ខេត្តកំពង់ឆ្នាំង ៖ កំណាត់ផ្លូវលំមួយខ្សែនៅចំណុចពីវត្តយុគន្ធទៅកាន់ផ្លូវជាតិលេខ៥ដែលមានប្រវែងជាង៥គីឡូម៉ែត្រ ស្ថិតនៅក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ បានរងការខូចខាតបាក់ស្រុតជាច្រើនកន្លែងដោយសារទឹកភ្លៀងហូរច្រោះ និងទឹកទន្លេឡើងរលកបោកផ្ទប់កាលពីរដូវវស្សាកន្លងទៅនេះ នេះធ្វើឱ្យប្រជាពលរដ្ឋពិបាកធ្វើដំណើរយ៉ាងខ្លាំង ។…
ខេត្តកំពង់ឆ្នាំង ៖ កំណាត់ផ្លូវលំមួយខ្សែនៅចំណុចពីវត្តយុគន្ធទៅកាន់ផ្លូវជាតិលេខ៥ដែលមានប្រវែងជាង៥គីឡូម៉ែត្រ ស្ថិតនៅក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ បានរងការខូចខាតបាក់ស្រុតជាច្រើនកន្លែងដោយសារទឹកភ្លៀងហូរច្រោះ និងទឹកទន្លេឡើងរលកបោកផ្ទប់កាលពីរដូវវស្សាកន្លងទៅនេះ នេះធ្វើឱ្យប្រជាពលរដ្ឋពិបាកធ្វើដំណើរយ៉ាងខ្លាំង ។ ដូចនេះប្រជាពលរដ្ឋស្នើសុំអាជ្ញាធរស្រុក និងខេត្តក៏ដូចជាសប្បុរសជនផងដែរ មេត្តាជួយជួសជុលផ្លូវខូចខាតខាងលើនេះជូនពួកគាត់ដោយក្តីអនុគ្រោះផងចុះ ។
ប្រជាពលរដ្ឋភូមិឆ្នុកទ្រូរស់នៅជិតវត្តយុគន្ធ នៅព្រឹកថ្ងៃទី១៩ ខែធ្នូ ឆ្នាំ២០១៩ នេះបាននិយាយឱ្យដឹងថា ផ្លូវលំ១ខ្សែនេះបានកសាងឡើងកាលពីរដូវប្រាំងឆ្នាំ២០១៨-២០១៩ អស់ថវិការាប់សែនដុល្លារដែលជាជំនួយដ៏ថ្លៃថ្លា ប៉ុន្តែគួរឱ្យសោកស្តាយផ្លូវលំមួយខ្សែនេះបែរជាត្រូវខូចខាតដោយសារទឹកភ្លៀង និងទឹកទន្លេទៅវិញគឺមានការរលុះបាក់ និងស្រុត ក្លាយជាសំបុកមាន់ជាច្រើនកន្លែងធ្វើឱ្យការធ្វើដំណើរ ឬដឹកជញ្ជូនផលនេសាទ និងភោគផលកសិកម្មរបស់ប្រជាពរដ្ឋជួបការលំបាកយ៉ាងខ្លាំង ។
ទាក់ទងនឹងសំណូមពរខាងលើនេះលោក សាំង គឹមស៊ន មេឃុំឆ្នុកទ្រូបានឱ្យដឹងថា ផ្លូវលំខាងលើនេះពិតជារងការខូចខាតដូចប្រជាពលរដ្ឋបានលើកឡើងពិតមែន ។ ដោយឡែកឆ្លើយតបនឹងសំណូមពររបស់ប្រជាពលរដ្ឋនៅរដូវប្រាំងនេះលោកគ្រូចៅអធិការវត្តយុគន្ធបានមានថេរដីកាថា លោកនឹងចំណាយថវិការបស់វត្តជួយជួសជុលផ្លូវខាងលើនេះ ប៉ុន្តែលទ្ធភាពរបស់វត្តគឺមិនអាចធ្វើបាន១០០%នោះទេ ដែលត្រូវការអំពាវនាវឱ្យអាជ្ញាធរ ពុទ្ធបរិស័ទ និងសប្បុរសជួយទៅតាមសទ្ធា ទើបអាចធ្វើទៅបាន ៕
កែសម្រួលដោយ ៖ សំណាង
ចែករំលែកព័តមាននេះ