រាជធានីភ្នំពេញ៖ មូលនិធិ២៥រៀល របស់ក្រុមហ៊ុន វ័ន ហ្វ្រេតធើនីធី (វីតាល់) សហការជាមួយកាកបាទក្រហម រៀបចំផ្ដួចផ្ដើមនូវកម្មវិធីទិវាឆ្មបជាតិ-អន្តរជាតិ ក្រោមប្រធានបទ៖ “ពង្រឹងជំនាញវិជ្ជាជីវៈឆ្មប…
រាជធានីភ្នំពេញ៖ មូលនិធិ២៥រៀល របស់ក្រុមហ៊ុន វ័ន ហ្វ្រេតធើនីធី (វីតាល់) សហការជាមួយកាកបាទក្រហម រៀបចំផ្ដួចផ្ដើមនូវកម្មវិធីទិវាឆ្មបជាតិ-អន្តរជាតិ ក្រោមប្រធានបទ៖ “ពង្រឹងជំនាញវិជ្ជាជីវៈឆ្មប ដើម្បីលើកកម្ពស់សេវាថែទាំ ព្យាបាល សុខភាពមាតា ទារក និងយុវវ័យ ក្នុងបរិបទនៃការប្រែប្រួលអាកាសធាតុ” ដែលមានអ្នកចូលរួមប្រមាណ ១៥០នាក់ នាព្រឹកថ្ងៃទី៣ ខែឧសភា ឆ្នាំ២០២៤ នេះនៅមជ្ឈមណ្ឌលជាតិគាំពារ មាតា និងទារក ។
កម្មវិធីនេះទទួលបានការចូលរួមក្រោមអធិបតីភាពរបស់លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងជាអនុប្រធានអចិន្ដ្រៃយ៍ក្រុមការងារឥស្សរជនឆ្នើមថ្នាក់ជាតិ, លោកជំទាវ ជឹង សុគន្ធាវី នាយិកាប្រតិបត្តិ ក្រុមហ៊ុន វ័ន ហ្វ្រេតធើនីធី (វីតាល់), វេជ្ជបណ្ឌិត គឹម រ័ត្ននា នាយិកាមជ្ឈមណ្ឌលជាតិគាំពារមាតា និងទារក និងវត្តមាន លោកគ្រូ អ្នកគ្រូពេទ្យ ឆ្មប ស្ត្រីមានផ្ទៃពោះ ថ្នាក់ដឹកនាំ និងបុគ្គលិកនៃស្ថាប័នទាំង ៣ ជាច្រើនអ្នកផ្សេងទៀត ។
ក្នុងឱកាសនោះ លោកជំទាវ ជឹង សុគន្ធាវី នាយិកាប្រតិបត្តិ ក្រុមហ៊ុន វ័ន ហ្វ្រេតធើនីធី (វីតាល់) បានថ្លែងដោយសេចក្ដីរីករាយ ដែលបានសហការជាថ្មីជាមួយ កាកបាទក្រហមកម្ពុជា និងក្រុមការងារឥស្សរជនឆ្នើមថ្នាក់ជាតិ ក្នុងការរៀបចំកម្មវិធីទិវាឆ្មបជាតិ-អន្តរជាតិ ៥ ឧសភា ដោយចូលរួមសាទរ និងសម្ដែងនូវការគោរពស្រឡាញ់ជូនឆ្មប រួមជាមួយការចែករំលែកការយល់ដឹង អំពីការថែទាំដ៏សំខាន់លើសុខភាពមាតា និងទារក ស្របនឹងបរិបទប្រែប្រួលអាកាសធាតុនាពេលបច្ចុប្បន្ន និងផ្ដាំផ្ញើឱ្យស្ត្រីជាមាតាពិសាទឹកឱ្យបានច្រើន យ៉ាងហោចណាស់ ២លីត្រក្នុងមួយថ្ងៃ ដើម្បីរក្សាតុល្យភាពជាតិទឹកក្នុងរាងកាយ ។
លោកជំទាវ បានបន្ថែមថា មូលបទសំខាន់មួយទៀត ដែលបន្តជំរុញឱ្យវីតាល់សហការផ្ដួចផ្ដើមរៀបចំកម្មវិធីនេះ ព្រោះវីតាល់ជឿថា ការផ្តល់ជូនទៅដល់សង្គម គឺជាការបង្កើតឱ្យមានវប្បធម៌ នៃការចែករំលែក ដែលវិស័យឯកជន គួរតែធ្វើតាមរយៈការផ្តល់ជំនួយ និងចូលរួមចំណែកលើកិច្ចការសង្គមផ្សេងៗទោះក្នុងរូបភាពណាក៏ដោយ។ ជាមួយគ្នានេះវីតាល់ ដែលមានមូលនិធិ២៥រៀល បានតាំងចិត្ត ក្នុងការបន្តគាំទ្រ និងបង្កើតឱ្យមានគម្រោងថ្មីៗបន្ថែមទៀត ដើម្បីចូលរួមក្នុងកិច្ចការងារសង្គមឱ្យកាន់តែទូលំទូលាយ ពិសេសលើសុខុមាលភាពសង្គម ដែលមាន សុខភាពមាតា ទារក និងកុមារ ។
ទន្ទឹមនឹងគ្នានេះដែរ លោកជំទាវ ម៉ែន នារីសោភ័គ អគ្គលេខាធិការរងទី១កាកបាទក្រហមកម្ពុជា និងជាអនុប្រធានអចិន្ត្រៃយ៍ក្រុមការងារឥស្សរជនឆ្នើមថ្នាក់ជាតិ បានពាំនាំនូវប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិក ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា និងជាឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គលេខាធិការអង្គការសហប្រជាជាតិដើម្បីសុខភាពស្ត្រី និងកុមារ ដែលផ្តាំផ្ញើសួរសុខទុក្ខ ក្តីនឹករលឹក អាណិតស្រឡាញ់ចំពោះប្រជាពលរដ្ឋទាំងអស់ និងជាពិសេសឆ្មប ដែលកំពុងបំពេញតួនាទីយ៉ាងមមាញឹក ក្នុងការថែទាំ ពិនិត្យ និងប្រឹក្សាជូនស្ត្រីមានផ្ទៃពោះ និងណែនាំឱ្យស្ត្រីជាមាតា មានការយកចិត្តទុកដាក់ខ្ពស់ គិតគូរពីសុខុមាលភាពរបស់ខ្លួនផងដែរ ។
ជាមួយគ្នានេះ លោកជំទាវ បានថ្លែងអំណរគុណចំពោះមជ្ឈមណ្ឌលជាតិគាំពារមាតា និងទារក ក្រុមគ្រូពេទ្យ ឆ្មប ដែលបានផ្តល់ទីកន្លែងសម្រាប់រៀបចំពិធី និងជួយសម្របសម្រួលផ្តល់សេវាសុខាភិបាលជូនប្រជាពលរដ្ឋ យ៉ាងសកម្ម ហើយជាពិសេសថ្លែងនូវការកោតសរសើរ និងអំណរគុណចំពោះគណៈគ្រប់គ្រងក្រុមហ៊ុន វ័ន ហ្វ្រេតធើនីធី (វីតាល់) ដែលបានរួមចំណែកយ៉ាងធំធេងជារឿយៗ ជាមួយកាកបាទក្រហមកម្ពុជា ជាក់ស្ដែងក្នុងការរៀបចំទិវាឆ្មបជាតិ-អន្តរជាតិ ២០២៤ លើកនេះក៏ដូចជាការរៀបចំកម្មវិធីក្នុងសង្គមផ្សេងៗជាច្រើនទៀតផងដែរ ។
គួរបញ្ជាក់ផងដែរថា វីតាល់ ជាក្រុមហ៊ុនវិស័យឯកជនគម្រូ ដែលមានមូលនិធិ ២៥រៀល ជានិច្ចកាល បន្តរក្សាមូលដ្ឋាន នៃការប្រើប្រាស់មូលធនដល់ការបង្កើតគម្រោងថ្មីៗ ជាពិសេសលើកិច្ចការងារសុខុមាលភាពសង្គម នៃវិស័យសុខាភិបាល ។ រាល់ការជាវទឹកពិសាវីតាល់១ដប លោកអ្នកបានចូលរួមចំណែកបរិច្ចាគចំនួន២៥រៀល ទៅក្នុងកិច្ចការសង្គមនានា របស់ក្រុមហ៊ុន វ័ន ហ្វ្រេតធើនីធី (វីតាល់) ។
ក្រុមហ៊ុនទឹកពិសាវីតាល់ ជាក្រុមហ៊ុនផលិតទឹកពិសារបស់ប្រជាជនខ្មែរ ដែលមានគុណភាពខ្ពស់ និងអនុលោមស្របតាមស្តង់ដារជាតិ និងអន្តរជាតិ ដែលបានឆ្លងកាត់ប្រព័ន្ធបន្សុទ្ធទឹកយ៉ាងទំនើប ពីប្រទេសអាល្លឺម៉ង់ ធានាបាននូវគុណភាពខ្ពស់ ហើយក៏ជាជម្រើសដ៏ស័ក្តិសមបំផុត សម្រាប់គ្រប់វ័យ គ្រប់កាលៈទេសៈ ។ វីតាល់ មោទនភាព ផលិតផលជាតិ ៕ អត្ថបទសហការ
ចែករំលែកព័តមាននេះ