អាណិតណាស់! អតីតសិស្សឆ្នើម និទ្ទេស A មួយរូប ជំនួសឱ្យការអង្គុយក្នុងថ្នាក់មហាវិទ្យាល័យ បែរជាត្រូវដេកប្រយុទ្ធនឹងជំងឺនៅលើគ្រែ
- មណ្ឌលគិរី
ខេត្តមណ្ឌលគិរី ៖ ជារឿងដ៏អាណិតបំផុត សម្រាប់ធនធានមនុស្សដ៏កម្រប្រចាំខេត្តមណ្ឌលគិរី ដោយប្អូនប្រុសឈ្មោះ ងិន អ៉ីយាន អតីតសិស្សឆ្នើមលំដាប់និទ្ទេស A បច្ចុប្បន្នកំពុងតែធ្លាក់ខ្លួនឈឺធ្ងន់ធ្ងរ និងសម្រាកព្យាបាលនៅផ្ទះ ស្ថិតក្នុងភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ។
ដោយក្តីអាណិតអាសូរ នារសៀលថ្ងៃទី១៥ ខែមិថុនា ឆ្នាំ២០២៦ លោក សាន់ ដារិទ្ធិ អភិបាលរងខេត្តមណ្ឌលគិរី និងលោក អាន សុឃីម នាយកប្រតិបត្តិសាខាកាកបាទក្រហមខេត្ត បានចុះទៅសួរសុខទុក្ខដល់ផ្ទះប្អូនប្រុស។ក្នុងឱកាសនោះ ក្រុមការងារបាននាំនូវការសាកសួរសុខទុក្ខពីសំណាក់ ឯកឧត្តម គង់ គឹមនី អភិបាលខេត្ត និង អ្នកឧកញ៉ា អ៉ឹង ស៊ីតាតវីរៈ ប្រធានកិត្តិយសសាខាកាកបាទក្រហមខេត្ត ។ ថ្នាក់ដឹកនាំបានបញ្ជាក់ថារាល់ធនធានមនុស្សឆ្នើមរបស់ខេត្ត គឺមិនត្រូវបោះបង់ចោលឡើយ។
ដើម្បីជួយសម្រាលការលំបាក និងការចំណាយលើការព្យាបាល ថ្នាក់ដឹកនាំ និងសប្បុរសជនបានរួមគ្នាឧបត្ថម្ភនូវថវិកានិងស្បៀងអាហារ ដោយរដ្ឋបាលខេត្តមណ្ឌលគិរី អង្ករ ១០០ គីឡូក្រាម អ្នកឧកញ៉ា អ៉ឹង ស៊ីតាតវីរៈ ថវិកា ១ ០០០ ០០០ រៀលកាកបាទក្រហមខេត្ត អង្ករ ៣០គីឡូក្រាម គ្រឿងឧបភោគបរិភោគ ១ឈុតធំ និងថវិកា ៣០០ ០០០ រៀល លោក សាន់ ដារិទ្ធិ អភិបាលរង ខេត្តថវិកា ២០០ ០០០ រៀល លោក ទាវ សំណាង ថវិកាចូលរួម ១០០ ០០០ រៀល។
លោក សាន់ ដារិទ្ធិ បានលើកទឹកចិត្តប្អូនប្រុស ងិន អ៉ីយាន ឱ្យមានស្មារតីរឹងមាំ ប្រយុទ្ធប្រឆាំងនឹងជំងឺនេះ (ជំងឺ សួតនិងជំងឺថ្លើម) កុំបាក់ទឹកចិត្តឡើយ និងត្រូវស្តាប់តាមការណែនាំរបស់គ្រូពេទ្យ ដើម្បីឆាប់បានជាសះស្បើយ វិលត្រឡប់មកបន្តក្តីស្រមៃដ៏ត្រចះត្រចង់ និងធ្វើជាសសរទ្រូងដ៏រឹងមាំសម្រាប់គ្រួសារ និងសង្គមជាតិវិញ៕
ចែករំលែកព័តមាននេះ