ខេត្តបាត់ដំបង ៖ មន្ត្រីនគរបាលអន្តោប្រវេសន៍ម្នាក់ប្រចាំនៅច្រកទ្វារអន្តរជាតិដូង ស្រុកកំរៀង បានត្រូវសមត្ថកិច្ចឃាត់ខ្លួនទាំងស្រវឹងជោកជាំ ក្រោយពីដកកាំភ្លើងខ្លីបាញ់គំរាមគេឯងជាច្រើនគ្រាប់ កាលពីវេលាម៉ោងប្រមាណ១០និង៣០នាទីយប់ថ្ងៃទី១០ ខែធ្នូ នៅភូមិអូរដាលើឃុំបឹរាំង ស្រុកកំរៀង តែមិនបង្កឲ្យមានគ្រោះថ្នាក់ដល់មនុស្សទេ ។
យោងតាមរបាយការណ៍របស់សមត្ថកិច្ចបានឲ្យដឹងថា មន្ត្រីនគរបាលដែលបាញ់បោះអនាធិបតេយ្យនោះឈ្មោះ នៅ លីដា មានឋានន្តរស័ក្តិវរសេនីយ៍ត្រី ។ ជននេះបានប្រើប្រាស់កាំភ្លើងខ្លី ធុន SIG SAUER បាញ់បោះគំរាមគេឯងអស់ជាង១០គ្រាប់ ខណ:ខ្លួនស្រវឹងជោកជាំ ។ ប៉ុន្តែរបាយការណ៍នោះ មិនបាននិយាយពីមូលហេតុដែលនាំឲ្យមន្ត្រីរូបនេះផ្ទុះអាវុធផ្អើលអ្នកស្រុកកំរៀងទាំងកណ្ដាលអធ្រាត្រនោះទេ ហើយគ្រាប់កាំភ្លើងជាច្រើនគ្រាប់របស់មន្ត្រីស្រវឹងជោកនោះក៏មិនបង្កគ្រោះថ្នាក់ដល់អ្នកនៅក្បែរខាង
ដែរ ។
មន្ត្រីមូលដ្ឋានបានប្រាប់កោះសន្តិភាពនាព្រឹកថ្ងៃទី១១ ខែធ្នូថា ឈ្មោះ នៅ លីដា បានត្រូវនគរបាលស្រុកកំរៀងឃាត់ខ្លួនយកទៅសួរនាំ ក្រោយពីបង្កការផ្ទុះអាវុធ ។ ចំណែកនៅកន្លែងកើតហេតុ សមត្ថកិច្ចបានរកឃើញសម្បកគ្រាប់ចំនួន៩ ក្នុងចំណោមស្នូរផ្ទុះកាំភ្លើងជាង១០គ្រាប់ ដែលមន្ត្រីរូបនេះបានបាញ់ ។
ប្រភពដដែលឲ្យដឹងទៀតថា ជាមួយនឹងការឃាត់ខ្លួននេះ សមត្ថកិច្ចនគរបាលស្រុកកំរៀង ក៏បានដកហូតកាំភ្លើងខ្លីខាងលើពីជននេះដែរ រួមជាមួយគ្រាប់ក្នុងបង់ចំនួន៣គ្រាប់ គ្រាប់ក្នុងប្រអប់ដែលនៅសល់ចំនួន១0៦គ្រាប់ និងរថយន្តម៉ាកឡិចសុីស RX៣០០ មួយគ្រឿង ពាក់ផ្លាកលេខ ភ្នំពេញ ២AI-៩០៤៣ ។
កោះសន្តិភាព មិនទាន់ទទួលបានការឆ្លើយបំភ្លឺពីមន្ត្រីអន្តោប្រវេសន៍ឈ្មោះ នៅ លីដា បាននៅឡើយទេ ។ រីឯលោក ផាត សុផាន់ណា ប្រធានអន្តោប្រវេសន៍ប្រចាំច្រកទ្វារអន្តរជាតិដូង ក៏មិនអាចសុំការបំភ្លឺបានដែរជុំវិញករណីនេះ ដោយសារទូរស័ព្ទចូលតែគ្មានអ្នកទទួល ។
ការមិនទទួលទូរស័ព្ទនេះ គឺផ្ទុយពីការលើកឡើងកាលពីពេលមុនដែលលោក ផាត សុផាន់ ណា ធ្លាប់អួតប្រាប់ថ្នាក់ដឹកនាំថា ខ្លួនមានទំនាក់ទំនងល្អណាស់ជាមួយអ្នកសារព័ត៌មានពាក់ព័ន្ធនឹងព័ត៌មាននៅច្រកទ្វារអន្តរជាតិដូង ។ ប៉ុន្តែពេលនេះ នៅពេលអ្នកសារព័ត៌មានជាច្រើនអង្គភាពទូរស័ព្ទទៅសុំការបំភ្លឺពីរឿងមន្ត្រីរបស់ខ្លួនប្រើអាវុធបាញ់គំរាមគេឯង បែរជាលោកប្រធានអន្តោប្រវេសន៍រូបនេះសម្ងំស្ងៀមឈឹងមិនខ្ចីលើកទូរស័ព្ទឆ្លើយតបជាមួយអ្នកសារព័ត៌មានទៅវិញ ។
ដោយឡែក លោកឧត្តមសេនីយ៍ត្រី ជេត វណ្ណនី ស្នងការរងនគរបាលខេត្ត បានប្រាប់កោះសន្តិភាពថា អ្នកបាញ់បោះសេរីឈ្មោះ នៅ លីដា ពិតជាត្រូវបាននគរបាលស្រុកកំរៀងឃាត់ខ្លួនមែន ។ ក្រោយពីយើងសាកសួរ ពេលនេះថ្នាក់ដឹកនាំអគ្គនាយកដ្ឋានអន្តោប្រវេសន៍ បានស្នើឲ្យបញ្ជូនជនខាងលើទៅស្ថាប័នសាមី ដើម្បីដាក់ទោសទណ្ឌនៅអង្គភាពរបស់គេ ហើយពេលនេះយើងកំពុងរង់ចាំចំណាត់ការពីថ្នាក់លើសិន ។
បើតាមព័ត៌មានថា មន្ត្រីនគរបាលអន្តោប្រវេសន៍បាញ់បោះរូបនេះ កំពុងរៀបចំឡើងតួនាទី និងត្រៀមផ្លាស់ពីច្រកទ្វារអន្តរជាតិដូង ស្រុកកំរៀង ទៅកាន់ច្រកទ្វារអន្តរជាតិប៉ោយប៉ែត ខេត្តបន្ទាយមានជ័យទៀតផង ៕
ចែករំលែកព័តមាននេះ