រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានលើកឡើងថា មន្ទីរពេទ្យកាលម៉ែត ដែលជាមន្ទីរពេទ្យសាធារណៈបានទទួលការព្យាបាលជំងឺ៤ប្រភេទ ក្នុង៣ប្រភេទមិនអស់ថវិកា ទី១- អ្នកក្រីក្រដែលមានបណ្ណក្រីក្រ ទី២- អ្នកមានប័ណ្ណសមធម៌ ទី៣- អ្នកមានប័ណ្ណបេឡាជាតិសន្តិសុខសង្គម និងទី៤- អ្នកមានលទ្ធភាព គឺបង់ថវិកា ។
សម្តេចតេជោបានបញ្ជាក់ក្នុងពិធីប្រគល់សញ្ញាបត្រដល់និស្សិតបញ្ចប់ការសិក្សានៅសាកលវិទ្យាល័យ CUS នាព្រឹកថ្ងៃទី១១ ខែធ្នូថា ៖ «អីញ្ចឹងមានន័យថា មន្ទីរពេទ្យនេះត្រូវប្រើប្រាស់សេវាក្នុងហ្នឹង គឺយកមន្ទីរពេទ្យចិញ្ចឹមមន្ទីរពេទ្យ ។ យកថវិកាពីអ្នកមានលទ្ធភាពទៅជួយអ្នកគ្មានលទ្ធភាព» ។ សម្តេចបានបន្តថា អ្នកដែលមានប័ណ្ណទាំង៣ខាងលើ គឺមិនចាំបាច់បង់ប្រាក់នោះទេ ។ តែបង់ចំពោះអ្នកមានលទ្ធភាពដែលទៅព្យាបាលនៅវៀតណាម នៅថៃ សិង្ហបុរី … ត្រូវបង់ថ្លៃ ។
ជាមួយគ្នានោះដែរ សម្តេចតេជោ ក៏បានលើកឡើងថា សម្តេចនឹងរៀបចំមន្ទីរពេទ្យកាលម៉ែតឲ្យបានល្អ ហើយគ្រោងបញ្ចប់ការពិនិត្យនៅមន្ទីរពេទ្យខាងក្រៅ ។ សម្តេចគូសញ្ជាក់ថា ៖«ខ្ញុំនឹងប្រើប្រាស់មន្ទីរពេទ្យជំនាញឯកទេសនៅក្នុងប្រទេសតែម្តង ។ ព្រោះនៅមន្ទីរពេទ្យកាលម៉ែតមានកន្លែងរៀបចំសម្រាប់តាំងពីព្រះមហាក្សត្រ ឥស្សរជននានា និងថ្នាក់ដឹកនាំនានាផងដែរ» ។
សម្តេចក៏បានលើកឡើងថា មូលហេតុដែលសម្តេចតេជោទៅពិនិត្យព្យាបាលជំងឺនៅមន្ទីរពេទ្យសាំងហ្គាពួរដោយសារនៅមន្ទីពេទ្យស្រុកខ្មែរមិនទាន់មានសម្ភារៈបច្ចេកទេសទំនើប ។ ដូច្នេះនៅពេលណាយើងមានសម្ភារៈទំនើប គឺអ្នកឯកទេសរបស់យើងនឹងមានហើយរៀបចំព្យាបាល ។ សម្តេចបានលើកឡើងថា រហូតមកដល់ពេលថវិកាដែលសប្បុរសជនចូលរួម ដើម្បីធ្វើទំនើបកម្មមន្ទីរពេទ្យកាលម៉ែតបានជាង៧២លានដុល្លារ បូកទាំងថវិការដ្ឋ៣០លាន ដើម្បីធ្វើអគារមួយដែលចំណាយអស់៣៩លាន៧សែនដុល្លារ ហើយមន្ទីរពេទ្យបានរកថវិកា៧លានដុល្លារហើយ ដែលអគារនេះធ្វើ១២ជាន់ និង២ជាន់ចុះក្រោម ដើម្បីធ្វើដំណតរថយន្តនិយាយទៅអគារមិនអស់៤០លានដុល្លារទេ ។
សម្តេចក៏បានលើកឡើងថា ថវិកាដែលបានមកពីសប្បុរសចូលរួមនឹងយកទៅទិញសម្ភារៈទំនើបៗ និងជួយសាងសង់អគារខ្លះ ។ សម្តេចតេជោ ហ៊ុន សែន នាយករដ្ឋមន្ត្រីបានលើកឡើងថា មន្ទីរពេទ្យកាល់ម៉ែត្រដែលសហគ្រាសសាធារណៈជាមន្ទីរពេទ្យកាល់ម៉ែត្របានដំណើរការក្នុងអំឡុងឆ្នាំ១៩៩៩ និងបានដើរតួរជាមជ្ឈមណ្ឌលក្នុងការព្យាបាលជំងឺពហុឯកទេស ក្នុងនោះវះខួរក្បាល វះបេះដូង ម៉ាស៊ីនឡាស៊ែរ …។
សូមជម្រាបថា ទោះបីមានប្រមុខរាជរដ្ឋាភិបាលធ្លាប់ប្រកាសថា មន្ទីរពេទ្យរដ្ឋទាំងអស់មិនយកថវិកាចំពោះអ្នកមានបណ្ណក្រីក្រ បណ្ណសមធម៌ និងប័ណ្ណ ប.ស.ស យ៉ាងណាក្តីក៏មានការលើកឡើងថា មានមន្ទីរពេទ្យមួយចំនួនមិនបានយកចិត្តទុកដាក់ចំពោះអ្នកជំងឺផងដែរ ៕
ចែករំលែកព័តមាននេះ