រាជធានីភ្នំពេញ ៖ លោកវេជ្ជបណ្ឌិត SURACHET SRIKAEW អ្នកជំនាញផ្នែកវះកាត់ខួរក្បាល និងឆ្អឹងខ្នង នៃមន្ទីរពេទ្យរ៉ូយ៉ាល់ភ្នំពេញបានណែនាំ ឱ្យប្រជាជនកម្ពុជាមានការប្រុងប្រយ័ត្នខ្ពស់ ចំពោះជំងឺ…
រាជធានីភ្នំពេញ ៖ លោកវេជ្ជបណ្ឌិត SURACHET SRIKAEW អ្នកជំនាញផ្នែកវះកាត់ខួរក្បាល និងឆ្អឹងខ្នង នៃមន្ទីរពេទ្យរ៉ូយ៉ាល់ភ្នំពេញបានណែនាំ ឱ្យប្រជាជនកម្ពុជាមានការប្រុងប្រយ័ត្នខ្ពស់ ចំពោះជំងឺ Stroke ឬជំងឺដាច់សរសៃឈាមខួរក្បាល ព្រោះជំងឺនេះ អាចជួយសង្គ្រោះ និងការពារបានទាន់ពេលវេលាត្រឹមតែរយៈពេល ៤ ម៉ោង កន្លះតែប៉ុណ្ណោះ ដោយចៀសវាង និងកាត់បន្ថយការហូបអាហារដែលមានជាតិប្រៃខ្លាំង អាហារមានជាតិផ្អែមខ្លាំង និងអាហារដែលមានជាតិខ្លាញ់ច្រើន ជាពិសេសត្រូវធ្វើការហាត់ប្រាណឱ្យបានទៀងទាត់ ។ ការណែនាំរបស់លោកវេជ្ជបណ្ឌិតបែបនេះ ធ្វើឡើងក្នុងសិក្ខាសាលាចែករំលែកចំណេះដឹង អំពីបញ្ហាការកៀបសរសៃឆ្នឹងខ្នង និងជំងឺស្ទះសរសៃឈាមខួរក្បាល ដែលរៀបចំដោយមន្ទីរពេទ្យ រ៉ូយ៉ាល់ភ្នំពេញ នាព្រឹកថ្ងៃទី ២៦ ខែសីហា ឆ្នាំ ២០២៤ ។
លោកវេជ្ជបណ្ឌិត SURACHET SRIKAEW បានលើកឡើងថា ជំងឺ Stroke ចែកចេញជាពីរផ្នែកធំៗ កើតឡើងដោយសារតែ ទី ១ អ្នកដែលខ្វះឈាមទៅចិញ្ចឹមដល់ខួរក្បាល ទី ២ ការបែកសរសៃឈាមក្នុងខួរក្បាល ហើយអ្នកជំងឺកើត Stroke ខ្វះឈាមរត់ទៅចិញ្ចឹមខួរក្បាលដោយសារតែសរសៃឈាមខួរក្បាលឈាមកកទៅជាកំណកឈាមច្រើនជាងអ្នកដែលបែកសរសៃឈាមក្នុងខួរក្បាល ។ លោកវេជ្ជបណ្ឌិតបានគូសបញ្ជាក់ថា ៖ «សម្រាប់អ្នកជំងឺ Stroke ត្រូវប្រញាប់មកមន្ទីរពេទ្យឱ្យបានលឿនក្នុងរយៈពេលតែ៤ម៉ោងកន្លះប៉ុណ្ណោះ ដែលនេះគឺជាការសិក្សាស្រាវជ្រាវទៅលើអ្នកជំងឺ Stroke បើយើងធ្វើឱ្យបានទាន់ពេលវេលាក្នុងរយៈពេល ៤ ម៉ោងកន្លះនេះ យើងអាចព្យាបាលបាន និងធ្វើឱ្យអ្នកជំងឺមានសុខភាពល្អឡើងវិញ» ។
លោកវេជ្ជបណ្ឌិតបានពន្យល់ផងដែរថា អ្នកដែលកើតជំងឺ Stroke ឬជំងឺដាច់សរសៃឈាមខួរក្បាលនេះ បង្ហាញនូវអាការៈឈឺក្បាលធ្ងន់ធ្ងរ និងខ្លាំងបំផុតមិនដែលជួបប្រទះសោះ ជាពិសេសចំពោះអ្នកដែលមានជំងឺលើសឈាម ។ ចំពោះអ្នកដែលមានអាការៈកើតជំងឺ Stroke ត្រូវមើលទៅលើការឈរ មិនមានភាពរឹងមាំ ទឹកមុខវៀច ឬមានការធ្លាក់ជាដើម ភ្នែកមើលមិនច្បាស់ ហើយ ត្រូវប្រញាប់មកមន្ទីរពេទ្យក្នុងរយៈពេល ៤ ម៉ោងកន្លះ ដើម្បីឱ្យគ្រូពេទ្យជួយសង្គ្រោះបានទាន់ពេលវេលា ។
បើតាមលោកវេជ្ជបណ្ឌិត SURACHET SRIKAEW សម្រាប់វិធីការពារលើការកើតជំងឺ Stroke នេះ គឺចំពោះអ្នកដែលធាត់ ត្រូវតែមានការប្រយ័ត្នប្រយែងលើការហូបចុក ដូចជាបន្ថយការហូបអាហារដែលមានជាតិប្រៃពេក ផ្អែមពេក និងអាហារដែលមានជាតិខ្លាញ់ច្រើន ហើយត្រូវហាត់ប្រាណឱ្យបានទៀងទាត់ប្រចាំថ្ងៃ និងត្រូវឈប់ជក់បារី ឬហូបស្រាជាដើម ។ ជាមួយគ្នានេះ ការហូបអាហារដែលផ្ដល់ប្រយោជន៍ ហើយតបអាហារដែលមានជាតិប្រៃពេក ផ្អែមពេក កុំហូបខ្លាញ់ច្រើន បន្ថយការហូបសាច់ និងងាកមកហូបបន្លែ និងគ្រាប់ធញ្ញជាតិឱ្យបានច្រើនវិញ ។
លោកវេជ្ជបណ្ឌិតក៏បានអះអាងថា ដោយសារតែបច្ចុប្បន្នបច្ចេកវិទ្យាមានការរីកចម្រើន គឺយើងអាចពិនិត្យដឹងមុនចំពោះអ្នកជំងឺ Stroke បាន ដោយនៅមន្ទីរពេទ្យរ៉ូយ៉ាល់ភ្នំពេញ គឺមានឧបករណ៍ ម៉ាស៊ីនស្កែនទំនើប MRI 3 Tesla ដើម្បីស្កើនមើលថា តើមានទម្រង់សរសៃឈាមខួរក្បាលរបស់គាត់មានការប្រឈមជាមួយនឹងជំងឺ Stroke ក្នុងកម្រិតណា ឬក៏មានការប្រឈមជាមួយជំងឺ Stroke ជាដើម ដើម្បីការពារទប់ស្កាត់នូវជំងឺនេះជាមុន ។ ទន្ទឹមនេះ ក៏មានឧបករណ៍សម្រាប់តាមដានបេះដឹង តើថាបេះដូងរបស់យើងមានបញ្ហា ឬយ៉ាងណាដោយសារតែជំងឺបេះដូង និងជំងឺ Stroke នេះគឺមានទំនាក់ទំនងគ្នាតែមួយ ។
លោកវេជ្ជបណ្ឌិតបានថ្លែងបន្ដទៀតថា៖ «ជំងឺ Stroke នេះជាជំងឺធ្ងន់ធ្ងរ តែយើងនៅមានវិធីទប់ទល់ និងការពារវាជាដំបូង ដើម្បីកុំឱ្យយើងមានការប៉ះពាល់ដោយជំងឺ Stroke នេះបានដោយយើងត្រូវមកជួបគ្រូពេទ្យ និងពិនិត្យសុខភាពឱ្យបានទៀងទាត់» ។
លោកវេជ្ជបណ្ឌិត SURACHET SRIKAEW អ្នកជំនាញផ្នែកវះកាត់ខួរក្បាល និងឆ្អឹងខ្នងបានគូសបញ្ជាក់ផងដែរថា អ្នកដែលអាចប្រឈម និងកើតជំងឺ Stroke គឺភាគច្រើនសម្រាប់មនុស្សដែលមានអាយុចាប់ពី៤០ឆ្នាំឡើងទៅ ប៉ុន្ដែបច្ចុប្បន្ននេះ មានភាពផ្ទុយស្រឡះគ្នាពីមុនដោយសារតែអ្នកដែលមានអាយុវ័យក្មេងក៏អាចកើតជំងឺ Stroke បានដូចគ្នាទៅនឹងអ្នកដែលមានអាយុចាប់ពី ៤០ ឆ្នាំ ឬ៥០ឆ្នាំ ឡើងទៅ ។ ចំពោះអ្នកដែលកើតជំងឺ Stroke វ័យក្មេងគឺមានមូលហេតុខុសគ្នាពី អ្នកមានវ័យចំណាស់ ។ «សម្រាប់ក្មេងដែលកើតជំងឺ Stroke គឺបណ្ដាលមកពីការខុសពីប្រក្រតីនៃផ្នែករាងកាយ និងសរសៃឈាមរបស់គាត់តាំងពីកំណើតមកតែម្ដង។ ប៉ុន្ដែ ជំងឺ Stroke ជាទូទៅ គឺបណ្ដាលមកពីការសឹករិចរិលនៃរាងកាយរបស់យើងទៅតាមវ័យ» ។ នេះគឺជាការបញ្ជាក់បន្ថែមរបស់លោកវេជ្ជបណ្ឌិត SURACHET SRIKAEW ។
សូមជម្រាបជូនថា សិក្ខាសាលានេះក៏មានការធ្វើបទបង្ហាញ និងចែករំលែកចំណេះដឹងទាក់ទងនឹងប្រធានបទ “ការគ្រប់គ្រង និងការព្យាបាលជំងឺដាច់សរសៃឈាមខួរក្បាលដោយលោកវេជ្ជបណ្ឌិត SURACHET SRIKAEW អ្នកជំនាញផ្នែកវះកាត់ខួរក្បាល និងឆ្អឹងខ្នង នៃមន្ទីរពេទ្យរ៉ូយ៉ាល់ភ្នំពេញ និងលោកវេជ្ជបណ្ឌិត CHAIDEJ SASOMBOON អ្នកជំនាញផ្នែកវះកាត់ឆ្អឹង នៃមន្ទីរពេទ្យបាងកក ប្រទេសថៃ ដោយធ្វើបទបង្ហាញលើការព្យាបាល ការកៀបសរសៃឆ្អឺងខ្នង និងការវះកាត់ឆ្អឹងខ្នងដោយការចោះតូច ដែលផ្ដល់ឱកាសជួបពិភាក្សា និងព្រឹក្សាយោបល់ដោយឥតគិតថ្លៃ ។
យោងតាមរបាយការណ៍សិក្សាស្រាវជ្រាវបានបង្ហាញថា ជំងឺ Stroke ឬជំងឺដាច់សរសៃឈាមខួរក្បាលដែលបានរកឃើញទៅលើអ្នកកើតជំងឺ Stroke នៅក្នុងប្រទេសកម្ពុជាគឺមានប្រមាណ ១៤ ០០០ នាក់ ក្នុងមួយឆ្នាំ ហើយអ្នកដែលបានបាត់បង់ជីវិតដោយសារជំងឺនេះ គឺមានប្រមាណ ១ ម៉ឺននាក់ ។ អ្នកកើតជំងឺ Stroke នៅកម្ពុជាមិនមាន ចំនួនច្រើននោះទេ ប៉ុន្ដែចំពោះអត្រាស្លា.ប់គឺមានចំនួនច្រើន បើប្រៀបធៀបជាមួយនឹងប្រទេសជិតខាង ៕ អត្ថបទសហការ
ចែករំលែកព័តមាននេះ