រាជធានីភ្នំពេញ ៖ រថយន្តស្ទូចធុនធំ១គ្រឿងមានដឹកឥដ្ឋ និងស៊ីម៉ង់ត៍បានបើកទៅទាក់ខ្សែភ្លើងបណ្ដាលឲ្យដាច់ធ្លាក់ទៅលើដំបូលផ្ទះលក់ចាបហួយមួយកន្លែងហើយទុស្សេបែកផ្កាភ្លើងបង្កជាអគ្គិភ័យឆាបឆេះខ្សែភ្លើងនោះពេញលើដំបូលផ្ទះខាងលើ បង្កឲ្យមានការភ្ញាក់ផ្អើលយ៉ាងខ្លាំងបន្ទាប់អ្នកជិតខាងបាននាំគ្នាដងទឹកជះព្រមទាំងប្រើបំពង់ពន្លត់អគ្គិភ័យបាញ់ពន្លត់ជាច្រើនបំពង់ ព្រមទាំងរាយការណ៍ទៅកាន់មន្ត្រីអគ្គិសនីបិទភ្លើងទើបរលត់ ។
ខណៈនោះក៏មានរថយន្តពន្លត់អគ្គិភ័យចំនួន៥គ្រឿងចេញទៅអន្តរាគមន៍ ប៉ុន្តែបាញ់ទឹកអស់ត្រឹមកន្លះស៊ីទែនប៉ុណ្ណោះហើយជាសំណាងល្អមិនបណ្ដាលឲ្យផ្ទះខាងលើរួមជាមួយឥវ៉ាន់ចាបហួយនៅក្នុងនោះរងការខូចខាតធ្ងន់ធ្ងរនោះឡើយ ។ ហេតុការណ៍នេះបានកើតឡើងបង្កឲ្យមានការភ្ញាក់ផ្អើលយ៉ាងខ្លាំងកាលពីវេលាម៉ោង១០និង៣០នាទីព្រឹកថ្ងៃទី១៣ ខែធ្នូ ឆ្នាំ២០១៩ ដែលមានទីតាំងស្ថិតនៅតាមបណ្ដោយផ្លូវជាតិលេខ៣ ជិតផ្ទះសំណាក់ភ្នំមាស ក្នុងភូមិទួលកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ។
តាមប្រភពព័ត៌មានបានឲ្យដឹងថា ផ្ទះដែលត្រូវភ្លើងឆេះនោះសាងសង់ពីថ្មប្រក់ដំបូលស័ង្កសី ហើយមិនទាន់ត្រូវបានស្គាល់អត្តសញ្ញាណនៅឡើយទេ ។ ចំណែកឯរថយន្តបង្កមិនស្គាល់ម៉ាក ពណ៍ខៀវ បើកបរដោយបុរសមិនស្គាល់ឈ្មោះម្នាក់ហើយរថយន្តនេះបានឈប់នៅនឹងកន្លែងដោយដងសន្ទូចទាក់ជាប់ខ្សែភ្លើងមានទាំងខ្សែកាប្លិ៍ជាច្រើនសរសៃផងដែរ ។
ប្រភពដដែលបានបន្តថា នៅមុនពេលកើតហេតុរថយន្តបង្កនេះបានបើកបរធ្វើដំណើរចេញពីផ្លូវលំមួយកន្លែងក្នុងទិសដៅពីលិចទៅកើតឡើងផ្លូវជាតិលេខ៣ លុះពេលទៅដល់ត្រង់ចំណុចកើតហេតុស្រាប់តែដងសន្ទូចនៅពីលើរថយន្តបានទាក់ខ្សែភ្លើងបណ្ដាលឲ្យដាច់មួយសំណុំធ្លាក់ទៅលើដំបូលផ្ទះលក់ចាបហួយ ។ ខណៈនោះបានបណ្ដាលឲ្យទុស្សេបង្កជាអគ្គិភ័យឆាបឆេះខ្សែភ្លើងដែលដាច់នោះបង្កឲ្យមានការភ្ញាក់ផ្អើលយ៉ាងខ្លាំង ហើយម្នាក់ៗបាននាំគ្នារត់ឆ្លេឆ្លារ ទៅដងទឹកជះ និងយកបំពង់ពន្លត់អគ្គិភ័យទៅបាញ់ពន្លត់ ។
ចំណែកអាជ្ញាធរនិងសមត្ថកិច្ចបានរាយការណ៍ទៅកាន់ខាមន្ត្រីអគ្គិសនីបិទចរន្តភ្លើងដែលកំពុងទុស្សេបែកផ្កាភ្លើងនោះ ព្រមទាំងហៅរថយន្តពន្លត់អគ្គិភ័យទៅជាបន្តបន្ទាប់ចំនួន៥គ្រឿង ប៉ុន្តែពេលទៅដល់បាញ់ទឹកបានតែកន្លះស៊ីទែនប៉ុណ្ណោះភ្លើងក៏រលត់ទៅវិញទាំង ។
ចំណែករថយន្តស្ទូចទៅណាមិនរួចនោះឡើយព្រោះដងសន្ទូចបានទាក់ជាប់ជាមួយខ្សែភ្លើង និងខ្សែកាប្លិ៍ភ្លើងជាច្រើនសរសៃ បន្ទាប់មកនគរបាលបាននាំយកទៅរក្សាទុកនៅអធិការដ្ឋានខណ្ឌកំបូលដើម្បីដោះស្រាយនៅពេលក្រោយ ៕
កែសម្រួលដោយ ៖ សំណាង
ចែករំលែកព័តមាននេះ