លោក ហួត ហាក់ រដ្ឋមន្ត្រីក្រសួងទេសចរណ៍បានបង្ហាញនូវបំណងចង់ប្រើប្រាស់បញ្ញាសិប្បនិម្មិតហៅកាត់ថា AI ដើម្បីជួយធ្វើទីផ្សារ និងផ្សព្វផ្សាយពីសក្តានុពលនៃវិស័យទេសចរណ៍នៅកម្ពុជា ទៅកាន់ទីផ្សារក្រៅប្រទេស ។ លោករដ្ឋមន្ត្រីបានបង្ហើបនូវផែនការនេះ…
លោក ហួត ហាក់ រដ្ឋមន្ត្រីក្រសួងទេសចរណ៍បានបង្ហាញនូវបំណងចង់ប្រើប្រាស់បញ្ញាសិប្បនិម្មិតហៅកាត់ថា AI ដើម្បីជួយធ្វើទីផ្សារ និងផ្សព្វផ្សាយពីសក្តានុពលនៃវិស័យទេសចរណ៍នៅកម្ពុជា ទៅកាន់ទីផ្សារក្រៅប្រទេស ។
លោករដ្ឋមន្ត្រីបានបង្ហើបនូវផែនការនេះ នៅក្នុងកិច្ចប្រជុំពិនិត្យវឌ្ឍនភាពការងាររបស់នាយកដ្ឋានសិក្សាទីផ្សារ និងផ្សព្វផ្សាយទេសចរណ៍ក្រៅប្រទេស កាលពីថ្ងៃទី១៩ ខែមករា ឆ្នាំ២០២៦ ។
លោកបានលើកទឹកចិត្តឲ្យអ្នកពាក់ព័ន្ធ ជាពិសេស គឺមន្ត្រីពង្រឹងសមត្ថភាពលើការងារសិក្សាទីផ្សារ ការផ្សព្វផ្សាយ បរវត្តកម្មឌីជីថល និងការប្រើប្រាស់បច្ចេកវិទ្យា AI ដោយធ្វើការវាយតម្លៃលើចំណុចខ្លាំង ចំណុចខ្វះខាត បញ្ហាប្រឈម ដើម្បីកំណត់គោលដៅជំរុញកំណើននៃទេសចរបរទេស ។
លោករដ្ឋមន្ត្រី បានគូសបញ្ជាក់ថា ការងារសិក្សាទីផ្សារ និងផ្សព្វផ្សាយទេសចរណ៍ក្រៅប្រទេសនេះ ជាកិច្ចការងារសំខាន់សម្រាប់ក្រសួងទេសចរណ៍ ដែលត្រូវអនុវត្តឱ្យបានខ្ជាប់ខ្ជួន ។
នៅពេលនេះប្រទេសជាច្រើនបានកំពុងតែប្រើប្រាស់ AI ដើម្បីរួមចំណែកពង្រឹង និងលើកកម្ពស់សេវាកម្មទេសចរណ៍ ដោយសារតែវាអាចជួយផ្នែកជាច្រើនតាំងពីភស្តុភាកម្ម សេវាកម្មបម្រើអតិថិជន ការវិភាគនិងគ្រប់គ្រងទិន្នន័យ ការបកប្រែនិងសម្រួលភាសា បង្កើតមាតិកាផ្សព្វផ្សាយ កម្មវិធីមគ្គុទេសទេសចរណ៍ជាដើម ។
ចែករំលែកព័តមាននេះ