ខេត្តបន្ទាយមានជ័យ ៖ រដ្ឋបាលសាលាក្រុងសិរីសោភ័ណនឹងចាប់ផាកពិន័យដល់អ្នកដែលចោលសំរាមគ្មានសណ្តាប់ធ្នាប់ចាប់ពីឆ្នាំ២០២០តទៅ ។ លោកអភិបាលក្រុងសិរីសោភ័ណបានលើកឡើងបែបនេះក្នុងកិច្ចប្រជុំពង្រឹងការងារសណ្តាប់ធ្នាប់និងបរិស្ថានកាលពីថ្ងៃទី២៨ ខែវិច្ឆិកា ឆ្នាំ២០១៩ នៅសាលាក្រុងសិរីសោភ័ណ។ លោក ហ៊ឹល…
ខេត្តបន្ទាយមានជ័យ ៖ រដ្ឋបាលសាលាក្រុងសិរីសោភ័ណនឹងចាប់ផាកពិន័យដល់អ្នកដែលចោលសំរាមគ្មានសណ្តាប់ធ្នាប់ចាប់ពីឆ្នាំ២០២០តទៅ ។ លោកអភិបាលក្រុងសិរីសោភ័ណបានលើកឡើងបែបនេះក្នុងកិច្ចប្រជុំពង្រឹងការងារសណ្តាប់ធ្នាប់និងបរិស្ថានកាលពីថ្ងៃទី២៨ ខែវិច្ឆិកា ឆ្នាំ២០១៩ នៅសាលាក្រុងសិរីសោភ័ណ។
លោក ហ៊ឹល រ៉ាយ៉ា អភិបាលក្រុងសិរីសោភ័ណបានលើកឡើងកិច្ចប្រជុំពង្រឹងការងារសណ្តាប់ធ្នាប់ និងបរិស្ថានក្រុងសិរីសោភ័ណអោយមានសោភ័ណភាពចូលរួមប្រឡងប្រណាំងទីក្រុងស្អាតឆ្នាំ២០២០ ដើម្បីឱ្យក្រុងសិរីសោភ័ណក្លាយទីក្រុងស្អាតមានសោភ័ណទាក់ទាញដល់ភ្ញៀវជាតិ និងអន្តរជាតិ ។
លោកអភិបាលក្រុងបានលើកឡើងថា រយៈពេលកន្លងមក បញ្ហាសំរាមនៅក្រុងសិរីសោភ័ណ ជាពិសេសក្រុមហ៊ុនអនាម័យដូចមានការយឺតយ៉ាវក្នុងការដើរយកសំរាមនៅតាមផ្សារនិងផ្ទះល្វែង ហើយមានប្រជាពលរដ្ឋមួយចំនួនតូចដែលយកសំរាមទៅបោះចោលតាមចិញ្ចើមផ្លូវ និងតាមព្រៃ បណ្តាលអោយប៉ះពាល់ដល់សណ្តាប់ធ្នាប់និងបរិស្ថានព្រមទាំងសុខភាពប្រជាពលរដ្ឋដែលធ្វើដំណើរឆ្លងកាត់ និងនៅក្បែរ។
លោកអភិបាលក្រុងក៏បានណែនាំដល់បងប្អូនប្រជាពលរដ្ឋត្រូវចូលរួមសំអាតបរិស្ថានអោយបានល្អ ដើម្បីអោយក្រុងសិរីសោភ័ណក្លាយជាទីក្រុងបៃតង និងចូលរួមប្រឡងប្រណាំងទីក្រុងស្អានៅឆ្នាំ២០២០ខាងមុខនេះ។ លោកអភិបាលក្រុងក៏បានដាក់វិធានការយ៉ាងតឹងរឹងដល់សមត្ថកិច្ច និងអាជ្ញាធរពាក់ព័ន្ធត្រូវណែនាំផ្សព្វផ្សាយដល់ប្រជាពលរដ្ឋទុកដាក់សំរាមអោយមានសណ្តាប់ធ្នាប់ ហើយនៅឆ្នាំ២០២០ខាងមុខនេះដែរ បើមានប្រជាពលរដ្ឋយកសំរាមបោះចោលគ្មានសណ្តាប់ធ្នាប់នោះ មន្ត្រីជំនាញនឹងមានវិធានការចាត់ការតាមច្បាប់ដើម្បីអោយរាងចាល ៕ (កែសម្រួលដោយ ៖ ធីតា)
ចែករំលែកព័តមាននេះ