ខេត្តមណ្ឌលគិរី ៖ បញ្ហាជាច្រើនត្រូវបានប្រជាពលរដ្ឋលើកឡើងរួមមាន បញ្ហាចោរកម្ម គ្រឿងញៀន ប្រព័ន្ឋទឹកស្អាត ដើម្បីដាក់ជូនមន្ត្រីជំនាញដែលចូលរួមវេទិកាសាធារណ:ថ្នាក់ជាតិ គាំទ្រយុទ្ឋសាស្ត្រចតុកោណរបស់រាជរដ្ឋាភិបាលដំណាក់កាលទី៤ ដែលបានប្រព្រឹត្តទៅនៅវត្តព្រះពុទ្ឋមណ្ឌលគិរី នៅភូមិជ្រៃសែន សង្កាត់មនោរម្យ ក្រុងសែនមនោរម្យ ខេត្តមណ្ឌលគិរី នាព្រឹកថ្ងៃទី១៣ ខែធ្នូ ឆ្នាំ ២០១៩។
នៅក្នុងវេទិកានោះ ប្រជាពលរដ្ឋបានលើកឡើងពីបញ្ហាចោរកម្ម ក្មេងញៀនថ្នាំ ដែលតែងតែដើរលួចមាន់ទា លួចសំភារ: និងបង្កការភ័យខ្លាចដល់ប្រជាពលរដ្ឋក្នុងមូលដ្ឋាន ព្រមទាំងសំណូមពរដល់អាជ្ញាធរមានសមត្ថកិច្ចជួយទប់ស្កាត់បញ្ហាទាំងនេះ ជាពិសេសជួយពង្រឹងគោលនយោបាយភូមិឃុំមានសុវត្ថិភាព។អ្នកភូមិក៏បានសំណូមពរទៅអង្គភាពរដ្ឋាករទឹកខេត្ត ជួយតបណ្ដាញទឹកស្អាតទៅដល់ផ្ទះពួកគាត់ នៅភូមិជ្រៃសែន សង្កាត់មនោរម្យផង។
ឆ្លើយចំពោះការលើកឡើងនេះលោកវរ:សេនីយ៍ត្រី ចេង ម៉ាប់ អធិការងក្រុងសែនមនោរម្យ ក៏បានទទួលស្គាល់ចំពោះបញ្ហានេះ ហើយលោកស្នើសុំឲ្យប្រជាពលរដ្ឋត្រូវមានការប្រុងប្រយ័ត្នខ្ពស់ និងត្រូវរាយការណ៍ជូនសមត្ថកិច្ចភ្លាមៗពេលមានករណីចោរកម្មកើតឡើង ។ បន្ថែមលើនេះលោក ប៉េង សម្បត្តិ អភិបាលរងខេត្តបានជំរុញឲ្យអធិការដ្ឋាន ក៏ដូចប៉ុស្តិ៍រដ្ឋបាលចុះពង្រឹងការងារគ្រប់គ្រង ថែរក្សាសណ្ដាប់ធ្នាប់ សុវត្ថិភាព សន្តិសុខ ជូនប្រជាពលរដ្ឋក្នុងមូលដ្ឋាន និងត្រូវឆ្លើយតបអឲ្យបានទាន់ពេលវេលាចំពោះបញ្ហាដែលកើតឡើង ។
លោក អេង កុកថាយ អនុរដ្ឋលេខាធិការនៃទីស្ដីការគណ:រដ្ឋមន្ត្រី ក៏បានស្នើសុំឲ្យមន្ត្រីមានសមត្ថកិច្ច ត្រូវយកចិត្តទុកដាក់ទប់ស្កាត់ការជួញដូរ ការប្រើប្រាស់គ្រឿងញៀន ព្រោះគ្រឿងញៀនជាប្រភពនៃអំពើអសន្តិសុខ និង បញ្ហាជាច្រើនដល់សង្គម។ ដោយឡែក ការស្នើសុំបណ្ដាញទឹកស្អាត មន្ត្រីអង្គភាពរដ្ឋាករទឹកបានថ្លែងថា រដ្ឋាករទឹកខេត្តមណ្ឌលគិរី មានគំរោងតបណ្ដាញទឹកស្អាតទៅតំបន់មួយចំនួនក្នុងភូមិជ្រៃសែន តែតំបន់ដែលស្នើសុំមិនទាន់មានផែនការនៅឡើយ ដោយសារតែតំបន់នោះមានផ្ទះប្រជាពលរដ្ឋតិច ដែលត្រូវលើកសំរាប់ផែនការក្រោយ ៕ (កែសម្រួលដោយ ៖ ធីតា)
ចែករំលែកព័តមាននេះ