ខេត្តក្រចេះ ៖ ឯកឧត្តម ផែង សុវិជ្ជានោ រដ្ឋលេខាធិការក្រសួងសាធារណការ និងដឹកជញ្ជូនបានដឹកនាំក្រុមការងារចុះត្រួតពិនិត្យគម្រោង CW1 កំណាត់ផ្លូវជាតិលេខ ៧…
ខេត្តក្រចេះ ៖ ឯកឧត្តម ផែង សុវិជ្ជានោ រដ្ឋលេខាធិការក្រសួងសាធារណការ និងដឹកជញ្ជូនបានដឹកនាំក្រុមការងារចុះត្រួតពិនិត្យគម្រោង CW1 កំណាត់ផ្លូវជាតិលេខ ៧ ដែលបានបញ្ចប់ដោយការត្រួតពិនិត្យ និងការប្រគល់ទទួលទទួលបានភាពជោគជ័យនាព្រឹកថ្ងៃទី ៣០ ខែកក្កដា ឆ្នាំ ២០២៤ ។ គម្រោងផ្លូវមួយនេះត្រូវបានសាងសង់ដោយក្រុមហ៊ុន POLY CHANGDA ដែលមានប្រវែងសរុប ៣១,២៥២ គីឡូម៉ែត្រ ដែលចាប់ផ្តើមពីចំណុចលេខ PK300+000 និងបញ្ចប់នៅត្រង់ចំណុចលេខ PK331+252 ។ គម្រោងគ្របដណ្តប់លើការជួសជុលផ្ទៃផ្លូវដើម ការពង្រីកស្មាផ្លូវ ការក្រាលកៅស៊ូពីរជាន់ ការរៀបចំប្រព័ន្ធលូ និងបរិក្ខារសុវត្ថិភាពចរាចរណ៍ ។ល។
រយៈពេលសាងសង់ត្រូវបានកំណត់រយៈពេល ១៨ ខែ ប៉ុន្តែក្រុមហ៊ុន POLY CHANGDA បានបញ្ចប់គម្រោងទាំងមូលមុនការកំណត់ ដោយប្រើប្រាស់ត្រឹមតែ រយៈពេល ១២ ខែប៉ុណ្ណោះ ដែលបានបង្ហាញយ៉ាងពេញលេញនូវការគ្រប់គ្រងគម្រោងដ៏ល្អឥតខ្ចោះ និងសមត្ថភាពសាងសង់ប្រកបដោយប្រសិទ្ធភាព ។
ឯកឧត្តម ផែង សុវិជ្ជានោ បានសម្តែងការកោតសរសើរយ៉ាងខ្លាំងចំពោះលទ្ធផលការងារដ៏ឆ្នើមរបស់ក្រុមការងារនៃគម្រោងទាំងផ្នែកគុណភាព និងវឌ្ឍនភាព និងបានចង្អុលបង្ហាញថា សមិទ្ធិផលនេះបានប្រែក្លាយជាគំរូថ្មីសម្រាប់ការសាងសង់ហេដ្ឋារចនាសម្ព័ន្ធរបស់កម្ពុជា ។ ឯកឧត្តម បានបញ្ជាក់ថា ខ្ញុំមានទឹកចិត្តសប្បាយរីករាយព្រោះថានៅពេលដែលក្រុមការងារយើងចុះមកពិនិត្យការដ្ឋានដើម្បីធ្វើការប្រគល់ទទួលការដ្ឋានដែលស្ថាបនាហើយបែបនេះ ហើយឃើញថាការស្ថាបនាបានអនុលោមទៅតាមបទដ្ឋានបច្ចេកទេសត្រឹមត្រូវ ហើយគុណភាពទៀតសោតក៏ល្អទទួលយកបាន។ ចំណុចមួយទៀតដែលល្អគឺក្រុមហ៊ុន POLY CHANGDAនេះបានស្ថាបនាកំណាត់ផ្លូវប្រវែង ៣១,២៥២ គីឡូម៉ែត្រនេះក្នុងរយៈពេល ៩ ខែ គឺបានបញ្ចប់មុនកិច្ចសន្យាស្ថាបនាដល់ទៅ ៩ ខែ ។ តាមកិច្ចសន្យាក្រុមហ៊ុនត្រូវស្ថាបនាក្នុងរយៈពេល ១៨ ហើយថែទាំ ៦០ ខែ តែការស្ថាបនាហើយក្នុងរយៈពេលមុនផែនការ ៩ ខែបែបនេះ ធ្វើឲ្យចំណេញដល់ក្រុមហ៊ុនស្ថាបនា និងក្រសួងយើងក៏ចំណេញដែរ ។ បន្តទៅទៀតគឺយើងដាក់ផ្លូវ ៣១,២៥២គីឡូម៉ែត្រនេះស្ថិតក្នុងដំណាក់កាលថែទាំដែលមានថិរវេលា ៦០ ខែ ។
ឯកឧត្តមបន្ដថា កំណត់ផ្លូវ ៣១,២៥២ គីឡូម៉ែត្រនេះ គឺជាកំណាត់ផ្លូវមួយក្នុងចំណោមកំណាត់ផ្លូវ ៤ខ្សែ ដែលក្រសួងសាធារណការ និងដឹកជញ្ជូនបានទទួលថវិការសម្បទានពីធនាគាពិភពលោកក្នុងទឹកប្រាក់ចំនួន ៧០ លានដុល្លារអាមេរិក ។ កំណាត់ផ្លូវ ៣១,២៥២ គីឡូម៉ែត្រនេះ មានតម្លៃសរុបទាំងការស្ថាបនា និងថែទាំមានចំនួន ១២,៧ លានដុល្លារអាមេរិក ។ ទឹកប្រាក់ចំនួន ១២,៧ លានដុល្លារ នេះសម្រាប់ការស្ថាបនាទៅលើការលើកកម្រិតពីផ្លូវចាស់ដែលជាប្រភេទផ្លូវកៅស៊ូពីស្រទាប់ឬ DBST ពីទទឹង ៧ ម៉ែត្រ ទៅជាផ្លូវចាក់កៅស៊ូបេតុង AC ដែលមានទទឹង ១០ ម៉ែត្រ ហើយនិងរយៈពេលថែទាំ ៦០ ខែ ។ ក្រុមហ៊ុន POLY CHANGDA នេះ ជាក្រុមហ៊ុនអន្តរជាតិរបស់ប្រទេសចិន ក្រុមហ៊ុននេះមានវត្តមានក្នុងការស្ថាបនាផ្លូវថ្នល់នៅក្នុងប្រទេសកម្ពុជាយើងចាប់តាំងពីឆ្នាំ ២០០៦ មកម្ល៉េះ ។ ខ្ញុំចាំបានថា គម្រោងដែលក្រុមហ៊ុន POLY CHANGDA នេះបានស្ថាបនាទីមួយក្នុងប្រទេសកម្ពុជាយើងគឺស្ថាបនាស្ពានលូនៅផ្លូវជាតិលេខ ៥៦ និងផ្លូវជាតិលេខ ៦៨ ក្រោមគម្រោងធនាគារអភិវឌ្ឍន៍អាស៊ី ។
ឯកឧត្តមបន្ដទៀតថា ក្រុមហ៊ុននេះតែងតែមានវត្តមានក្នុងការស្ថាបនាគម្រោងធនាគារអភិវឌ្ឍន៍អាស៊ី និងធនាគារពិភពលោកជាបន្តបន្ទាប់រហូតមកទល់ពេលនេះ ។ យើងសង្កេតឃើញថា ក្រុមហ៊ុននេះតែងប្រឹងប្រែងអនុវត្តការងារប្រកបដោយគុណភាពល្អ ហើយទទួលយកបាន ។ ខ្ញុំសូមកោតសរសើរក្រុមហ៊ុននេះ ។ ឯកឧត្តមគិតថា មកទល់ពេលនេះយើងអាចសន្មតបាន ហើយគួរបែងចែកវិស័យដឹកជញ្ជូនដែលរីកចម្រើនក្រោមសម័យសម្ដេចតេជោសែនគឺមកទល់ឆ្នាំ ២០២៣ ហើយនៅសម័យសម្ដេចធិបតីចាប់ពីឆ្នាំ ២០២៣ តទៅ ។
ក្នុងសម័យសម្ដេចតេជោសែន យើងបានស្ដារផ្លូវជាតិ ផ្លូវខេត្តបានជាង ៦ ពាន់គីឡូម៉ែត្រ គឺខ្ញុំមានន័យសំដៅទៅលើផ្លូវថ្នល់ដែលយើងក្រាលកៅស៊ូ ឬក្រាលបេតុង ហើយក៏បូករួមទាំងផ្លូវក្រាលកៅស៊ូ ក្រួសក្រហម និងផ្លូវក្រសួងអភិវឌ្ឍន៍ជនបទ ។ បន្ថែមទៀតនោះគឺយើងបានស្ដារប្រវែងរាប់សែនគីឡូម៉ែត្រ ប្រជាពលរដ្ឋអាចធ្វើដំណើរទៅកាន់គ្រប់ទិសទីច្រកល្ហកនៃព្រះរាជាណាចក្រកម្ពុជាយើង ។ នេះជាសក្ខីភាពដ៏ច្បាស់អំពីជោគជ័យដ៏ធំធេងនៃគោលនយោបាយ សមាហរណកម្មជាតិលើវិស័យដឹកជញ្ជូន ចំណែកឯកិច្ចការសមាហរណកម្មកម្ពុជាទៅក្នុងតំបន់ យើងបានស្ថាបនាផ្លូវសេដ្ឋកិច្ចសំខាន់សំខាន់ដូចជាផ្លូវលេខ ១ លេខ ៥ លេខ ៤ លេខ ៦ លេខ ៧ និងផ្លូវច្រករបៀងជាច្រើនទៀតដែលបង្កការងាយស្រួលក្នុងការធ្វើពាណិជ្ជកម្មរវាងកម្ពុជាជាមួយប្រទេសវៀតណាម និងថៃ ។
ឯកឧត្តមបានបញ្ជាក់ថា យើងបានស្តារឡើងវិញនូវផ្លូវអយស្ម័យយានខ្សែខាងត្បូងពីភ្នំពេញទៅកំពង់ផែក្រុងព្រះសីហនុ ដែលជាកំពង់ផែទឹកជ្រៅតែមួយគត់របស់កម្ពុជា ។ ខ្សែរថភ្លើងមួយខ្សែទៀតនៅទិសខាងជើង គឺផ្សារភ្ជាប់ភ្នំពេញទៅប៉ោយប៉ែត និងប្រទេសថៃ សម្រាប់បម្រើការដឹកជញ្ជូនទំនិញរវាងកម្ពុជា និងថៃនឹងដឹកទំនិញកសិកម្មតាមបណ្ដាខេត្តតាមដងផ្លូវរថភ្លើងនេះ។ យើងបានស្តារកំពង់ផែធំៗពីរសំខាន់ៗ គឺកំពង់ផែស្វយ័តក្រុងព្រះសីហនុសម្រាប់ដឹកជញ្ជូនទំនិញពីកម្ពុជាទៅអឺរ៉ុប ឥណ្ឌាមជ្ឈិមបូព៌ា និងអាហ្វ្រិក និងកំពង់ផែភ្នំពេញសម្រាប់ដឹកទំនិញទៅកំពង់ផែកាមាតទៅប្រទេសវៀតណាម ហើយបន្តទៅសហរដ្ឋអាមេរិក ។
ឯកឧត្តមបានបន្តថា យើងមានអាកាសយានដ្ឋានអន្តរជាតិទំនើបៗចំនួន៣នៅក្រុងភ្នំពេញ ក្រុងព្រះសីហនុ និងក្រុងសៀមរាប ដែលភ្ជាប់ការដឹកជញ្ជូនផ្លូវអាកាសពីកម្ពុជាទៅក្នុងតំបន់។ថ្មីៗនេះ គឺយើងបានដាក់ឲ្យដំណើរការអាកាសយានថ្មីនៅខេត្តសៀមរាប ។ នៅមានសមិទ្ធផលជាច្រើនទៀតដែលខ្ញុំរៀបរាប់មិនអស់ទេ ជារួមសមិទ្ធផលដ៏ធំធេងនេះត្រូវបានទទួលស្គាល់និងកោតសរសើរពីសំណាក់ដៃគូអភិវឌ្ឍន៍នៅបណ្ដាប្រទេស និងស្ថាប័នជាច្រើននៅលើឆាកអន្តរជាតិ ។ សមិទ្ធផលដ៏ធំធេងនេះ យើងសម្រេចបានក្រោមការដឹកនាំដ៏ឈ្លាសវៃបំផុតរបស់សម្តេចតេជោសែន អតីតនាយករដ្ឋមន្ត្រីនៃព្រះរាជាណាចក្រកម្ពុជា ជាបន្តទៅទៀត សម្ដេចធិបតីនាយករដ្ឋមន្ត្រីថ្មីនៃយើងបានដាក់ចេញនូវគោលនយោបាយ និងយុទ្ធសាស្ត្រលើវិស័យដឹកជញ្ជូនយ៉ាងច្បាស់លាស់ គឺទំនើបកម្មហេដ្ឋារចនាសម្ព័ន្ធដឹកជញ្ជូនគ្រប់អង្គភាព និងស្ថាបនាបន្ថែមនូវហេដ្ឋារចនាសម្ព័ន្ធដឹកជញ្ជូន ដែលវាចាំបាច់ ក្រសួងសាធារណការដឹកជញ្ជូន ក្រោមការដឹកនាំរបស់ឯកឧត្តម ប៉េង ពោធិ៍នា ក្រោមការរៀបចំផែនការ និងគម្រោងដើម្បីឈានទៅបានគោលនយបាយយុទ្ធសាស្ដ្ររបស់រាជរដ្ឋាភិបាល ។
ឯកឧត្តមបានបន្ដទៀតថា ជាក់ស្ដែងផ្លូវដែលយើងមកទទួលថ្ងៃនេះ ជាលទ្ធផលនៃគោលនយោបាយយុទ្ធសាស្ដ្រទំនើបកម្មនៃហេដ្ថារចនាសម្ព័ន្ធផ្លូវគោក ។ យើងបានលើកកម្រិតផ្លូវជាតិលេខ ១ ពីប្រភេទ DBST ទៅ AC ពីទទឹង ៧ ម៉ែត្រ ទៅ ១០ ម៉ែត្រ យើងបានលើកកម្រិតផ្លូវជាតិលេខ ៥ ទៅជា ៤ គន្លង លើកម្រិតផ្លូវជាតិលេខ ៤ ទៅជា ៤ គន្លងដែលមានប្រវែង ៤៣ គីឡូម៉ែត្រ ហើយកំពុងធ្វើផែនការដើម្បីត្រៀមធ្វើអោយផ្លូវជាតិ ៤ នេះទៅជា ៤ គន្លងនៃផ្លួវជាតិលេខ ៤ ទាំងមូលតែម្ដង ។ យើងកំពុងសិក្សាលើកម្រិតផ្លូវច្រករវាងសេដ្ឋកិច្ចកម្ពុជា និងវៀតណាម ដើម្បីឈានសម្រួលការដឹកជញ្ជូនទំនិញរវាងប្រទេសទាំងពីរ ដែលតាមការបាន់ស្មានទំហំពាណិជ្ជកម្មអាចឈានទៅដល់ ១០ ពាន់លានដុល្លារអាមេរិកនៅចុងឆ្នាំ ២០២៤ ។ ដោយឡែកកំពង់ផែ អាកាសយានដ្ធានក៏កំពុងស្ថិតក្នុងការធ្វើទំនើបកម្មពិណិជ្ជកម្មដែរ ។ ឯកឧត្តមសង្ឃឹមយ៉ាងមុតមាំថា គោលនយោបាយ និងយុទ្ធសាស្ដ្រ និងដឹកជញ្ជូនដែលសម្ដេចធិបតីនាយករដ្ធមន្ដ្រីយើងបានដាក់ចេញក្នុងអាណ្ដិតទី ៧ នេះ ពិតជាត្រឹមត្រូវហើយកំពុងចាប់ផ្តើមចេញជាផ្លែផ្កា ។
លោក Wen Miaojun នៃគម្រោង CW1 កំណាត់ផ្លូវជាតិលេខ ៧ នៃក្រុមហ៊ុន POLY CHANGDA សាខាកម្ពុជា ក៏បានបង្ហាញនូវមោទនភាពចំពោះការអនុវត្តរបស់ក្រុមការងារ ។ លោកបាននិយាយថា ៖ “យើងបានប្រមូលនូវបទពិសោធន៍ជាច្រើនក្នុងរយៈពេល ១៩ ឆ្នាំរបស់យើងនៅក្នុងប្រទេសកម្ពុជា ។ ការអនុវត្តគម្រោងនេះដោយជោគជ័យគឺដោយសារតែទទួលបានការគាំទ្រយ៉ាងពេញលេញពីទីស្នាក់ការកណ្តាលនៃក្រុមហ៊ុន និងការគ្រប់គ្រងប្រកបដោយប្រសិទ្ធភាពនៃខ្សែសង្វាក់ផ្គត់ផ្គង់ ។”
លោកក៏បានលើកឡើងផងដែរថា ដោយមានការជួយគ្រាំទ្រលើថវិកាគម្រោងដែលផ្តល់ដោយធនាគារពិភពលោក និងការណែនាំរបស់ក្រសួងសាធារណការ និងដឹកជញ្ជូន បានពង្រឹងបន្ថែមលើការអនុវត្ត និងសមិទ្ធផលនៃគម្រោងនេះ ។ លោក Wen Miaojun បាននិយាយថា ការបញ្ចប់គម្រោងនេះមុនកាលកំណត់ មិនត្រឹមតែធ្វើឲ្យប្រសើរឡើងគួរឱ្យកត់សម្គាល់នូវភាពងាយស្រួលក្នុងការធ្វើដំណើររបស់ប្រជាជនប៉ុណ្ណោះទេ ថែមទាំងបានលើកកម្ពស់ការតភ្ជាប់ការដឹកជញ្ជូនរវាងប្រទេសកម្ពុជា និងប្រទេសជិតខាងដូចជាប្រទេសឡាវ និងវៀតណាម ដែលរួមចំណែកដល់កំណើនសេដ្ឋកិច្ចក្នុងតំបន់ និងការអភិវឌ្ឍន៍សង្គម ៕ អត្ថបទសហការ
ចែករំលែកព័តមាននេះ