ខេត្តកំពង់ឆ្នាំង ៖ បើតាមសេចក្តីរាយការណ៍បានឱ្យដឹងថា បុរសម្នាក់បានស្លាប់ និង២នាក់ទៀតរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៌មួយ ខណៈរថយន្តសណ្តោងកន្ទុយដឹកកុងតឺន័របុកជាមួយម៉ូតូជិះគ្នា៣នាក់ក្នុងដំណើរច្រាស់ទិសគ្នា បង្កឱ្យមានការភ្ញាក់ផ្អើលកាលពីម៉ោង១១និង២០នាទីយប់ ថ្ងៃទី១១ ខែវិច្ឆិកា ឆ្នាំ២០១៩…
ខេត្តកំពង់ឆ្នាំង ៖ បើតាមសេចក្តីរាយការណ៍បានឱ្យដឹងថា បុរសម្នាក់បានស្លាប់ និង២នាក់ទៀតរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៌មួយ ខណៈរថយន្តសណ្តោងកន្ទុយដឹកកុងតឺន័របុកជាមួយម៉ូតូជិះគ្នា៣នាក់ក្នុងដំណើរច្រាស់ទិសគ្នា បង្កឱ្យមានការភ្ញាក់ផ្អើលកាលពីម៉ោង១១និង២០នាទីយប់ ថ្ងៃទី១១ ខែវិច្ឆិកា ឆ្នាំ២០១៩ លើកំណាត់ផ្លូវជាតិលេខ៥ ចន្លោះបង្គោលគីឡូម៉ែត្រលេខ ៨៨-៨៩ ស្ថិតក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ។
បើតាមសមត្ថកិច្ចនគរបាល បានឱ្យដឹងថា បុរសរងគ្រោះដែលបានស្លាប់ក្នុងហេតុការណ៍នោះមានឈ្មោះ ប៉ិត សាវិត ភេទប្រុស អាយុ២៣ឆ្នាំ ជាអ្នកបើកម៉ូតូ និងអ្នកជិះពីក្រោយ២នាក់ ម្នាក់ឈ្មោះ ផន ផៃ អាយុ១៩ឆ្នាំ និងម្នាក់ទៀតឈ្មោះ ជៀប មករា អាយុ១៨ឆ្នាំ អ្នកទាំង៣នាក់មានទីលំនៅក្នុងភូមិក្រាំងស្គារ ឃុំក្រាំងស្គារ ស្រុកទឹកផុស ។
ប្រភពដដែលបានបន្តថា មុនពេលកើតហេតុ ជនរងគ្រោះទាំង៣នាក់បានជិះម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខ កំពង់ឆ្នាំង 1F.8448 ក្នុងដំណើរពីត្បូងទៅជើង លុះមកដល់ចំណុចកើតហេតុ បានបុកជាមួយរថយន្តមួយគ្រឿងម៉ាក FUSO ពណ៌ត្រួយចេក ពាក់ស្លាកស្វាយរៀង 3A.1023 ដោយមានសណ្តោងកន្ទុយដឹកកុងតឺន័រ ពាក់ស្លាកលេខ 4A.6271 ក្នុងដំណើរច្រាស់ទិសគ្នា យ៉ាងពេញទំហឹង បណ្តាលឱ្យបុរសជាអ្នកបើកម៉ូតូស្លាប់ភ្លាមៗនៅនឹងកន្លែង ចំណែកអ្នកជិះពីក្រោយ២នាក់បានរងរបួសធ្ងន់ ។ ដោយឡែក អ្នកបើកបររថយន្តបានរត់គេចខ្លួនបាត់ ។
ក្រោយពេលកើតហេតុ ជនរងគ្រោះមានរបួសត្រូវបានសមត្ថកិច្ចបញ្ជូនទៅសង្គ្រោះនៅមន្ទីរពេទ្យបង្អែកខេត្តកំពង់ឆ្នាំង ចំណែកសពជនរងគ្រោះត្រូវក្រុមគ្រួសារយកទៅធ្វើបុណ្យតាមប្រពៃណី ។ ចំណែកមធ្យោបាយទាំង២គ្រឿងត្រូវបានសមត្ថកិច្ចយកទៅរក្សាទុកដើម្បីរង់ចាំការដោះស្រាយតាមនីតិវិធី៕ (កែសម្រួលដោយ ៖ បុប្ផា)
ចែករំលែកព័តមាននេះ