រាជធានីភ្នំពេញ ៖ សម្តេចតេជោ ហ៊ុនសែន នាយករដ្ឋមន្ត្រីបានអំពាវនាវដល់ម្ចាស់ម៉ាស៊ីនកិនស្រូវទាំងអស់ដែលប្រមូលទិញស្រូវពីប្រជាពលដ្ឋមេត្តាកុំធ្វើការទម្លាក់ថ្លៃស្រូវ ក្នុងពេលដែលពួកគាត់ប្រមូលផល ឬច្រូតកាត់ ។ ថ្លែងក្នុងពិធីប្រគល់សញ្ញាបត្រដល់និស្សិតបញ្ចប់ការសិក្សានៅសាកលវិទ្យាល័យ CUS នាព្រឹកថ្ងៃទី១១ ខែធ្នូនេះ នៅមជ្ឍមណ្ឌលកោះពេជ្រ ។
សម្តេចបញ្ជាក់ថា ៖«យើងយល់ហើយអំពីក្រិតក្រមនៃសេដ្ឋកិច្ចមានតម្រូវច្រើនការផ្តត់ផ្គង់តិចនោះវាឡើងថ្លៃ ហើយមានតម្រូវការតិច ការផ្គត់ផ្គង់ច្រើននោះវាចុះថ្លៃ ។ ក៏ប៉ុន្តែខ្ញុំសូមអំពាវនាវដល់ម្ចាស់ម៉ាស៊ីនកិនស្រូវដែលទទួលទិញស្រូវពីប្រជាពលរដ្ឋសុំកុំបង្អាប់តម្លៃស្រូវរបស់កសិករ» ។
សម្តេចបានលើកឡើងទៀតថា រាជរដ្ឋាភិបាលបានទម្លាក់លុយ៥០លានដុល្លារ ដើម្បីឲ្យម្ចាស់ម៉ាស៊ីនកិនស្រូវ ហើយសូមអស់លោកយល់ថា មិនមែនយកលុយ៥០លានដុល្លារនេះទៅច្របាច់.ក ប្រជាជន ដើម្បីបញ្ចុះថ្លៃនោះទេ ។
ដូច្នេះ ខ្ញុំឲ្យក្រសួងពាណិជ្ជកម្ម ក្រសួងសេដ្ឋកិច្ច និងហិរញ្ញវត្ថុត្រួតពិនិត្យបញ្ហានេះតាមដែលអាចធ្វើទៅបាន ។ សម្តេចក៏បានលើកឡើងថា ពេលនេះការប្រមូលផលស្រូវរបស់កសិករបានកំពុងពេញចម្ការ ស្រែ ទាំងស្រូវវស្សា និងស្រូវប្រាំង ធ្វើឲ្យត្រូវមានចំនួនច្រើន ប៉ុន្តែស្រូវបានធ្លាក់ចុះ ដូច្នេះសុំបណ្តាម៉ាស៊ីនកិនស្រូវត្រូវទិញស្រូវពីប្រជាពលរដ្ឋស្ថិតក្នុងតម្លៃសមរម្យ ។ ដូច្នេះកុំទម្លាក់ថ្លៃជ្រុលហួស ដែលធ្វើឲ្យកសិករជួបការលំបាក ។ ជាមួយគ្នានោះដែរ សម្តេចបានអះអាងថា ក្នុងឆ្នាំនេះទិន្នផលស្រូវមានចំនួនកើនជាងឆ្នាំមុន ដែលក្នុង១ហិកតាបានទទួលផលជាង៣តោន ។ ដូច្នេះបញ្ហាតម្លៃស្រូវតែយកចិត្តទុកដាក់បំផុត ។
បច្ចុប្បន្ននេះម៉ាស៊ីនកិនស្រូវបានចងក្រងជាសម្ព័ន្ធ ឬហៅថា សហព័ន្ធស្រូវអង្ករដែលបង្ហាញពីភាពងាយស្រួល ។ សម្តេចក៏បានស្នើដល់សហព័ន្ធស្រូវអង្ករ និងសហភាពពាណិជ្ជកម្មបើកិច្ចប្រជុំពិ និត្យលើបញ្ហាតម្លៃស្រូវផងដែរ ។ លើសនេះក្រសួងពាណិជ្ជកម្ម ក្រសួងកសិកម្ម រុក្ខាប្រមាញ និងនេសាទក៏ត្រូវពិនិត្យមើលបញ្ហាតម្លៃស្រូវដែរ ។ សម្តេចគូសបញ្ជាក់ថា ៖«យើងបើកកិច្ចប្រជុំ ដើម្បីពិភាក្សាគ្នាឲ្យឃើញថា ស្រូវរបស់ប្រជាពលរដ្ឋច្រើនកុំទៅទម្លាក់ថ្លៃស្រូវរបស់គាត់ដែលជារឿងមួយមិនគប្បីនោះទេ ។ យើងមានទីផ្សារក៏ច្រើន យើងនាំចេញទៅប្រទេសចិន នាំទៅប្រទេសក្នុងតំបន់ជាង៦០ រាប់ទាំងសហភាពអឺរ៉ុបផងដែរ» ៕ កែសម្រួលដោយ ៖ សុឃាក់
ចែករំលែកព័តមាននេះ