រាជធានីភ្នំពេញ ៖ រថយន្តមួយគ្រឿងជាប្រភេទធន់ធំក្រឡុកបេតុងបើកគេចពីរថយន្តនៅពីមុខមិនបានប្រយ័ត្នក៏ជ្រុលទៅបុកបុរសម្នាក់ជិះម៉ូតូចេញពីធ្វើការត្រឡប់ទៅផ្ទះវិញបណ្តាលឱ្យដួលបោកក្បាលស្លាប់ ហេតុការណ៍នេះបានកើតឡើងកាលពីវេលាម៉ោង6និង30នាទីយប់ ថ្ងៃទី12 ខែធ្នូ ឆ្នាំ2019 តាមបណ្តោយផ្លូវបេតុងចម្ងាយពីផ្សារព្រែកភ្នៅ១គីឡូកន្លះ ស្ថិតនៅក្នុងសង្កាត់សំរោងខាងត្បូង ខណ្ឌព្រែកភ្នៅ ។ ជនរងគ្រោះដែលស្លាប់មានឈ្មោះ សែម សឿន ភេទប្រុស អាយុ23ឆ្នាំ ស្នាក់នៅឃុំឈ្វាំង ស្រុកពញាលឺ ខេត្តកណ្តាល ។
សាក្សីដែលឃើញហេតុការណ៍បានឱ្យដឹងថា មុនពេលកើតហេតុខាងលើនេះគេបានឃើញបុរសម្នាក់ជាជនរងគ្រោះជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ស៊េរី2015 ពាក់ផ្លាកលេខ ភ្នំពេញ 1CS-9747 បើកបរតាមបណ្តោយផ្លូវបេតុងក្នុងទិសដៅពីកើតទៅលិចទើបតែចេញមកពីធ្វើការនៅបុរីប៉េងហួត ផ្លូវ598 គោលបំណងជិះទៅផ្ទះនៅឃុំឈ្វាំង ស្រុកពញ្ញាឮ ខេត្តកណ្តាល ។
ខណៈពេលជិះបានពាក់កណ្តាលផ្លូវមកដល់ចំណុចកើតហេតុស្រាប់តែមានរថយន្តក្រឡុកបេតុងមួយគ្រឿងមិនចាំផ្លាកលេខបើកបរតាមបណ្តោយផ្លូវបេតុងក្នុងទិសដៅពីលិចទៅកើតបើកក្នុងល្បឿនយ៉ាងលឿនបានបើកគេចពីរថយន្តនៅពីមុខបើកលឿនដូចគ្នាក៏រ៉េចង្កូតបុកម៉ូតូយ៉ាងពេញទំហឹងបណ្តាលឱ្យអ្នកបើកម៉ូតូដួលបោកក្បាលស្លាប់ភ្លាមៗនៅទីតាំងកន្លែងកើតហេតុ ចំនែកអ្នកបើកបររថយន្តបង្កវិញបានបើករត់គេចខ្លួនចេញពីកន្លែងកើតហេតុបន្សល់ទុកនៅតែម៉ូតូរងគ្រោះ និងសពជនរងគ្រោះអស់រយៈពេលជិត១ម៉ោងទើបមានបងប្អូនក្រុមគ្រួសារសាច់ញាតិមកទទួលយកសពយកទៅធ្វើបុណ្យទៅតាមប្រពៃណី ។
ក្រោយពេលកើតហេតុម៉ូតូជនរងគ្រោះត្រូវបានសមត្ថកិច្ចធ្វើការវាស់វែងរួចក៏យកទៅរក្សាទុកឱ្យនៅប៉ុស្តិ៍សំរោងខាងត្បូង រីឯសពជនរងគ្រោះវិញត្រូវបានក្រុមគ្រួសារដឹកយកទៅធ្វើបុណ្យនៅឯស្រុកកំណើតទៅតាមប្រពៃណី ៕
កែសម្រួលដោយ ៖ សំណាង
ចែករំលែកព័តមាននេះ