ខេត្តកំពង់ស្ពឺ ៖ សេចក្តីរាយការណ៍ឱ្យដឹងថា មានរឿងរ៉ាវដែលនឹកស្មានមិនដល់មួយបានកើតឡើង ព្រោះបុរសចំណាស់ម្នាក់ត្រូវគោមេមួយក្បាល ដេញជល់ហើយជាន់រហូតដល់បាត់បង់ជីវិតគាត់ ។ បន្ទាប់ពីកើតហេតុ អ្នកភូមិបាននាំគ្នានិយាយថា ទំនងជាមេគោនេះស្មានថាបុរសរងគ្រោះដើរទៅធ្វើបាបកូនរបស់ខ្លួន ទើបជល់ហើយជាន់រហូតដល់បាត់បង់ជីវិតបែបនេះ ។ ដូច្នេះ សូមការពារសុវត្ថិភាពរបស់ខ្លួន ចៀសវាងកុំឱ្យកើតមានគ្រោះថ្នាក់នេះដោយយថាហេតុ ។
ករណីនេះ កើតឡើងកាលពីរសៀលថ្ងៃទី០២ ធ្នូ ស្ថិតក្នុងភូមិដំបងវិញ ឃុំសង្កែសាទប ស្រុកឪរ៉ាល់ខេត្ត កំពង់ស្ពឺ។ ជនរងគ្រោះឈ្មោះម៉ៅ ហេង ភេទប្រុស អាយុ៦១ឆ្នាំ រស់នៅភូមិឃុំកេីតហេតុខាងលេី ។ តាម ប្រភពពីសមត្ថកិច្ចស្រង់សំដីក្រុមគ្រួសារថា នៅមុនពេលកើតហេតុ ជនរងគ្រោះបានកាន់ធុងប៉េត្រូទៅរកប៉ាចត្រីនៅខាងក្រោយផ្ទះរបស់អ្នកភូមិមួយរូប(ឈ្មោះជួន នាង) លុះពេលដេីរដល់ចំណុចកេីតហេតុក៏មានគោញីកូនតូចមួយ ដែលម្ចាស់វាចងនៅក្នុងស្រែក៏បានស្ទុះមកជល់និងជាន់ទៅលេីជនរងគ្រោះបណ្ដាលឲរងរបួសយ៉ាងធ្ងន់។
ប្រភពបន្តថាក្រោយកើតហេតុ ក្រុមគ្រួសានិងអ្នកភូមិបានដឹកជនរងគ្រោះទៅកាន់មន្ទីរពេទ្យ តែជាអកុសលជនរងគ្រោះបានស្លាប់បន្ទាប់ពីលេីកដាក់លើគោយន្ដរួចមក។ ដោយឡែកអ្នកភូមិបាននិយាយថា ប្រហែលជាមេគោនេះស្មានថា បុរសរងគ្រោះចង់ធ្វើបាបកូនរបស់ខ្លួន ហើយមើលទៅទើបស្ទះុទៅជល់ហើយជាន់រហូតដល់បាត់បង់ជីវិតបែបនេះ ។ ក្រោយកើតហេតុ សមត្ថកិច្ចជំនាញនិងនគរបាលប៉ុស្តិ៍សង្កែសាទបបានអនុវត្តត្រួតពិនិត្យតាមនិតិវិធី និងបានប្រគល់សពអោយក្រុមគ្រួសារទទួលរៀបចំធ្វើបុណ្យតាមប្រពៃណី ។
ចែករំលែកព័តមាននេះ