រាជធានីភ្នំពេញ ៖ ធនាគារព្រីនស៍បានចូលរួមជាមួយធនាគារពាណិជ្ជ និងគ្រឹះស្ថានហិរញ្ញវត្ថុទទួលប្រាក់បញ្ញើ(MDIs)ដទៃទៀត ក្នុងការផ្តល់ជូននូវ«សេវាទូទាត់រហ័ស» ដែលត្រូវបង្កើតដោយ ធនាគារជាតិនៃកម្ពុជា។ សេវាទូទាត់រហ័សគឺជាប្រព័ន្ធទូទាត់ដែលអនុញ្ញាតឱ្យអតិថិជនរបស់ធនាគារព្រីនស៍ អាចធ្វើការផ្ទេរប្រាក់ទៅកាន់គ្រឹះស្ថានហិរញ្ញវត្ថុជាសមាជិកទាំងអស់យ៉ាងរហ័ស និងមានសុវត្ថិភាព ។
ប្រតិបត្តិការផ្ទេរប្រាក់ត្រូវបានអនុវត្តតាមពេលវេលាជាក់ស្តែងហើយអាចទទួលបានទឹកប្រាក់ភ្លាមៗ ។ សេវាទូទាត់រហ័សជម្រុញឱ្យមានកិច្ចសហប្រតិបត្តិការអន្តរធនាគារ ដែលសម្រួលដល់ការផ្ទេរប្រាក់រៀលនៅទូទាំងប្រទេស ។ លើសពីនេះទៅទៀត អតិថិជនអាចទទួលបានអត្ថប្រយោជន៍ជាច្រើនពីការផ្ទេរប្រាក់អតិបរមា ខ្ពស់រហូតដល់ ៤០លានរៀល ស្របពេលដែលកម្រៃនៃសេវាផ្ទេរប្រាក់មានតម្លៃទាបចាប់ពី ៤០០០រៀលឡើងទៅ ។
សេវាទូទាត់រហ័ស ពិតជាផ្តល់ភាពងាយស្រួលសម្រាប់អតិថិជនក្នុងការទទួលបានទឹកប្រាក់ភ្លាមៗ ពីការផ្ទេរប្រាក់ឆ្លង គ្រឹះស្ថានហិរញ្ញវត្ថុជាសមាជិក ។ ជាលទ្ធផល សេវានេះអាចជួយឱ្យអតិថិជន ទទួលបានការយល់ដឹងបន្ថែមពីប្រព័ន្ធទូទាត់តាមអេឡិចត្រូនិច និងលើកទឹកចិត្តអោយពួកគាត់ឆ្ពោះទៅរកសេវាទូទាត់ដោយមិនប្រើសាច់ប្រាក់សុទ្ធ នាពេលអនាគត ។ ក្នុងដំណាក់កាលនេះផងដែរ ធនាគារក៏អាចទទួលបាននូវអត្ថប្រយោជន៍ជាច្រើនពីការកាត់បន្ថយពេលវេលាដែលបានចំណាយលើប្រតិបត្តិការដោះស្រាយសាច់ប្រាក់។
ការផ្លាស់ប្តូរឆ្ពោះទៅរកវិស័យឌីជីថលនេះ គឺស្របទៅតាមចក្ខុវិស័យរយៈពេលវែងរបស់ធនាគារ ព្រីនស៍ ក្នុងការក្លាយខ្លួនជាធនាគារឌីជីថលឈានមុខគេមួយ។ ដើម្បីអបអរសាទរការដាក់ឱ្យប្រើប្រាស់ “សេវាទូទាត់រហ័ស” និងដើម្បីលើកកម្ពស់ការធ្វើប្រតិបត្តិការផ្ទេរប្រាក់ជាប្រាក់រៀលនៅគ្រប់សាខាទាំងអស់របស់ ធនាគារ ព្រីនស៍ កម្រៃសេវានៃការផ្ទេរប្រាក់មិនត្រូវបានគិតថ្លៃនោះទេ។ អតិថិជនអាចទទួលបានអត្ថប្រយោជន៍នេះចាប់ពីថ្ងៃនេះរហូតដល់ថ្ងៃទី៣០ ខែមិថុនា ឆ្នាំ២០២០ ។
ចែករំលែកព័តមាននេះ