រាជធានីភ្នំពេញ ៖ ការប្រើប្រាស់ប្រព័ន្ធធនាគារឌីជីថលនៅកម្ពុជា នាពេលបច្ចុប្បន្ននេះកាន់តែមានកំណើនច្រើនឡើង ស្របតាមការយល់ដឹងរបស់ប្រជាពលរដ្ឋកម្ពុជាដែលជាអតិថិជនរបស់ធនាគារ ខណៈការប្រើប្រាស់ប្រព័ន្ធធនាគារនេះ វាបានជួយសម្រួលដល់អ្នកប្រើប្រាស់កាន់តែងាយស្រួលផងដែរ ។
ក្នុងកិច្ចសម្ភាសន៍មួយជាមួយលោក នាង សុផាន់ណា នាយកជាន់ខ្ពស់នៃធនាគារអេស៊ីលីដា ភីអិលស៊ី សាខាជ្រោយចង្វារ បានមានប្រសាសន៍អោយដឹងថា និន្នាការនៃការប្រើប្រាស់ប្រព័ន្ធឌីជីថល ក្នុងវិស័យធនាគារមានកំណើនគួរអោយកត់សម្គាល់ ។ កាលពី៥ឆ្នាំមុន បណ្ដាធនាគារមួយចំនួន រួមទាំងធនាគារអេស៊ីលីដា ទើបតែរៀបចំនូវប្រព័ន្ធនេះទេ តែ៥ឆ្នាំក្រោយ ពោលនៅពេលបច្ចុប្បន្ននេះ ប្រព័ន្ធធនាគារឌីជីថល បានដាក់អោយដំណើរការជាផ្លូវការ និងមានការគាំទ្រពីប្រជាពលដ្ឋកម្ពុជាជាច្រើន ដោយសារតែវាមានភាពងាយស្រួល និងសុវត្ថិភាពខ្ពស់ បើធៀបនឹងប្រព័ន្ធធនាគារប្រពៃណី ។
លោកបន្តថា សម្រាប់ធនាគារ អេស៊ីលីដា ភីអិលស៊ី មានផែនការអភិវឌ្ឍន៍ធនាគារឌីជីថលនេះ អោយឈានមុខគេនៅកម្ពុជា ដោយធនាគារបាននិងកំពុងអភិវឌ្ឍន៍នូវប្រព័ន្ធមួយឈ្មោះថា អេស៊ីលីដា យូនីធី ទាន់ចិត្ត ដែលប្រព័ន្ធនេះ ជាប្រព័ន្ធធនាគារឌីជីថលថ្មីនៅកម្ពុជា អាចវេរ និងទូទាត់ចាយវាយបាននៅគ្រប់ទីកន្លែងដោយមិនចាំបាច់មានក្រដាសប្រាក់ក្នុងដៃឡើយ ។
លោកថា៖ «ចាប់តាំងពីធនាគារអេស៊ីលីដា បានដាក់អោយដំណើរការនូវប្រព័ន្ធអេស៊ីលីដាយូនីធីទាន់ចិត្ត ឃើញថា មានកំណើនអ្នកប្រើប្រាស់ច្រើន ជាក់ស្ដែងក្នុងរយៈពេល៩ខែប៉ុណ្ណោះ ក្នុងឆ្នាំ២០១៩នេះ ចំនួនប្រតិបត្តិការតាមប្រព័ន្ធអេស៊ីលីដាយូនីធី ទាន់ចិត្ត មានដល់ជាង ២០លានប្រតិបត្តិការ ហើយបើគិតជាទឹកប្រាក់វិញ មានរហូតដល់ ៥៧០០លានដុល្លារអាមេរិក » ។
លោកបន្ថែមថា បើយើងស្រម៉ៃមើលថា ក្នុងករណីគ្មានប្រព័ន្ធធនាគារឌីជីថលទេនោះ ហើយយើងធ្វើប្រតិបត្តិការដោយផ្ទាល់ជាមួយភ្នាក់ងារធនាគារ តើអតិថិជនត្រូវចំណាយអ្វីខ្លះ ដើម្បីធ្វើប្រតិបត្តិការទាំង២០លានប្រតិបត្តិការ និងទឹកប្រាក់ជាង ៥៧០០លានដុល្លារអាមេរិកនេះ ។ ពិតណាស់អតិថិជនត្រូវចំណាយពេលធ្វើដំណើរដើម្បីទៅធ្វើប្រតិបត្តិការដោយផ្ទាល់ ហើយត្រូវចំណាយថ្លៃធ្វើដំណើរដែលអាចនាំអោយខាតពេលវេលាធ្វើការងារ ឬប្រកបអាជីវកម្មផ្សេងៗទៀត ។
លោកបានបន្តទៀតថា ជាមួយនឹងការវេរ និងទូទាត់ប្រាក់តាមប្រព័ន្ធអេស៊ីលីដាយូនីធីទាន់ចិត្តនេះ ជួយសម្រួលច្រើនដល់អតិថិជន ហើយអតិថិជនក៏ទទួលបាននូវផលចំណេញច្រើនដូចជា មិនអស់ថ្លៃសេវា ហើយសម្រាប់ការទូទាត់តាមការស្កេនជាមួយ QR Code ACLEDA TaonChet វិញ គឺទទួលបានការបញ្ចុះតម្លៃពី ២០-៥០% តាមហាងទំនិញរាប់ពាន់កន្លែងដែលជាដៃគូរបស់ធនាគរ អេស៊ីលីដា ។ ហើយទូរស័ព្ទដៃរបស់យើងប្រៀបបាននឹងកាបូបលុយ និងមានសុវត្ថិភាពបំផុត ។
គួររំលឹកថា កាលពីកន្លងទៅនេះកម្ពុជា ក៏បានរៀបចំនូវវេទិកា Fintech Day ដែលព្រឹត្តិការណ៍នេះនឹងជំរុញអោយមានការអភិវឌ្ឍប្រព័ន្ធបច្ចេកវិទ្យាធនាគារ នៅកម្ពុជាបានមួយកម្រិតទៀត ខណៈប្រទេសក្នុងតំបន់អាស៊ាន បាននិងកំពុងជំរុញការអភិវឌ្ឍប្រព័ន្ធនេះកាន់តែខ្លាំងផងដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ