លោកបណ្ឌិត ឃូ វុឍ្ឍី ឧបការីទេសាភិបាល និងជាអគ្គនាយកគោលនោយបាយ និងសហប្រតិបត្តិការអន្តរជាតិ នៃធនាគារជាតិនៃកម្ពុជា ថ្លែងក្នុងសន្និសីទម៉ាក្រូសេដ្ឋកិច្ចប្រចាំឆ្នាំលើកទី១២ ឆ្នាំ២០២៥ ស្តីពី…
លោកបណ្ឌិត ឃូ វុឍ្ឍី ឧបការីទេសាភិបាល និងជាអគ្គនាយកគោលនោយបាយ និងសហប្រតិបត្តិការអន្តរជាតិ នៃធនាគារជាតិនៃកម្ពុជា ថ្លែងក្នុងសន្និសីទម៉ាក្រូសេដ្ឋកិច្ចប្រចាំឆ្នាំលើកទី១២ ឆ្នាំ២០២៥ ស្តីពី «ការជំរុញការចូលរួមរបស់សហគ្រាសធុនតូចនិងមធ្យមក្នុងការអភិវឌ្ឍសេដ្ឋកិច្ចកម្ពុជា» នៅវិទ្យាស្ថានសិក្សាបច្ចេកទេសធនាគារ ថ្ងៃទី២៦ ខែធ្នូ ឆ្នាំ២០២៥
នាពេលនេះ សន្និសីទម៉ាក្រូសេដ្ឋកិច្ចប្រចាំឆ្នាំលើកទី១២ ឆ្នាំ២០២៥ របស់ធនាគារជាតិនៃកម្ពុជា បានឈានដល់ទីបញ្ចប់ប្រកបដោយជោគជ័យ ។ ខ្ញុំសូមវាយតម្លៃខ្ពស់ និងសូមថ្លែងអំណរគុណយ៉ាងជ្រាលជ្រៅចំពោះវាគ្មិន អ្នកសម្របសម្រួល អ្នកស្រាវជ្រាវ និងអ្នកចូលរួមទាំងអស់ សម្រាប់ការចូលរួមយ៉ាងសកម្ម និងការរួមចំណែកដ៏មានតម្លៃក្នុងកម្មវិធីថ្ងៃនេះ។
សន្និសីទម៉ាក្រូសេដ្ឋកិច្ចប្រចាំឆ្នាំនេះ បានផ្តល់ជាវេទិកាដ៏មានសារៈសំខាន់ និងទាន់ពេលវេលា សម្រាប់ការផ្លាស់ប្តូរទស្សនៈលើប្រធានបទ ការជំរុញការចូលរួមរបស់សហគ្រាសធុនតូច និងមធ្យម (SME) ក្នុងការអភិវឌ្ឍសេដ្ឋកិច្ចកម្ពុជា ។
តាមរយៈសុន្ទរកថាគន្លឹះ កិច្ចពិភាក្សា និងបទបង្ហាញនាព្រឹកនេះ យើងទទួលបានទស្សនៈចម្រុះ និងសម្បូរបែបអំពីវិធីធ្វើឱ្យ SME អាចត្រូវបានពង្រឹងបន្ថែម ដើម្បីមានតួនាទីរឹងមាំជាងមុនក្នុងការរួមចំណែកជំរុញសកម្មភាពសេដ្ឋកិច្ចកម្ពុជា ។
ខ្ញុំសូមលើកឡើងនូវខ្លឹមសារសំខាន់ៗមួយចំនួនពីកិច្ចពិភាក្សាថ្ងៃនេះ ដូចខាងក្រោម៖
-ទី១ ខណៈដែលកម្ពុជាបានទទួលបានវឌ្ឍនភាពគួរឱ្យកត់សម្គាល់ក្នុងការជំរុញការអភិវឌ្ឍ SME តាមរយៈការកែលម្អក្របខ័ណ្ឌគោលនយោបាយ យន្តការគាំទ្រផ្នែកហិរញ្ញវត្ថុ និងការកែទម្រង់រចនាសម្ព័ន្ធនានា សមាមាត្រនៃការចុះបញ្ជី និងការចូលទៅក្នុងវិស័យផ្លូវការ នៅតែមានអត្រាទាបបើប្រៀបធៀបនឹងចំនួនសហគ្រាសសរុបនៅទូទាំងប្រទេស។ ការណ៍នេះបញ្ជាក់ពីភាពចាំបាច់ក្នុងការបន្តពង្រឹងការផ្សព្វផ្សាយឱ្យបានទូលំទូលាយ ដើម្បីឱ្យសហគ្រាសនានាអាចយល់ច្បាស់អំពីអត្ថប្រយោជន៍នៃការចូលរួមក្នុងវិស័យសេដ្ឋកិច្ចផ្លូវការ។
-ទី២ កិច្ចពិភាក្សាបានបញ្ជាក់ថា រចនាសម្ព័ន្ធសេដ្ឋកិច្ចកម្ពុជាកំពុងវិវឌ្ឍទៅរកគំរូដែលជំរុញដោយតម្រូវការក្នុងស្រុកកាន់តែច្រើន ជាពិសេសក្នុងស្ថានភាព ។ ក្នុងបរិបទនេះ SME ត្រូវបានរំពឹងថានឹងមានតួនាទីយុទ្ធសាស្ត្រកាន់តែសំខាន់ មិនត្រឹមតែបង្កើតការងារប៉ុណ្ណោះទេ ប៉ុន្តែថែមទាំងពង្រឹងខ្សែច្រវាក់ផ្គត់ផ្គង់ក្នុងស្រុក កែលម្អគុណភាពផលិតផល បង្កើនផលិតភាព និងឆ្លើយតបទៅនឹងការផ្លាស់ប្តូរចំណង់ចំណូលចិត្តអ្នកប្រើប្រាស់ ដែលកំពុងមាននិន្នាការគាំទ្រផលិតផលក្នុងស្រុកគួរឱ្យកត់សម្គាល់ ។ ដូច្នេះ SME ជាគន្លឹះសម្រាប់ការរក្សានិរន្តរភាពកំណើន និងការពង្រឹងភាពធន់នៃសេដ្ឋកិច្ច។
-ទី៣ ការទទួលបានសេវាហិរញ្ញវត្ថុ នៅតែជាកត្តាជំរុញដ៏សំខាន់ ប៉ុន្តែក៏ជាបញ្ហាប្រឈមដែលបន្តមានផងដែរ។ កិច្ចពិភាក្សាថ្ងៃនេះបានលើកឡើងថា ការកែលម្អការទទួលបានសេវាហិរញ្ញវត្ថុ មិនមែនសំដៅតែលើការបង្កើនបរិមាណឥណទានប៉ុណ្ណោះទេ ប៉ុន្តែថែមទាំងត្រូវគិតគូរពីការកែលម្អគុណភាព ភាពសមស្រប និងនិរន្តរភាពនៃសេវាហិរញ្ញវត្ថុផងដែរ ។ ការណ៍នេះទាមទារឱ្យមានការយកចិត្តទុកដាក់លើការធ្វើឱ្យសេវាហិរញ្ញវត្ថុមានភាពសមស្របជាមួយតម្រូវការរបស់ SME ការពង្រឹងចំណេះដឹងផ្នែកហិរញ្ញវត្ថុ ការកែលម្អអភិបាលកិច្ចរបស់សហគ្រាស និងការអភិវឌ្ឍហេដ្ឋារចនាសម្ព័ន្ធឥណទានឱ្យមានប្រសិទ្ធភាព។
-ទី៤ កិច្ចពិភាក្សាបានរំលេចអំពីសារៈសំខាន់នៃការកសាងសមត្ថភាព និងនវានុវត្តន៍ ។
SME ត្រូវទទួលបានការគាំទ្រ ដើម្បីធ្វើឱ្យប្រសើរឡើងនូវការគ្រប់គ្រង ការចាប់យកបច្ចេកវិទ្យាថ្មីៗ ការពង្រឹងយុទ្ធសាស្ត្រទីផ្សារ និងការធ្វើសមាហរណកម្មឱ្យមានប្រសិទ្ធភាពកាន់តែខ្លាំងក្នុងខ្សែច្រវាក់ផ្គត់ផ្គង់ក្នុងស្រុក តំបន់ និងពិភពលោក។ ក្នុងន័យនេះ កិច្ចសហការរវាងស្ថាប័នរដ្ឋ គ្រឹះស្ថានធនាគារនិងហិរញ្ញវត្ថុ សមាគមអាជីវកម្ម គ្រឹះស្ថានអប់រំ និងដៃគូអភិវឌ្ឍន៍នានា មានសារៈសំខាន់យ៉ាងខ្លាំង ក្នុងការពង្រឹងសហថាមភាព សម្រាប់រួមគ្នាគាំទ្រការរីកចម្រើនរបស់ SME។
ធនាគារជាតិនៃកម្ពុជានឹងបន្តប្តេជ្ញាចិត្តយ៉ាងមុតមាំ ក្នុងការថែរក្សាស្ថិរភាពម៉ាក្រូ-សេដ្ឋកិច្ច និងហិរញ្ញវត្ថុ ព្រមទាំងជំរុញហរិយាបន្នហិរញ្ញវត្ថុ ក៏ដូចជាពង្រឹងភាពធន់ និងប្រសិទ្ធភាពនៃប្រព័ន្ធធនាគារ។ ការជំរុញការផ្តល់សេវាហិរញ្ញវត្ថុសម្រាប់ SME ការលើកទឹកចិត្តដល់ការផ្តល់ឥណទានប្រកបដោយការទទួលខុសត្រូវ ការពង្រឹងហេដ្ឋារចនាសម្ព័ន្ធហិរញ្ញវត្ថុ និងការជំរុញសេវាហិរញ្ញវត្ថុឌីជីថល នឹងបន្តជាអាទិភាពសំខាន់ៗក្នុងរបៀបវារៈគោលនយោបាយរបស់យើង។
លើសពីការពិភាក្សាកម្រិតបច្ចេកទេស សន្និសីទថ្ងៃនេះរំលឹកឱ្យយើងឃើញចំណុចសំខាន់មួយគឺ៖ ការគាំទ្រ SME មិនគ្រាន់តែជាគោលដៅជាក់លាក់តាមវិស័យប៉ុណ្ណោះទេ ប៉ុន្តែជាកត្តាចាំបាច់សម្រាប់ការអភិវឌ្ឍសេដ្ឋជាតិទាំងមូល។ SME ជាគន្លឹះសម្រាប់ភាពធន់នៃសេដ្ឋកិច្ច បរិយាបន្នសង្គម និងសមត្ថភាពប្រកួតប្រជែងរយៈពេលវែងរបស់កម្ពុជា ជាពិសេសក្នុងបរិបទដែលពោរពេញដោយភាពមិនប្រាកដប្រជាខ្ពស់ជាសកល និងការផ្លាស់ប្តូររចនាសម្ព័ន្ធជាលំដាប់។
មតិយោបល់ និងអនុសាសន៍ដែលបានចែករំលែកនាថ្ងៃនេះ នឹងក្លាយជាធាតុចូលដ៏សំខាន់សម្រាប់អ្នករៀបចំគោលនយោបាយ និងភាគីពាក់ព័ន្ធ ក្នុងការបន្តកែលម្អ និងអនុវត្តយុទ្ធសាស្ត្រគាំទ្រការអភិវឌ្ឍ SME។ លើសពីនេះ កិច្ចពិភាក្សាថ្ងៃនេះ ក៏ជួយពង្រឹងការយល់ច្បាស់រវាងគ្នា និងកិច្ចសហប្រតិបត្តិការរវាងភាគីទាំងអស់ផងដែរ។
មុននឹងបញ្ចប់ ខ្ញុំសូមថ្លែងអំណរគុណយ៉ាងជ្រាលជ្រៅជាថ្មីម្តងទៀត ចំពោះលោកសាស្ត្រាចារ្យ វាគ្មិន អ្នកសម្របសម្រួល អ្នកស្រាវជ្រាវវ័យក្មេង និងអ្នកចូលរួមទាំងអស់ សម្រាប់ការរួមចំណែកប្រកបដោយគុណភាព និងការគិតពិចារណាយ៉ាងល្អ។ ខ្ញុំក៏សូមកោតសរសើរក្រុមរៀបចំសន្និសីទ សម្រាប់ការត្រៀមរៀបចំ និងសម្របសម្រួលដ៏ល្អឥតខ្ចោះ ដែលបានធានាឱ្យសន្និសីទនេះទទួលបានជោគជ័យ។
ក្នុងឱកាសឆ្នាំថ្មី ខ្ញុំសូមជូនពរចំពោះ ឯកឧត្តម លោកជំទាវ លោក លោកស្រីទាំងអស់ដែលបានអញ្ជើញចូលរួមក្នុងសន្និសីទម៉ាក្រូសេដ្ឋកិច្ចលើកទី១២នេះ សូមមានសុខភាពល្អ មានសុភមង្គលក្នុងគ្រួសារ និងសម្រេចជោគជ័យគ្រប់ភារកិច្ច ៕
ចែករំលែកព័តមាននេះ