យុវជនដែលជាមេដឹកនាំជំនាន់ក្រោយមកពីបណ្ដាប្រទេសសមាជិកអាស៊ានទាំង១០ បានស្វែងរកឱកាសកសាងកិច្ចសហប្រតិបត្តិការដើម្បីដោះស្រាយបញ្ហាប្រឈមក្នុងតំបន់ តាមរយៈកម្មវិធីអាហាររូបករណ៍យុវជនអាស៊ានដែលសហការរៀបចំដោយអង្គការមូលនិធិអន្តរជាតិសិង្ហបុរី  (SIF) និងក្រុមប្រឹក្សាយុវជនជាតិសិង្ហបុរី (NYC)។

ប្រទេសសិង្ហបុរី, ថ្ងៃទី ៧ ខែវិច្ឆិកា ឆ្នាំ ២០២២ ៖ យុវជនដែលជាមេដឹកនាំជំនាន់ក្រោយចំនួន ៤៥ នាក់ មកពីបណ្ដាប្រទេសសមាជិកអាស៊ានបានជួបជុំគ្នានៅប្រទេសសិង្ហបុរី ក្នុងកម្មវិធីអាហាររូបករណ៍យុវជនអាស៊ាន (ASEAN Youth Fellowship) លើកទី ៤ ដែលមានការសហការរៀបចំដោយអង្គការមូលនិធិអន្តរជាតិសិង្ហបុរី និងក្រុមប្រឹក្សាយុវជនជាតិសិង្ហបុរី ។

កម្មវិធីនេះ បានធ្វើឡើងចាប់ពីថ្ងៃទី ២៩ ខែតុលា ដល់ថ្ងៃទី ៤ ខែវិច្ឆិកា ក្នុងនោះរួមមាន ចាប់ពីថ្ងៃទី ២ ដល់ថ្ងៃទី ៤ ខែវិច្ឆិកា ដែលជាជុំទីពីរធ្វើឡើងនៅទីក្រុងហ្សាការតា ប្រទេសឥណ្ឌូនេស៊ី ក្នុងគោលបំណងជំរុញការផ្លាស់ប្តូរ និងបង្កើតឱកាសសម្រាប់កិច្ចសហប្រតិបត្តិការឆ្លងព្រំដែន ។

កម្មវិធីអាហាររូបករណ៍យុវជនអាស៊ាន ឆ្នាំ ២០២២ ដែលត្រូវបានបំផុសគំនិតដោយមូលបទដ៏មានអត្ថន័យរបស់កម្ពុជាដែលជាម្ចាស់ផ្ទះអាស៊ានគឺ “អាស៊ាន A.C.T ៖ ដោះស្រាយបញ្ហាប្រឈមទាំងអស់គ្នា” តាមរយៈការផ្តោតលើសកម្មភាពអាស៊ានរួមគ្នាដើម្បីជម្នះបញ្ហាជាច្រើន និងភាពមិនច្បាស់លាស់ផ្សេងៗក្នុងតំបន់ ។

យុវជនទាំងអស់បានចូលរួមក្នុងវគ្គសិក្ខាសាលាជាច្រើន ក៏ដូចជាកិច្ចសន្ទនា និងការជជែកគ្នាផ្សេងៗ ដើម្បីឈ្វេងយល់ពីនិន្នាការ និងភាពច្នៃប្រឌិតនៃសង្គមដែលរឹងមាំមួយ ជាពិសេសបច្ចេកវិទ្យាដើម្បីសុខុមាលភាព ទាំងសុខភាពផ្លូវចិត្ត និងសុខភាពផ្លូវកាយ។ លើសពីនេះ កម្មវិធីក៏បានផ្ដោតលើតួនាទីដែលយុវជនអាស៊ានអាចធ្វើបានក្នុងការចូលរួមដោះស្រាយបញ្ហាប្រឈមដើម្បីនាំមកនូវភាពវិជ្ជមានសម្រាប់ទាំងអស់គ្នា និងសិក្សាអំពីផលប៉ះពាល់រយៈពេលវែងទៅដល់អនាគតរួមរបស់ពួកគេ ។

យុវជនទាំងអស់នោះក៏បានមានឱកាសធ្វើទំនាក់ទំនងជាមួយមេដឹកនាំដែលមានគំនិតល្អៗជាច្រើន មកពីវិស័យផ្សេងៗគ្នា រួមមាន មន្ត្រីការិយាល័យសាធារណៈជាន់ខ្ពស់ ដូចជារដ្ឋមន្ត្រីក្រសួងសុខាភិបាលសិង្ហបុរី លោក អុង យៀ ខុង (Ong Ye Kung) និងរដ្ឋមន្ត្រីក្រសួងអប់រំ វប្បធម៌ ស្រាវជ្រាវ និងបច្ចេកវិទ្យារបស់ឥណ្ឌូនេស៊ី លោក ណាដៀម អានវ៉ា ម៉ាខារីម (Nadiem Anwar Makarim) ជាដើម ។

នៅក្នុងកិច្ចសន្ទនាថ្នាក់រដ្ឋមន្ត្រីផងដែរ លោក ណាដៀម អានវ៉ា ម៉ាខារីម បានមានប្រសាសអំពីសារៈសំខាន់នៃការអភិវឌ្ឍន៍ភាពជាអ្នកដឹកនាំក្នុងចំណោមយុវជនជំនាន់ក្រោយដើម្បីត្រៀមខ្លួនសម្រាប់ថ្ងៃអនាគត ។

គាត់បានមានប្រសាសថា “បញ្ហាប្រឈមមួយដែលយុវជនមេដឹកនាំជំនាន់ក្រោយនឹងត្រូវប្រឈមនាពេលអនាគតនោះ គឺ ការបង្រូបបង្រួមវិស័យផ្សេងៗឲ្យមានការសហការជាមួយគ្នា ។ ពីព្រោះពេលនេះជាពេលដែលវិស័យសាធារណៈ ឯកជន និងប្រជាជនត្រូវសហការគ្នា ដើម្បីសម្រេចបាននូវការអភិវឌ្ឍន៍សហគមន៍ប្រកបដោយចីរភាព ។ យុវជនជំនាន់ក្រោយត្រូវនាំមុខដឹកនាំឲ្យមានការសហការរួមគ្នាកើតឡើងដើម្បីបង្កើតផលវិជ្ជមានក្នុងសង្គម” ។

នៅក្នុងប្រទេសទាំងពីរខាងលើនេះ យុវជនទាំងអស់បានរៀនសូត្រនូវបទពិសោធន៍ផ្ទាល់ពីដំណើរការសិក្សា ដែលត្រូវបានរចនាឡើងដើម្បីផ្តល់ឱ្យពួកគេនូវការយល់ដឹងអំពីភាពច្នៃប្រឌិតក្នុងសង្គម សន្តិសុខស្បៀង និងការគ្រប់គ្រងវិបត្តិស្បៀងអាហារ និងជាពិសេសនិរន្តរភាពនៃបរិស្ថាន ។

នៅក្នុងប្រទេសសិង្ហបុរី យុវជនទាំងនោះបានទៅទស្សនាភូមិមួយដែលមានឈ្មោះថា Enabling Village ដែលជាកន្លែងសហគមន៍រួមបញ្ចូលគ្នាដើម្បីគាំទ្រជនពិការ ។ បន្ទាប់មកទៀត ពួកគេបានទៅទស្សនកិច្ចបន្តនៅតំបន់ Geylang ដឹកនាំដោយក្រុមការងាររបស់ Citizen Adventures ដែលជាសហគ្រាសសង្គមមួយ តែងតែធ្វើការផ្តោតសំខាន់ និងចែករំលែកនូវចំណេះដឹងទៅក្នុងតំបន់ជិតខាងអំពីទំនាក់ទំនងគ្នាជាប្រព័ន្ធអេកូសង្គម ។ លើសពីនេះ ពួកគេក៏បានទៅទស្សនកិច្ចនៅក្រុមហ៊ុន Innovate 360 ដែលជាក្រុមហ៊ុនផលិតចំណីអាហារដំបូងគេរបស់ប្រទេសសិង្ហបុរី ។ កន្លងមក ក្រុមហ៊ុននេះធ្លាប់បានជួយដល់ការចាប់ផ្ដើមអាជីវកម្ម Start-up លើចំណីអាហារប្រមាណជាជាង ៨០ ឱ្យមានភាពរីកចម្រើន និងពង្រីកទីផ្សារទៅកាន់តំបន់អាស៊ីរួចមកហើយ ។

ដោយឡែក នៅឯទីក្រុងហ្សាការតា ចាប់ពីថ្ងៃទី ២ ដល់ថ្ងៃទី ៤ ខែវិច្ឆិកា វិញ យុវជនទាំងអស់ដែលបានចូលរួមក្នុងកម្មវិធីនេះ បានទៅទស្សនកិច្ចនៅកន្លែងកែឆ្នៃ និងកន្លែងចាក់សំរាម ដែលគ្រប់គ្រងដោយ Waste4Change ដែលជាក្រុមហ៊ុនផ្តល់សេវាប្រឹក្សាស្វែងរកដំណោះស្រាយផ្នែកការគ្រប់គ្រងកាកសំណល់ប្រកបដោយការទទួលខុសត្រូវនៅប្រទេសឥណ្ឌូនេស៊ី ។ ពួកគេក៏បានបន្តធ្វើទស្សនកិច្ចនៅលេខាធិការដ្ឋានអាស៊ាននាទីក្រុងហ្សាការតា ហើយនៅក្នុងកម្មវិធីជជែកពិភាក្សាមួយ ពួកគេក៏បានជួបជាមួយនាយកផ្នែកនយោបាយ និងសន្តិសុខ គឺលោកបណ្ឌិត តាង ស៊ូ មុន (Tang Siew-Mun) ផងដែរ ។ ការពិភាក្សានេះ បានលើកយកបញ្ហាសំខាន់ៗដែលអាស៊ានកំពុងប្រឈមមុខ និងរបៀបដែលយុវជនអាចធ្វើការរួមគ្នាដើម្បីបង្កើនកិច្ចសហប្រតិបត្តិការក្នុងតំបន់ផងដែរ ។

អ្នកស្រី ជីន តាន (Jean Tan) នាយកប្រតិបត្តិនៃអង្គការមូលនិធិអន្តរជាតិសិង្ហបុរី បានមានប្រសាសន៍ថា ៖ “កម្មវិធីអាហាររូបករណ៍យុវជនអាស៊ាន ឆ្នាំ ២០២២ មានគោលបំណងផ្តួចផ្តើមការសន្ទនា និងស្វែងរកដំណោះស្រាយជុំវិញបញ្ហាសំខាន់ៗមួយចំនួនដែលយើងប្រឈមមុខសព្វថ្ងៃនេះ រាប់ចាប់តាំងពីសុខភាពផ្លូវចិត្ត និងភាពរឹងមាំនៃសង្គម រហូតដល់បញ្ហាសន្តិសុខស្បៀង ការគ្រប់គ្រងកាកសំណល់ ភាពចម្រុះគ្នានិងបរិយាប័ន្ន ។ ក្នុងនាមជាយុវជនដែលមានភាពជាអ្នកដឹកនាំមកពីវិស័យផ្សេងៗគ្នា មិនថានៅក្នុងវិស័យសាធារណៈ ឯកជន ឬសង្គមស៊ីវិលនោះទេ យុវជនទាំងអស់ត្រូវបានយកចិត្តទុកដាក់ និងផ្ដល់ធនធានគ្រប់គ្រាន់ក្នុងការអង្កេតពីបញ្ហាប្រឈមទាំងអស់នេះ ហើយធ្វើការរួមគ្នាដើម្បីបង្កើតការផ្លាស់ប្តូរជាវិជ្ជមាន” ។

អ្នកស្រីបានបន្ថែមថា “ដោយផ្តោតលើកិច្ចសហប្រតិបត្តិការអន្តរជាតិសម្រាប់ការអភិវឌ្ឍ អង្គការមូលនិធិអន្តរជាតិសិង្ហបុរីបានត្រៀមខ្លួនរួចជាស្រេចក្នុងការធ្វើការជាមួយអតីតសមាជិកនៃកម្មវិធីអាហាររូបករណ៍យុវជនអាស៊ានទាំងអស់ ដើម្បីកសាងអាស៊ានប្រកបដោយនិរន្តរភាពជាងមុន តាមរយៈគម្រោងសហគមន៍ក្នុងវិស័យអប់រំ ការថែទាំសុខភាព សហគ្រិនភាពសង្គម និងសិល្បៈជាដើម” ។

លោក ដេវីដ ឆួ (David Chua) នាយកប្រតិបត្តិនៃក្រុមប្រឹក្សាយុវជនជាតិសិង្ហបុរី បានលើកឡើងថា “នៅពេលដែលពិភពលោកកំពុងងើបឡើងវិញពីជំងឺរាតត្បាតកូវីដ ១៩ នៅមានបញ្ហាជាច្រើនដែលយើងត្រូវប្រឈមនាពេលខាងមុខ ។ ដូច្នេះ វាពិតជាមានសារៈសំខាន់ជាងពេលណាៗទាំងអស់សម្រាប់អាស៊ាន ក្នុងការងើបឈរដោយឯកភាពគ្នា និងយកចិត្តទុកដាក់ចំពោះអនាគតរបស់យើង ហើយត្រូវប្រាកដថាគ្មាននរណាម្នាក់ត្រូវបានបោះបង់ចោលនោះទេ ។ យើងត្រូវខិតខំដើម្បីឱ្យយុវជនអាចបោះជំហានទៅមុខ និងបង្ហាញថាពួកគេគឺជាអ្នកដឹកនាំជំនាន់ក្រោយ” ។

លោក គឹម បូរា សមាជិកមកពីប្រទេសកម្ពុជា ដៃគូជាន់ខ្ពស់និងនាយកនៅដៃគូយុទ្ធសាស្ត្រមេគង្គបាននិយាយថា “ការចូលរួមកម្មវិធីអាហាររូបករណ៍យុវជនអាស៊ាន គឺជាឱកាសមួយដ៏កម្រក្នុងជីវិត ។ ខ្ញុំមានភាពត្រេកអរណាស់ដែលបានជួបជាមួយអ្នកបង្កើតគោលនយោបាយជាន់ខ្ពស់និងអ្នកជំនាញក្នុងវិស័យផ្សេងៗ​ពីប្រទេសសិង្ហបុរី និងឥណ្ឌូនេស៊ី ដែលកំពុងធ្វើឲ្យមានផលវិជ្ជមាននៅក្នុងវិស័យនីមួយៗរបស់ពួកគាត់ ។ ការចូលរួមនេះបានបំផុសគំនិតឱ្យខ្ញុំឆ្លុះបញ្ចាំងពីអ្វីដែលខ្ញុំអាចធ្វើបាន ដើម្បីរួមចំណែកដល់ប្រទេសកម្ពុជា និងអាស៊ានឲ្យកាន់តែប្រសើរឡើងនៅក្នុងប៉ុន្មានឆ្នាំខាងមុខនេះ” ។

លោក បោង ច័ន្ទសម្បត្តិ ជាសមាជិកមួយទៀតដែលមកពីប្រទេសកម្ពុជាបានលើកឡើងថា “សម្របពេលដែលប្រទេសកម្ពុជាធ្វើជាប្រធានអាស៊ាននៅឆ្នាំនេះ ខ្ញុំមានកិត្តិយសខ្លាំងណាស់ដែលបានធ្វើជាសមាជិកតំណាងប្រទេសរបស់ខ្ញុំនៅក្នុងកម្មវិធីអាហាររូបករណ៍យុវជនអាស៊ាន ឆ្នាំ ២០២២ ។ ចំណុចដែលគួរឲ្យកត់សំគាស់នោះគឺការជួបជុំជាមួយយុវជនដែលមានផ្នត់គំនតដូចគ្នាជាច្រើននៅទូទាំងតំបន់អាស៊ាន ។ ខ្ញុំបានរៀនសូត្រច្រើនពីពួកគាត់ ហើយទន្ទឹងរង់ចាំការសហការជាមួយពួកគាត់ផងដែរ” ។

លោក បោង ច័ន្ទសម្បត្តិ គឺជានាយករងមជ្ឈមណ្ឌលសេដ្ឋកិច្ចឌីជីថលប្រកបដោយបរិយាប័ន្ននៃវិទ្យាស្ថានចក្ខុវិស័យអាស៊ី។ លោកបានបន្តទៀតថា “ទោះបីយើងមានសាវតាខុសគ្នាក៏ដោយ តែពួកយើងមានទំនួលខុសត្រូវដូចគ្នាក្នុងការអភិវឌ្ឍអាស៊ានឲ្យក្លាយជាសង្គមដែលរឹងមាំនិងត្រៀមខ្លួនរួចជាស្រេចសម្រាប់ពេលអនាគត” ។

កញ្ញា តាន់ ចន្ទ័ណារត្ន័ (ណាណា) ជាសមាជិកម្នាក់ទៀតដែលមកពីប្រទេសកម្ពុជាបាននិយាយថា “ត្រឹមតែមួយសប្តាហ៍ប៉ុណ្ណោះ នាងខ្ញុំបានទទួលការយល់ដឹងដ៏មានតម្លៃចំពោះបញ្ហាសំខាន់ៗដែលតំបន់អាស៊ានកំពុងប្រឈមមុខសព្វថ្ងៃនេះ ក្នុងនោះរួមមាន ពីសន្តិសុខស្បៀង រហូតដល់ការរួមបញ្ចូលក្នុងសង្គម ។ ហើយក៏ជាការបំផុសគំនិតដល់នាងខ្ញុំផងដែរ ដែលបានជួបអ្នកផ្លាស់ប្តូរ និងអង្គការជាច្រើនដែលកំពុងខិតខំប្រឹងប្រែងដោះស្រាយបញ្ហាសង្គមផ្សេងៗ” ។

កញ្ញាតាន់ ចន្ទ័ណារត្ន័ជាសាស្ត្រាចារ្យនៃវិទ្យាស្ថានសិក្សាអន្តរជាតិ និងគោលនយោបាយសាធារណៈ (IISPP) នៃសាកលវិទ្យាល័យភូមិន្ទភ្នំពេញ បាននិយាយបន្ថែមថា “សកម្មភាពនានានិងដំណើរការសិក្សានៃកម្មវិធីយុវជនអាស៊ានបានអនុញ្ញាតឱ្យយើងបង្កើតមិត្តភាព និងជំរុញឲ្យពួកយើងគិតឲ្យបានដឹតដល់អំពីសកម្មភាពដែលយើងអាចធ្វើរួមគ្នាបានដើម្បីទប់ទល់នឹងបញ្ហាប្រឈមថ្មីៗជាមួយគ្នានៅក្នុងពិភពលោកដែលមានការផ្លាស់ប្ដូរយ៉ាងឆាប់រហ័ស” ។

អង្គការមូលនិធិអន្តរជាតិសិង្ហបុរី (SIF) បានប្រារព្ធខួប ៣០ ឆ្នាំនៃកិច្ចសហប្រតិបត្តិការជាមួយប្រជាជនឥណ្ឌូនេស៊ីនៅឯកម្មវិធី SIF Connects នាទីក្រុងហ្សាការតា

កម្មវិធី SIF Connects បានសហការជាមួយនឹងកម្មវិធីអាហាររូបករណ៍យុវជនអាស៊ាន នៅទីក្រុងហ្សាការតា ក្នុងការផ្សារភ្ជាប់ទំនាក់ទំនងឡើងវិញ និងបន្តទំនាក់ទំនងជាមួយអតីតយុវជនមកពីកម្មវិធីយុវជនអាស៊ានទាំងអស់ និងយុវជនដែលមកពីកម្មវិធីមិត្តរបស់សិង្ហបុរី (FOS) ។ ព្រឹត្តិការណ៍នេះបានប្រព្រឹត្តទៅនៅថ្ងៃទី ៣ ខែវិច្ឆិកា ដែលមានអ្នកចូលរួមសរុបប្រមាណជាជាង ២០០ សមាជិក ក្នុងនោះរួមមានសមាជិកមកពីសហគមន៍ការទូត កម្មវិធីមិត្តរបស់សិង្ហបុរី និងប្រជាជនសិង្ហបុរីដែលមានមូលដ្ឋាននៅទីក្រុងហ្សាការតាទាំងអស់ ។

នៅក្នុងព្រឹត្តិការណ៍នេះ លោកឯកអគ្គរដ្ឋទូត អុង ខឺង យ៉ុង (Ong Keng Yong) ប្រធានអង្គការមូលនិធិអន្តរជាតិសិង្ហបុរីបានសម្តែងនូវការកោតសរសើរចំពោះទំនាក់ទំនងមិត្តភាពដ៏កក់ក្តៅ និងកិច្ចសហប្រតិបត្តិការជាមួយដៃគូឥណ្ឌូនេស៊ីអស់រយៈពេល ៣០ ឆ្នាំកន្លងមក។ លោកបានកត់សម្គាល់ថា ចាប់តាំងពីឆ្នាំ ១៩៩២ មក អង្គការមូលនិធិអន្តរជាតិសិង្ហបុរីបានសហការលើគម្រោង និងគំនិតផ្តួចផ្តើមជាង ១០០​ រួចមកហើយ នៅតាមបណ្ដាខេត្តដូចជានៅទីក្រុង បាន់ដា អាឆេ (Banda Aceh) ទីក្រុងបានឌុង (Bandung) ទីក្រុងហ្សាការតា (Jakarta) ទីក្រុងមឺដាន (Medan) ទីក្រុងស៊ូរ៉ាបាយ៉ា (Surabaya) និងទីក្រុងយ៉ុងយ៉ាការតា (Yogyakarta) ជាដើម។​ កិច្ចសហការទាំងនោះទាក់ទងនឹងវិស័យថែទាំសុខភាព វិស័យអប់រំ សហគ្រិនភាពសង្គម សិល្បៈ និងវប្បធម៌ជាដើម ។

លោកបានលើកឡើងថា អង្គការមូលនិធិអន្តរជាតិសិង្ហបុរី បានមានកិត្តិយសទទួលបាននូវពានរង្វាន់ Adinata Awardដែលផ្ដល់ជូនដោយស្ថានទូតឥណ្ឌូនេស៊ីប្រចាំនៅសិង្ហបុរី ក្នុងខែសីហា ឆ្នាំ២០២២។ ពានរង្វាន់នេះបានបញ្ជាក់អំពីការអបអរសាទរភាពជាដៃគូយូរអង្វែងរបស់អង្គការជាមួយប្រទេសឥណ្ឌូនេស៊ីនៅក្នុងការលើកកម្ពស់ជីវិតរស់នៅរបស់ប្រជាជន និងពង្រឹងទំនាក់ទំនងរវាងប្រជាជនសិង្ហបុរី និងឥណ្ឌូនេស៊ី ។

នៅក្នុងការថ្លែងសុន្ទរកថាទៅកាន់សហគមន៍ឥណ្ឌូនេស៊ីនៅក្នុងព្រឹត្តិការណ៍នោះ លោកបាននិយាយថា “ពានរង្វាន់នេះគឺជាការលើកទឹកចិត្តដ៏អស្ចារ្យមួយសម្រាប់ទាំងអស់គ្នាដែលមានវត្តមាននៅក្នុងអង្គការមូលនិធិអន្តរជាតិសិង្ហបុរី ក្នុងនោះរួមមាន អ្នកស្ម័គ្រចិត្ត និងបុគ្គលិករបស់យើង ដែលបានខិតខំធ្វើការជាមួយអ្នកទាំងអស់គ្នា ដើម្បីធ្វើឱ្យពិភពលោករបស់យើងកាន់តែប្រសើរឡើង” ។

អំពីអង្គការមូលនិធិអន្តរជាតិសិង្ហបុរី

អង្គការមូលនិធិអន្តរជាតិសិង្ហបុរី ជាអង្គការដែលតែងតែបង្កើតមិត្តសម្រាប់ពិភពលោកដើម្បីភាពប្រសើរឡើង ។ យើងកសាងទំនាក់ទំនងល្អយូរអង្វែងរវាងប្រជាជនសិង្ហបុរី និងសហគមន៍នៅលើពិភពលោក ហើយប្រើប្រាស់មិត្តភាពនេះដើម្បីបង្កើនគុណភាពជីវិត និងមានឥទ្ធិពលលើការផ្លាស់ប្តូរជាវិជ្ជមាន ។ ការងាររបស់យើងត្រូវបានឈរជើងយ៉ាងរឹងមាំ ហើយយើងជឿថាអន្តរកម្មរវាងវប្បធម៌ចម្រុះគ្នាបានផ្តល់នូវការយល់ដឹងដែលពង្រឹងការយោគយល់គ្នាបានកាន់តែល្អ។ ការផ្លាស់ប្តូរវប្បធម៌ និងចំណេះដឹងទាំងនេះបានជំរុញឱ្យចេញជាសកម្មភាព និងអនុញ្ញាតឱ្យមានកិច្ចសហការល្អរវាងគ្នានិងគ្នា។ គ្រប់បណ្ដាកម្មវិធីរបស់យើងតែងតែនាំមកនូវការរួបរួមគ្នាដើម្បីចែករំលែកគំនិត ចំណេះ ជំនាញ និងបទពិសោធក្នុងវិស័យនានាដូចជា វិស័យសុខាភិបាល អប់រំ សិល្បៈ និងវប្បធម៌ ក៏ដូចជាការប្រកបរបរចិញ្ចឹមជីវិត និងអាជីវកម្ម។ យើងធ្វើយ៉ាងដូច្នេះ ដោយសារយើងជឿជាក់ថា យើងទាំងអស់គ្នាអាចធ្វើបាន និងគួរតែបំពេញករណីយកិច្ចដែលជាចំណែករបស់យើង ដើម្បីចូលរួមកសាងពិភពលោកមួយឱ្យកាន់តែប្រសើរឡើង ដើម្បីទទួលបាននូវពិភពលោកមួយដែលយើងអាចស្រមៃឃើញនូវសន្តិភាព បរិយាបន្ន និងផ្តល់ឱកាសសម្រាប់ទាំងអស់គ្នា ។

ស្វែងយល់បន្ថែមតាមរយៈតំណរភ្ជាប់ ៖ www.sif.org.sg

អំពីក្រុមប្រឹក្សាយុវជនជាតិសិង្ហបុរី

ក្រុមប្រឹក្សាយុវជនជាតិសិង្ហបុរីជឿជាក់ទៅលើពិភពលោកមួយដែលយុវជនត្រូវបានគេគោរព និងទទួលដឹងឮ និងមានទីភ្នាក់ងារជាជំនួយដើម្បីធ្វើការផ្លាស់ប្តូរជាវិជ្ជមាន ។ តាមរយៈការធ្វើការជាមួយដៃគូ យើងរួមគ្នាអភិវឌ្ឍយុវជនឱ្យក្លាយជាធនធានដែលមានការប្តេជ្ញាចិត្ត និងត្រៀមខ្លួនរួចជាស្រេច ដើម្បីប្រទេសសិង្ហបុរី តាមរយៈការបណ្តុះបេះដូងដែលចេះចែករំលែក ភាពតស៊ូអត់ធ្មត់ និងស្មារតីច្នៃប្រឌិត ។ យើងទទួលស្គាល់នូវតម្រូវការ និងសេចក្តីប្រាថ្នាដែលមានភាពចម្រុះរបស់យុវជនសិង្ហបុរី ហើយធានាថាយុវជនរបស់យើងទទួលបានឱកាសក្នុងការអភិវឌ្ឍការយល់ដឹងដោយខ្លួនឯង និងធ្វើឱ្យស្មារតីសហគមន៍កាន់តែមុតមាំ និងត្រៀមខ្លួនជាស្រេចសម្រាប់អនាគត។ យើងស្ដាប់ឮយុវជន យើងពង្រឹងសិទ្ធិអំណាចយុវជន ហើយយើងនៅទីនេះដើម្បីយុវជន ៕ អត្ថបទសហការ

ស្វែងយល់បន្ថែមតាមរយៈតំណរភ្ជាប់ ៖ https://www.nyc.gov.sg

សម្រាប់ព័ត៌មានបន្ថែម សូមទាក់ទង៖

អ្នកស្រី Nessi Nasrudin

អ្នកគ្រប់គ្រងផ្នែកទំនាក់ទំនង

អង្គការមូលនិធិអន្តរជាតិសិង្ហបុរី

អ៊ីម៉ែល៖ nessi.nasrudin@sif.org.sg

ទូរស័ព្ទលេខ៖ (65) 9060 6477

អ្នកស្រី Germaine Lok   

ជំនួយការអ្នកគ្រប់គ្រងផ្នែកទំនាក់ទំនង

អង្គការមូលនិធិអន្តរជាតិសិង្ហបុរី

អ៊ីម៉ែល៖ germaine.lok@sif.org.sg

ទូរស័ព្ទលេខ៖ (65) 9799 1579

បញ្ជីរាយឈ្មោះសមាជិកកម្មវិធីអាហាររូបករណ៍យុវជនអាស៊ាន ឆ្នាំ២០២២