រាជធានីភ្នំពេញ ៖ កម្លាំងនគរបាលខណ្ឌពោធិ៍សែនជ័យបានធ្វើការចាប់ខ្លួនជនសង្ស័យ២នាក់ក្នុងចំណោមគ្នា៣នាក់ដែលបានធ្វើសកម្មភាពឆក់ទូរស័ព្ទដៃពីស្ត្រីអ្នកដំណើរម្នាក់ ប៉ុន្តែមិនបានសម្រេចឡើយហើយគាប់ជួនកម្លាំងនគរបាលខាងលើកំពុងល្បាតនៅជិតនោះស្រាប់ឮស្ត្រីរងគ្រោះ ស្រែកថាចោរទើបដេញតាមចាប់បាន២នាក់ចំណែកម្នាក់ទៀតរត់គេចខ្លួនបាត់ស្រមោល។
ហេតុការណ៍នោះបានកើតឡើងកាលពីវេលាម៉ោង៤រសៀល ថ្ងៃទី០៦ ខែធ្នូ ឆ្នាំ២០១៩ នៅតាមផ្លូវបេតុង ស្ថិតនៅក្នុងភូមិព្រៃសាលា សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ។ប៉ុន្តែនគរបាលបានដេញតាមរហូតដល់ក្នុងភូមិតិក្ខបញ្ញោ សង្កាត់សំរោងក្រោម ខណ្ឌពោធិ៍សែនជ័យ ទើបទាន់ និងចាប់ខ្លួនបាន ។
ជនសង្ស័យខាងលើនោះម្នាក់ឈ្មោះ ជា រ៉ាវីត ភេទប្រុស អាយុ១៧ឆ្នាំ មុខរបរជួយលក់រថយន្តឪពុកម្តាយ មានទីលំនៅ ក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ជិះម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០២០ ពណ៌ខ្មៅ អត់ផ្លាកលេខ ព្រោះឪពុកទើបទិញឱ្យបានរយៈពេល១ថ្ងៃប៉ុណ្ណោះមិនទាន់បានធ្វើផ្លាកលេខនៅឡើយ និងម្នាក់ទៀតឈ្មោះ លី ឧត្តម ភេទប្រុស អាយុ២២ឆ្នាំ ស្នាក់នៅក្នុងភូមិច្រេស សង្កាត់គោកឃ្លាង ខណ្ឌសែនសុខ ជិះម៉ូតូម៉ាកហុងដាស្កូបពីពណ៌ស ពាក់ផ្លាកលេខ ភ្នំពេញ 1HW-9355 ហើយជននេះគឺជាមុខសញ្ញាឆក់យ៉ាងសកម្មបំផុតដែលធ្លាប់ធ្វើសកម្មភាពឆក់ជាច្រើនដងមកហើយ ។ មិនមែប៉ុណ្ណោះនគរបាលបានដេញតាមចាប់រហូតតែជននេះបានគេចខ្លួនរួចជាបន្តបន្ទាប់រហូតមក រីឯបក្សពួកម្នាក់ទៀតជិះម៉ូតូម៉ាកហុងដាឌ្រីមសេ១២៥បានគេចខ្លួនបាត់ ។
នគរបាលបាននិយាយថា នៅមុនពេលកើតហេតជនសង្ស័យទាំង៣នាក់ខាងលើជិះម៉ូតូ៣គ្រឿងទៅកាន់ចំណុចខាងលើបន្ទាប់មកជនសង្ស័យឈ្មោះ ជា រ៉ាវីត ដែលជិះម៉ូតូហុងដាឌ្រីមសេ១២៥ អត់ផ្លាកលេខ បានធ្វើសកម្មភាពឆក់ទូរស័ព្ទដៃពីស្ត្រីអ្នកដំណើរម្នាក់ដែលកំពុងជិះម៉ូតូដែរ ។ ប៉ុន្តែខណៈនោះឆក់មិនបានសម្រេចហើយស្ត្រីរងគ្រោះបានស្រែកថាចោរៗបង្កឲ្យមានការភ្ញាក់ផ្អើលហើយកម្លាំងនគរបាលខណ្ឌពោធិ៍សែនជ័យកំពុងល្បាតនៅជិតនោះ រួមជាមួយនគរបាលប៉ុស្តិ៍កាកាប២ និងប៉ុស្តិ៍សំរោងក្រោម បានចេញដេញតាមនិងពួនស្ទាក់ចាប់បាន២នាក់ភ្លាមៗតែម្ដង ។ខណៈនោះនគរបាលដកហូតបានម៉ូតូម៉ាកហុងដាស្កូបពី១គ្រឿង និងម៉ូតូម៉ាកហុងដាឌ្រីមសេ១២៥ស៊េរីឆ្នាំ២០២០មួយគ្រឿង ចំណែកម្នាក់ទៀតបានជិះម៉ូតូម៉ាកហុងដាឌ្រីម១គ្រឿងរត់គចខ្លួនរួច ។
ប្រភពដដែលបានបន្តទៀតថា ក្រោយពេលចាប់ខ្លួនកម្លាំងបាននាំជនសង្ស័យខាងលើទៅធ្វើការសាកសួរនៅប៉ុស្តិ៍កាកាប២ ហើយជនសង្ស័យឈ្មោះ ជា រ៉ាវីត បាននិយាយថា ខ្លួនមានឪពុកម្ដាយជាអ្នករកសុីលក់រថយន្ត ហើយខ្លួនក៏ជាអ្នកជួយលក់រថយន្តឪពុកម្ដាយដែរ ។ ចំណែកម៉ូតូម៉ូតូម៉ាកហុងដាឌ្រីមសេ១២៥ស៊េរីឆ្នាំ២០២០ គឺឪពុកទើបទិញឱ្យជិះកាលពីល្ងាចថ្ងៃទី៥ ខែធ្នូ ហើយមិនទាន់ធ្វើផ្លាកលេខនៅឡើយ លុះដល់ថ្ងៃកើតហេតុខ្លួន និងបក្សពួកក៏បានបបួលគ្នាចេញដើរឆក់ ដោយលើកទី១ឆក់ទូរស័ព្ទនៅថ្ងៃទិញម៉ូតូភ្លាមៗបានសម្រេចម្ដង លុះមកដល់ថ្ងៃកើតហេតុចេញឆក់ជាលើកទី២ទៀតមិនបានសម្រេចត្រូវនគរបាលចាប់ខ្លួនបានបែបនេះ ៕
កែសម្រួលដោយ ៖ សំណាង
ចែករំលែកព័តមាននេះ