រាជធានីភ្នំពេញ ៖ សម្ដេចតេជោនាយករដ្ឋមន្ត្រី ហ៊ុន សែន បានថ្លែងថា នារយៈពេលចុងក្រោយនេះ ស្ថានភាពពិភពលោកមានលក្ខណៈល្អប្រសើរទៅបាន នៅពេលអាមេរិក-ចិនគ្រោងចុះកិច្ចព្រមព្រៀងពាណិជ្ជកម្មរវាងប្រទេសទាំងពីរ។ថ្លែងក្នុងពិធីប្រគល់សញ្ញាបត្រដល់និស្សិតសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ច(RULE) កាលពីថ្ងៃទី២៦ ខែធ្នូ ឆ្នាំ២០១៩ សម្ដេចតេជោ ហ៊ុន សែន បានរំឭកថា កន្លងទៅនេះ ចិន-កូរ៉េខាងត្បូង-ជប៉ុន បានជួបប្រជុំគ្នានៅចិន ។
ដូច្នេះ ប្រទេសទាំង៣នេះ នឹងមានការត្រូវគ្នាដែលអនុវត្តតាមពហុភាគីនិយម ដើម្បីកាត់បន្ថយការលំបាកនៃសង្គ្រាមពាណិជ្ជកម្មរវាងអាមេរិក-ចិន ព្រមទាំងអាមេរិកជួបជាមួយបណ្ដាប្រទេសដទៃ ។ សម្ដេចតេជោបន្ដថា ក្នុងកិច្ចប្រជុំរវាងប្រទេសទាំង៣ មានចិន-កូរ៉េខាងត្បូង-ជប៉ុន នាពេលកន្លងទៅនេះ គឺជារឿងល្អសម្រាប់សេដ្ឋកិច្ចក្នុងតំបន់ ។ សព្វថ្ងៃនេះសេដ្ឋកិច្ចអាមេរិកលេខ១ ចិនលេខ២ ជប៉ុនលេខ៣ ហើយទំហំសេដ្ឋកិច្ចរវាងប្រទេសទាំង៣នេះមានទំហំធំណាស់ ។
សម្ដេចតេជោគូសបញ្ជាក់ថា ស្ថានភាពទំនាក់ទំនងរវាងដៃគូទាំង៣នេះល្អ វាក៏ល្អប្រសើរមិនមែនសម្រាប់ប្រទេសទាំង៣នោះទេ គឺសម្រាប់តំបន់របស់យើងតែម្ដង ហើយដៃគូទាំងនេះទៀតសោត ក៏ស្ថិតនៅក្នុងកិច្ចព្រមព្រៀងភាពជាដៃគូគ្រប់ជ្រុងជ្រោយក្នុងតំបន់ ដែលហៅថា អាសិប ។ ជាមួយគ្នានេះ សម្ដេចតេជោក៏បានលើកឡើងថា ប្រធានាធិបតីអាមេរិកលោក ដូណាល់ត្រាំ ប្រកាសថានឹងចុះកិច្ចព្រមព្រៀងពាណិជ្ជកម្មរវាងអាមេរិក-ចិន ។ បញ្ហាទាំងនេះ នឹងធ្វើឲ្យពិភពលោកមានស្ថានភាពល្អប្រសើរទៅលើបញ្ហាដំណើរក្នុងចរន្ដ នៃសាកលពហុពាណិជ្ជកម្ម និងពហុភាគីនិយម ។
សម្ដេចតេជោបន្ដថា បើយោងទៅលើអ្វីដែលប្រធានាធិបតីសហរដ្ឋអាមេរិកបាននិយាយថា នឹងមានការចុះហត្ថលេខាលើកិច្ចព្រមព្រៀងពាណិជ្ជកម្មរវាងអាមេរិក-ចិន នោះវាជាសារនយោបាយមួយល្អ បើសិនរឿងនេះក្លាយទៅជាការពិត ។ ជម្លោះពាណិជ្ជកម្មរវាងអាមេរិកនិងចិន នឹងត្រូវបានកាត់បន្ថយ ហើយជំនួសមកវិញកិច្ចព្រមព្រៀងពាណិជ្ជកម្មមួយ ដែលប្រធានាធិបតីអាមេរិកលោក ដូណាល់ ត្រាំ ថា នឹងចុះហត្ថលេខាជាមួយប្រធានាធិបតីចិន លោក ស៊ី ជីនពីង ។
ជុំវិញបញ្ហាពាណិជ្ជកម្មអាមេរិក-ចិន សម្ដេចតេជោនាយករដ្ឋមន្ត្រី ហ៊ុន សែន ក៏បានលើកឡើងអំពីសង្គ្រាមពាណិជ្ជកម្មរវាងឥណ្ឌូណេស៊ី និងអឺរ៉ុប ។ សម្ដេចថ្លែងថា សង្គ្រាមពាណិជ្ជកម្មឥណ្ឌូណេស៊ី-អឺរ៉ុប ក៏មានការប្ដឹងគ្នាទៅវិញទៅមក ។ សម្ដេចតេជោបញ្ជាក់ថា សង្គ្រាមពាណិជ្ជកម្មរវាងឥណ្ឌូណេស៊ី-អឺរ៉ុប ក៏ជាកង្វល់របស់ពិភពលោកផងដែរ ក្នុងទំនាក់ទំនងពីប្រទេសមួយទៅប្រទេសមួយទៀត ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ