រាជធានីភ្នំពេញ ៖ អស់រយៈពេលជាច្រើនឆ្នាំមកហើយរមណីយដ្ឋានកោះដាច់បានស្ថិតនៅក្រោមការដែលគ្រប់គ្រងរបស់ឯកជនឈរចាំលក់សំបុត្រប្រមូលតែប្រាក់ ពីអ្នកដែលនាំក្រុមគ្រួសារមកសម្រាកនិងកម្សាន្តងូតទឹកទន្លេដ៏ថ្លាឆ្វង់ ក៏ប៉ុន្តែអ្វីដែលសំខាន់នោះគឺរមណីយដ្ឋាននេះមិនមានការអភិវឌ្ឍន៍ឡើយ ទាំងផ្លូវចូលនិងទីតាំងអង្គុយតាមក្យូសជាប់មាត់ទឹកគឺក្រិនផ្អេះដដែល ។
រមណីយដ្ឋានកោះដាច់នៅតាមបណ្តោយដងទន្លេមេគង្គស្ថិតនៅក្នុងភូមិក្បាលកោះ សង្កាត់កោះដាច់ ខណ្ឌជ្រោយចង្វា រាជធានីភ្នំពេញ ដែលមានទីតាំងមិនឆ្ងាយជាង១៥គីឡូម៉ែត្រពីទិសខាងជើងនៃរាជធានីភ្នំពេញ ។
លោក យាង គន្ធា អ្នករាជធានីភ្នំពេញដែលនាំក្រុមគ្រួសារមកលេងរមណីយដ្ឋានកោះដាច់បាននិយាយថា ៖ យ៉ាងហោចណាស់ក្នុងមួយខែគាត់តែងតែនាំក្រុមគ្រួសារមកងូតទឹកទន្លេនិងហូបបាយនៅតូបមាត់ទន្លេកោះដាច់ម្តងៗដែរ ។ ក៏ប៉ុន្តែពីមួយខែទៅមួយខែ ក៏ដូចជារដូវបុណ្យទាននៅទីនេះការលក់ម្ហូបអាហារ តម្លៃនៅលើមាត់ម្ចាស់តូបអ្នកថាតែម្តង ។ ជាក់ស្តែងកាលពីថ្ងៃអាទិត្យកន្លងមកនេះគាត់បានមកលេងកម្សាន្តនៅកោះដាច់ហើយកុម្ម៉ង់ទិញមាន់ស្រែមួយ និងត្រីដុតមួយ ។ ពេលនោះម្ចាស់តូបប្រាប់តម្លៃមាន់ស្រែមួយ១០ម៉ឺនរៀល មាន់បីសាសន៍៦ម៉ឺនរៀល រីឯត្រីដុតមួយ៥ម៉ឺនរៀល គ្រាន់ឮតម្លៃម្ហូបភ្លាមប្រពន្ធរបស់គាត់យកដៃរឹតទ្រូងត ម្តង ។
លោក គន្ធា ក៏បាននិយាយទៀតថា តម្លៃម្ហូបអាហារនៅទីនេះពិតជាថ្លៃមិនអាចទទួលយកបានមែន…តែបើភ្ញៀវណាយកម្ហូបមកខ្លួនឯងគឺគេគិតថ្លៃតូបមួយពី២ម៉ឺនទៅ៣ម៉ឺនរៀល ។ បើមានបញ្ហាអ្វីកើតឡើងរកមុខម្ចាស់ម៉ៅការកោះដាច់មិនដែលឃើញទេទុកឲ្យអតិថិជនឈ្លោះប្រកែកគ្នាបែកផ្សែងតាមដំណើរ ។ ជារឿយៗឲ្យតែនៅពេលបុណ្យទានម្តងៗម្ចាស់តូបទាំងអស់កាប់ឆៅភ្ញៀវតែម្តង ទើបមានរឿងកើត ឡើងមិនដែលខាន ។
ដោយឡែកយុវជនមួយក្រុមមានគ្នាប្រហែលជា១០នាក់បានលើកឡើងថា ៖ ម្ហូបអាហារលក់នៅរមណីយដ្ឋានកោះដាច់នេះពិតជាមានតម្លៃខ្ពស់មែន មិនថាថ្ងៃធម្មតាឬថ្ងៃបុណ្យទាននោះទេ ។ ប្អូនៗបានបញ្ជាក់ថា ពេលមកលេងកោះដាច់ម្តងៗពួកគេទិញសំបុត្រចូលតម្លៃ៣០០០រៀលហើយនាំគ្នាងូតទឹកទន្លេម៉ាឆ្អែត ហើយក៏នាំគ្នាទៅហូបបាយនៅហាងមាត់ទន្លេព្រែកលាបវិញព្រោះទីនោះតម្លៃម្ហូបសមរម្យដែលអាចទទួលយកបានព្រោះទីនេះកាប់ឆៅពេក ។
រមណីយដ្ឋានកោះដាច់នេះមើលទៅគ្មានការអភិវឌ្ឍអ្វីឲ្យប្លែកនោះឡើយក្រោមការគ្រប់គ្រងក្រុមហ៊ុនឯកជនមួយ ។ ក្រៅពីមានទឹកទន្លេសម្រាប់ឲ្យងូតទឹកលេង គ្មានអ្វីអភិវឌ្ឍប្លែកសោះនៅជ្រិញដដែល ហើយក្រុមហ៊ុនម៉ៅការឈរចាំទារលុយមិនឱ្យរបូតទេ សូម្បីតែបង្គន់ចូលម្តង១០០០រៀលដែរដឹងតែពីលុយ ។
លោកតា កឹម លន ស្ថិតក្នុងវ័យប្រហែលជាង៧០ឆ្នាំឈរឃ្វាលគោនៅក្បាលកោះក្បែររមណីយដ្ឋានកោះដាច់បានរៀបរាប់ឲ្យដឹងថា៖ កោះដាច់គឺជាឈ្មោះកោះមួយដែលត្រូវបានហៅតាំងពីសម័យបូរាណមក ព្រោះសណ្ឋានរបស់កោះនេះនៅដាច់ដោយឡែកពីគេមិនមានផ្លូវដីណាដែលតភ្ជាប់ទៅដីលើកោះនេះទេ ។ ទីតាំងកោះដាច់ ទៅតាមបណ្តោយផ្លូវជាតិលេខ៦A ត្រូវធ្វើដំណើរឆ្លងកាត់តាមទូកដរពីកំពង់ចម្លងបាក់ខែងឆ្ពោះទៅកោះដាច់ ។
ជាទូទៅកោះដាច់ ត្រូវបានអ្នកទីក្រុងភ្នំពេញ ជាពិសេសយុវជនយុវនារី ស្គាល់ថា ជាកន្លែងកម្សាន្ត និងងូតទឹកលេងតាមឆ្នេរខ្សាច់ទន្លេមេគង្គ នារដូវប្រាំងនៅចុងសប្តាហ៍ ។ កាលណោះគ្មានក្រុមហ៊ុនណាឈរចាំយកលុយនោះទេ គឺចូលទៅងូតទឹកលេងតាមសប្បាយ មានទាំងអ្នកភូមិក្បាលកោះនិងអ្នកភូមិផ្សេងៗផងដែរ ជាពិសេសដឹកគោមកលាងទឹក ។ តែពេលនេះកោះដាច់ដែលស្ថិតនៅក្នុងភូមិក្បាលកោះ សង្កាត់កោះដាច់ ខណ្ឌជ្រោយចង្វានាពេលបច្ចុប្បន្ននេះ នៅក្រោមការគ្រប់គ្រងក្រុមហ៊ុនឯកជនដោយគ្មានការអភិវឌ្ឍអ្វីបន្តិចសោះនៅក្រិនផ្អេះដដែល អត់រីកទេ គេយកតែលុយ ។
មានការរិះគន់ទៀតថា ពីដើមយ៉ាងមេចគឺនៅដដែល មានប្លែកបន្តិចគឺគេសង់រោងចាំទារលុយពីអ្នកចូលកម្សាន្ត និងមានវាលស្មៅសម្រាប់ដាក់ម៉ូតូរថយន្តតែប៉ុណ្ណោះ ។ លោកតាលន បានឲ្យដឹងទៀតថា លោកតាធ្លាប់បានឮភ្ញៀវដែលមកលេងកោះដាច់នាំគ្នារអ៊ូរទាំថ្លៃតូប ថ្លៃម្ហូបថ្លៃពេក តម្លៃស្ថិតនៅលើម្ចាស់តូបទារតែម្តងបញ្ហានេះគួរអាជ្ញាធរមូលដ្ឋាន ក៏ដូចជាក្រសួងពាក់ព័ន្ធចុះមកពិនិត្យរៀបរយឡើងវិញហើយ ។ ជាពិសេសគ្មានការអភិវឌ្ឍអ្វីសោះហើយប្រគល់ឲ្យឯកជនទៅវិញ ។ ថ្លៃឡើងកប់ហើយកន្លែងនឹងជាទន្លេសម្រាប់ប្រជាជនទៅលេង មេ៉ចក៏ទាមទារឱ្យបង់លុយចូលចឹង ។ ការប្រមូលលុយ ហើយប្រាប់ថាយកទៅអភិវឌ្ឍន៍ តែជិះឡើងហុយដី ។ សូម្បីតែអ្នកនៅលើកោះ ក៏យកលុយតមៃ្លចូលលេងដែរ មិនដែលឃើញអភិវឌ្ឍន៍អីផង ។ ហេតុអ្វីនៅស្រុកខ្មែរយើងឱ្យតែមានរមណីយដ្ឋានកម្សាន្តរបស់របរលក់ថ្លៃម្ល៉េះ ។
ទាក់ទិននឹងការអភិវឌ្ឍរមណីយដ្ឋានកោះដាច់ ម្ចាស់ម៉ៅការកោះដាច់និយាយក្នុងន័យសុំមិនបង្ហាញឈ្មោះបានឲ្យដឹងថា ៖ រមណីយដ្ឋានកោះដាច់ត្រូវបានក្រុមហ៊ុនគាត់ដេញថ្លៃបានរយៈ១៥ឆ្នាំ ហើយនៅឆ្នាំ២០២២ ទើបផុតអាណិត្ត ។
រីឯតម្លៃបង់ប្រចាំឆ្នាំទៅឲ្យក្រសួងទេសចរណ៍និងសាលាសង្កាត់កោះដាច់គាត់មិនអាចប្រាប់បានឡើយខ្លាចប៉ះពាល់ ។ ម្ចាស់គ្រប់គ្រងកោះដាច់ដែលជិតផុតអាណិត្តបានបង្ហើបឲ្យដឹងថា ក្រសួងអភិវឌ្ឍន៍ជនបទនិងមានគម្រោងយករមណីយដ្ឋានកោះដាច់ពីក្រសួងទេសចរណ៍មកគ្រប់គ្រងវិញនិងមានផែនការនៅពេលខាងមុខ ឲ្យក្រុមហ៊ុនចិនធ្វើការអភិវឌ្ឍន៍វិញ ទំនងជានៅឆ្នាំ២០២២ ពេលក្រុមហ៊ុនរបស់គាត់ផុតអាណត្តិ ៕
ចែករំលែកព័តមាននេះ