រាជធានីភ្នំពេញ ៖ តារាសម្តែង ព្រះកាយ ច័ន្ទ បានចាត់ទុកទិវាសិទ្ឌិនារីអន្តរជាតិ៨មីនា គឺជាថ្ងៃពិសេសសម្រាប់ស្ត្រីទូទាំងពិភពលោក និងជាថ្ងៃដែលទទួលស្គាល់តម្លៃនៃស្ត្រីដែលបានប្រឹងប្រែងឈរជើងយ៉ាងរឹងមាំគ្រប់តួនាទីទាំងអស់នៃជីវិត ។ ព្រះកាយ…
រាជធានីភ្នំពេញ ៖ តារាសម្តែង ព្រះកាយ ច័ន្ទ បានចាត់ទុកទិវាសិទ្ឌិនារីអន្តរជាតិ៨មីនា គឺជាថ្ងៃពិសេសសម្រាប់ស្ត្រីទូទាំងពិភពលោក និងជាថ្ងៃដែលទទួលស្គាល់តម្លៃនៃស្ត្រីដែលបានប្រឹងប្រែងឈរជើងយ៉ាងរឹងមាំគ្រប់តួនាទីទាំងអស់នៃជីវិត ។
ព្រះកាយ ច័ន្ទ បានចេញវីដេអូមួយបង្ហោះលើបណ្តាញសង្គម ដើម្បីអបអរសាទរទិវាសិទ្ធនារី៨មីនា ដោយនៅក្នុងនាងបានអរគុណដល់អ្នកម្តាយនៅទូទាំងពិភពលោកដែលបានប្រឹងប្រែងលះបង់គ្រប់យ៉ាងសម្រាប់កូនៗ ។
នាងបន្តថា សេចក្តីស្រឡាញ់របស់អ្នកម្តាយគឺធំធេង និងគ្មានព្រំដែនឡើយ ហើយកម្លាំងទឹកចិត្តរបស់អ្នកម្តាយគឺធំមិនអាចវាស់វែងបានឡើយ ។ អ្នកម្តាយគឺជាស្ត្រីដែលរឹងមាំបំផុត ដែលហ៊ានលះបង់គ្រប់បែបយ៉ាងទាំងកម្លាំងកាយ និងកម្លាំងចិត្ត គ្រប់យ៉ាងគឺដើម្បីសេចក្តីសុខរបស់កូនៗ ។
នាងក៏បានអរគុណទៅកាន់ភរិយាគ្រប់រូបដែលបានលះបង់ និងជួយជ្រោមជ្រែងគ្រួសារ ធ្វើអោយផ្ទះក្លាយទៅជាទីកន្លែងដែលមានក្តីសុខ សុភមង្គល និងកក់ក្តៅ ។
នាងបញ្ជាក់ថា ភរិយាគឺជាកម្លាំងដែលនៅពីក្រោយនៃភាពជោគជ័យរបស់គ្រួសារ ជាស្ត្រីដែលមានឥទ្ធិពលដែលមិនអាចកាត់ថ្លៃបាន ។
ដូច្នេះក្នុងនាមនាងជាស្ត្រីមួយរូប នាងសូមគោរព និងថ្លែងអំណរគុណយ៉ាងជ្រាលជ្រៅបំផុតទៅកាន់ស្ត្រីទាំងអស់នៅទូទាំងពិភពលោក ដែលអ្នកទាំងអស់គ្នាបានប្រឹងប្រែង និងលះបង់ដើរតាមសេចក្តីស្រមៃរបស់ខ្លួនឯង ដោយមិនខ្លាចចំពោះឧបសគ្គ មិនថាជាកម្មករ គ្រូបង្រៀន គ្រូពេទ្យ អាជីវករ ឬជាស្ត្រីធម្មតានោះទេ គឺអ្នកទាំងអស់គ្នាបានខិតខំប្រឹងប្រែងលះបង់ ដើម្បីក្តីស្រមៃរបស់ខ្លួនឯង ។
នាងបញ្ជាក់ថា អ្នកទាំងគ្នាពិតជាគួរអោយគោរព និងអោយតម្លៃ ហើយសូមអោយស្ត្រីគ្រប់រូបទទួលបានសេចក្តីថ្លៃថ្នូរ និងឱកាសស្មើគ្នាលើគ្រប់វិស័យ ។ ស្ត្រីគឺជាកម្លាំង និងក្តីស្រឡាញ់ និងអនាគត រីករាយទិវាសិទ្ធនារីអន្តរជាតិ៨មីនា ។
ជាការកត់សម្គាល់សម្រាប់ទិវាសិទ្ធិនារីអន្តរជាតិ ៨មីនានាពេលនេះ ក្រៅពី ព្រះកាយ ច័ន្ទ គេឃើញមានអ្នកសិល្បះជាច្រើនទៀតក៏បានបញ្ចេញសាររបស់ខ្លួននៅលើបណ្តាញសង្គម ដោយនៅក្នុងនោះពួកគេចាត់ទុកស្ត្រីមិនមែនមានតួនាទីមិនត្រឹមតែជា មាតាឬភរិយា នោះទេ តែស្ត្រីក៏មានភាពចាំបាច់ក្នុងការពន្លឿនកិច្ចអភិវឌ្ឍសេដ្ឋកិច្ច និងសង្គមជាតិ ដោយជាកម្លាំងចលករដែលមិនអាចខ្វះបាន។
ការពង្រឹងសមត្ថភាពនៅតែបន្តជាកិច្ចការអាទិភាព និងចាំបាច់ ដើម្បីឱ្យស្ត្រី និងក្មេងស្រីគ្រប់រូប មានភាពក្លាហាន ក្នុងគ្រប់ទិដ្ឋភាពទាំងក្នុងវិស័យនយោបាយ សេដ្ឋកិច្ច និងសង្គមកិច្ច ៕
ចែករំលែកព័តមាននេះ