រាជធានីភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈបានបើកឱកាសផ្តល់ការងារជាង៥ពាន់កន្លែង នៅក្នុងពិព័រណ៍ការងាររយៈពេល២ថ្ងៃនៅខេត្តបាត់ដំបង ។ នាថ្ងៃទី០៦ ខែធ្នូ គឺជាថ្ងៃទី០១ នៃពិធីបើកពិព័រណ៍ការងារខេត្តបាត់ដំបង…
រាជធានីភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈបានបើកឱកាសផ្តល់ការងារជាង៥ពាន់កន្លែង នៅក្នុងពិព័រណ៍ការងាររយៈពេល២ថ្ងៃនៅខេត្តបាត់ដំបង ។ នាថ្ងៃទី០៦ ខែធ្នូ គឺជាថ្ងៃទី០១ នៃពិធីបើកពិព័រណ៍ការងារខេត្តបាត់ដំបង ឆ្នាំ២០១៩ ដែលនឹងត្រូវផ្តល់ឱកាសការងារជាច្រើនកន្លែងពីក្រុមហ៊ុនធំៗចំនួន៥០ដល់យុវជន សិស្ស និស្សិត និងអ្នកស្វែងរកការងារធ្វើនៅក្នុងខេត្តបាត់ដំបង ។
ពិព័រណ៍ការងាររយៈពេលពីរថ្ងៃ គឺថ្ងៃទី ០៦ និង០៧ ខែធ្នូ ឆ្នាំ២០១៩ នៅបរិវេណវិទ្យាស្ថានបច្ចេកវិទ្យាបាត់ដំបង តាមបណ្តោយផ្លូវ ជាតិលេខ៥ ភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង ។
លោក គួច សុមាន អនុប្រធានទីភ្នាក់ងារជាតិមុខរបរ និងការងារ (NEA) លើកឡើងថា កន្លងមកពិព័រណ៍ការងារនេះត្រូវបានរៀបចំឡើងចំនួន១៣លើករួចមកហើយដែលកម្រិតថ្នាក់ជាតិធ្វើនៅរាជធានីភ្នំពេញមានចំនួន៩លើក និងថ្នាក់ខេត្តចំនួន៤លើក ។ សម្រាប់ខេត្តបាត់ដំបងពិពរណ៍នេះគឺជាព្រឹត្តិការណ៍ការងារដ៏ធំលើកទី២ ដែលត្រូវបានរៀបចំដើម្បីបង្កើតជាវេទិការជួបជុំគ្នារវាងនិយោជក គ្រឹះស្ថានអប់រំបណ្តុះបណ្តាល អ្នកស្វែងរកការងារ និងសិស្ស-និស្សិត ក្នុងការជំរុញសកម្មភាពទីផ្សារការងារ ដោយទទួលបានការចូលរួមតាំងផ្សព្វផ្សាយពីសំណាក់ក្រុមហ៊ុនសហគ្រាស គ្រឹះស្ថាន ក្រសួង-ស្ថាប័នរដ្ឋ និងអង្គការជាតិ-អន្តរជាតិ ចំនួន៥០ស្ថាប័នដែលនាំមកនូវឱកាសការងារតាមវិស័យនានាជាច្រើនកន្លែង ហើយអ្នកចូលរួមដែលរំពឹងទុកប្រមាណជា៥ពាន់នាក់ និងទទួលបានឱកាសក្នុងការជួប និងដាក់ពាក្យសម្ភាសន៍រកការងារដោយផ្ទាល់ជាមួយនិយោជកព្រមទាំងការបង្កើតបណ្តាញទំនាក់ទំនងផ្នែកធនធានមនុស្ស ក្នុងចំណោមភាគីពាក់ព័ន្ធ ។
លោកបន្តថា ក្នុងឱកាសនោះក៏នឹងមានការរៀចចំស្របគ្នាផងដែរនូវសិក្ខាសាលាណែនាំអាជី ពការងារ និងវិជ្ជាជីវៈដែលជាវេទិការចែករំលែកចំណេះដឹងបទពិសោធន៍ព័ត៌មានទីផ្សារការងារ មតិយោបល់ និងការអនុវត្តល្អនានាដែលមានសារសំខាន់សម្រាប់ការរៀបចំផែនការអាជីពព្រមទាំងការតម្រង់ទិសសម្រាប់ការសិក្សា និងចូលទីផ្សារការងារពីសំណាក់វាគ្មិនជាតិ និងអន្តរជាតិដែលមានបទពិសោធន៍ និងជំនាញ ។
លោក គួច សុមាន បានបញ្ជាក់បន្ថែមទៀតថា ការរៀបចំពិព័រណ៍ការងារខេត្តបាត់ដំបងនាថ្ងៃនេះ គឺជាការចូលរួមចំណែកយ៉ាងសកម្មពីសំណាក់ភាគីពាក់ព័ន្ធទាំងអស់ ជាពិសេសរដ្ឋបាលខេត្តបាត់ដំបងក្នុងការលើកកម្ពស់ និងជំរុញទីផ្សារការងារក្នុងខេត្តរបស់ខ្លួនឱ្យកាន់តែមានភាពសម្បូរបែបសម្រាប់យុវជន និងអ្នកស្វែងរកការងារក៏ដូចជា និយោជកអាចផ្សព្វផ្សាយដំណឹងជ្រើសរើសបុគ្គលិកបានយ៉ាងទូលំទូលាយ ។
សូមជម្រាបថា ពិព័រណ៍ការងារនេះត្រូវបានរៀបចំឡើងក្រោមកិច្ចសហការពីសាលាខេត្តបាត់ដំបង សហភាពសហព័ន្ធយុវជនកម្ពុជា (ស.ស.យ.ក) ខេត្តបាត់ដំបងដោយទទួលបានការឧបត្ថម្ភគាំទ្រពីអង្គការ Finn Church Aid (FCA) និងវិទ្យាស្ថានបច្ចេកវិទ្យាបាត់ដំបង ៕ កែសម្រួលដោយ ៖ សុឃាក់
ចែករំលែកព័តមាននេះ