡាទេសចរណ៍ សួន ឧទ្យាន មណ្ឌលផ្តល់សេវាថែទាំសុខភាពទេសចរណ៍ មណ្ឌលសេវាកម្មទេសចរណ៍ពាក់ព័ន្ធផ្សេងៗទៀត ។
លើសពីនេះ តំបន់ទេសចរណ៍ពិសិដ្ឋ ត្រូវបានរៀបចំឱ្យមានហេដ្ឋារចនាសម្ពន្ធគាំទ្រគ្រប់គ្រាន់ស្របតាមស្តង់ដារ មានសម្បទា និងសេវាកម្មសំខាន់ៗ ដូចជា សេវាកម្មហិរញ្ញវត្ថុ ទូរគមនាគមន៍ អប់រំ ថែរក្សា សុខភាព សុខាភិបាល ។ល។ ប្រកបដោយគុណភាពខ្ពស់ សម្រាប់ទ្រទ្រង់ដល់តម្រូវការ និងចំណាប់អារម្មណ៍របស់ទេសចរ និងអ្នកវិនិយោគ ។ តំបន់ទេសចរណ៍ពិសិដ្ឋ អាចត្រូវបានអភិវឌ្ឍដោយរាជរដ្ឋាភិបាល ឬដោយវិស័យឯកជន ឬក្រោមភាពជាដៃគូរវាងរដ្ឋ និងឯកជន ដោយមានការលើកទឹកចិត្តនិងគាំទ្រពីរាជរដ្ឋាភិបាល និងស្របតាមក្របខណ្ឌគតិយុត្តជាធរមានដែលត្រូវដាក់ចេញដោយរាជរដ្ឋាភិបាល ។
ឯកឧត្តម ទិត ចន្ថា រដ្ឋលេខាធិការក្រសួងទេសចរណ៍ និងជាសមាជិកនៃគណៈកម្មាធិការនេះ បានបញ្ជាក់ដែរថា «តំបន់ទេសចរណ៍ពិសិដ្ឋ មិនអាចបង្កើតឡើងនៅតំបន់ព្រំដែន ឬកៀកនឹងតំបន់ព្រំដែន ឬក៏តំបន់ដែលមានហានិភ័យផ្សេងៗឡើយ» ។ ឯកឧត្តមក៏បានពន្យល់ពីចំណុចដែលហៅថា «ទេសចរពិសេស» គឺសំដៅដល់ទេសចរអន្តរជាតិដែលទទួលបានការអនុញ្ញាតចូលចេញ និងស្នាក់នៅក្នុងតំបន់ទេសចរណ៍ពិសិដ្ឋ ស្របតាមច្បាប់នៃព្រះរាជាណាចក្រកម្ពុជា ។
ឯកឧត្តមបន្តថា ទេសចរពិសេស ត្រូវបានផ្តល់សិទ្ធិ និងការអនុញ្ញាតក្នុងការវិនិយោគ ចូលរួមក្នុងសកម្មភាពធុរកិច្ច អភិវឌ្ឍ និងអាស្រ័យផលនៅក្នុងតំបន់ទេសចរណ៍ពិសិដ្ឋ ដោយសារធនធាន និងឥទ្ធិពលរបស់ទេសចរទាំងនោះ ក្នុងការជំរុញ និងគាំទ្រដល់ការអភិវឌ្ឍតំបន់ទេសចរណ៍ពិសិដ្ឋ និងសេដ្ឋកិច្ចកម្ពុជាទាំងមូល ។ ទេសចរពិសេសអាចមានទម្រង់ជាទេសចរធុរកិច្ច ទេសចរផ្ទះទី ២ ទេសចរនិវត្តជន (មានធនធាន) និងប្រភេទទេសចរផ្សេងៗទៀត និងទទួលបានសិទ្ធិពិសេសនានាក្នុងការចូលចេញ ស្នាក់អាស្រ័យ និងទទួលផលប្រយោជន៍ក្នុងប្រទេសកម្ពុជា ព្រមទាំងទទួលបានសិទ្ធិអាស្រ័យផលក្នុងតំបន់ទេសចរណ៍ពិសិដ្ឋ ស្របតាមច្បាប់និងក្របខណ្ឌគតិយុត្តដែលមានជាធរមាន ឬនឹងត្រូវដាក់ចេញដោយរាជរដ្ឋាភិបាល ៕ អត្ថបទសហការ
ចែករំលែកព័តមាននេះ