ណុប បាយ៉ារិទ្ធ បញ្ជាក់មូលហេតុខកខានមិនបានចេញបទចម្រៀងថ្មី
- ភ្នំពេញ
តារាចម្រៀងលោក ណុប បាយ៉ារិទ្ធ បានចេញមកបញ្ជាក់មូលហេតុដែលនៅពីក្រោយ ដែលនាំអោយលោកខកខានមិនបានចេញបទចម្រៀងថ្មីៗ និងច្រៀងតាមឆាកតន្ត្រីនានានៅមួយរយៈចុងក្រោយនេះ ។ មូលហេតុនោះ ត្រូវបានតារាចម្រៀងរូបនេះបញ្ជាក់ថា ដោយសារលោកមានបញ្ហារលាកបំពង់ក ដែលជាហេតុនាំលោកមិនអាចប្រើប្រាស់សម្លេងបានល្អដូចមុននោះ
ឡើយ ។
យ៉ាងណា រហូតមកទល់នាពេលនេះ ក្រោយការព្យាយាមព្យាបាលនោះ ជំងឺរលាកបំពង់ករបស់លោកបានល្អប្រសើរប្រមាណ៦០ភាគរយហើយ ខណៈពេលដែលលោកនឹងវិលត្រឡប់មកវិញឆាប់ៗនេះ ដើម្បីឆ្លើយតបការចង់បានពីអ្នកគាំទ្រ ។ ក្នុង
សំណេរដែលបង្ហោះតាមបណ្តាញសង្គម តារាចម្រៀងលោក ណុប បាយ៉ារិទ្ធ បានលើកឡើងថា សួស្តីអ្នកគាំទ្រជាទីស្រលាញ់ រយៈពេលយូរគួរសម ដែលខ្ញុំមានភាពស្ងប់ស្ងាត់ជាមួយ និងការចេញបទចម្រៀងថ្មី អរគុណដល់អ្នកទាំងអស់គ្នា ដែលមិនភ្លេចខ្ញុំហើយតែងតែឆាតមកសួរសុខទុក្ខ និងរង់ចាំការវិលត្រឡប់របស់ខ្ញុំជាមួយបទចម្រៀងថ្មីៗ ។
លោកបន្តថា អរគុណដែលមិនដែលបំភ្លេចខ្ញុំ កន្លងមក ក៏មានអ្នកខ្លះក៏បានដឹង ខ្លះមិនបានដឹង ហើយអ្នកដែលបានដឹងគាត់តែងតែបង្ហាញពីការព្រួយបារម្ភពីសុខភាពរបស់ខ្ញុំ សម្លេងរបស់ខ្ញុំ អរគុណណាស់ ហើយពិតណាស់ដូចដែលបងប្អូនបានដឹងថាកន្លងមក ខ្ញុំមានបញ្ហាររលាកបំពង់កខ្លាំងដែលនាំអោយការប្រើប្រាស់សម្លេងច្រៀងមិនបានដូចចិត្ត ហើយពិបាកសូម្បីតែនិយាយ មិនរលូន វាបានកើតឡើងតាំងពីមុនកូវីដទៅទៀត (រហូតមានពេលខ្លះគិតថាខ្លួនឯង និងអាចនិយាយមិនរួចនៅថ្ងៃ១យ៉ាងប្រាកដ)។
លោកបញ្ជាក់ថា ពេលខ្លះ ចិត្តចង់បោះបង់ចោលតែម្តង ព្រោះពេលដែលប្រើសម្លេងមិនបានល្អ ជៀសមិនផុតពីការប្រមាថ មើលងាយ បំបាក់ទឹកចិត្ត តើនៅពីក្រោយអ្វីដែលអ្នកបានឃើញ ខ្ញុំកំពុងជួបបញ្ហារអ្វី? អ្នកដឹងទេ? ពិតជាមិនដឹងទេ! តែក្នុងនោះអ្នកគាំទ្រជាទីស្រលាញ់របស់ខ្ញុំ ក៏មិនដែលទុកខ្ញុំចោលឡើយ ពួកគាត់ដែលតែផ្តល់កម្លាំងចិត្តដល់ខ្ញុំជានិច្ច ។
លោកថា ខ្ញុំត្រូវបោះបង់ចោលការងារជាច្រើន មិនថាការងារច្រៀង សម្តែង ឬ ជាអ្នកប្រម៉ូតផលិតផលនានា មូលហេតុដែលមិនហ៊ានទទួលយក ដោយសារដឹងថាធ្វើទៅមិនល្អ ! ខ្លាចប៉ះពាល់ដល់ម្ចាស់ការងារ ខ្លាចធ្វើការអោយគេមិនបានល្អដូចអ្វីដែលគេចង់បាន ។ តែដោយសារការទទួលយករបស់អ្នកគាំទ្រជាច្រើន ដែលទទួលយកក្នុងភាពខ្ញុំជាខ្ញុំ បានធ្វើអោយខ្ញុំមានការសម្រេចចិត្ត១គឺក្រោកឈរតស៊ូជាមួយស្ថានភាពរបស់ខ្លួនឯង ។
ចុងក្រោយ ខ្ញុំក៏អាចជំនះវាបានម្តងបន្តិចៗរហូតមកដល់ចំនុចមួយដែលល្អប្រសើរជាងមុន បច្ចុប្បន្នខ្ញុំបានធូរស្រាលបាន៦០%ហើយ ។ បើតាមលោក ណុប បាយ៉ារិទ្ធ ពេលវេលាខាងមុខជាពេលវេលាដែលខ្ញុំត្រូវវិលត្រលប់មកវិញទោះមិនល្អសមចិត្តត្រូវការរបស់អ្នកណាម្នាក់១០០%តែខ្ញុំនិងប្រឹងធ្វើវាអោយដល់ទីបំផុត ។
លោកបន្ថែមថាបថ្ងៃនេះគឺជាថ្ងៃថ្មី ការចាប់ផ្តើមថ្មី ជាការតបស្នង ជាការផ្តល់អោយ មនុស្សជាទីស្រលាញ់ដែលជាអ្នកគាំទ្ររបស់ខ្ញុំគ្រប់ៗគ្នា អ្វីដែលអ្នកចង់ឃើញ ចង់បាន អ្នកអាចខមមិនប្រាប់ខ្ញុំបាន មិនថាបទចម្រៀងថ្មី តើចង់ស្តាប់បទប្រភេទណា? ចង់ឃើញខ្ញុំក្នុងការងារថ្មីជាអ្វី? ។ សម្រាប់ខ្ញុំបានត្រៀមខ្លួនរួចជាស្រេច ត្រៀមសម្រាប់អ្នកទាំងអស់គ្នា ត្រៀមរហូតដល់អ្វីដែលអ្នកចង់ឃើញ Raod to the…….very very soon ៕
ចែករំលែកព័តមាននេះ