រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា នារីជនជាតិហ្វីលីពីន២នាក់ ត្រូវបានកម្លាំងសណ្តាប់ខណ្ឌជ្រោយចង្វា ឃាត់ខ្លួនបញ្ជូនទៅកាន់ទីបញ្ជាការកំរិតស្រាល ដែលប្រចាំការនៅសាលាបឋមសិក្សាជ្រោយចង្វារ ខណៈពេលនារីទាំង២នាក់នេះដើរចែកស្រោមសំបុត្រ ដើម្បីរកមូលនិធិជួយឧបត្ថម្ភដល់កុមារនៅតាមហាងនានា។
ការនាំខ្លួននារីជនជាតិហ្វីលីពីននេះធ្វើឡើងកាលពីម៉ោង១និង២០នាទីរសៀល ថ្ងៃទី១២ ខែវិឆ្ឆិកា ឆ្នាំ២០១៩ នៅចំហាងលក់ដូរតាមមាត់ទន្លេសាប ក្បែរសណ្ឋាគារសុខា ក្នុងភូមិទី១ សង្កាត់ជ្រោយចង្វា ខណ្ឌជ្រោយចង្វា។

សេចក្តីរាយការណ៍បន្តថា ស្ត្រី១-ឈ្មោះ Manuawan jessagrace អាយុ២៨ឆ្នាំ និង២-ឈ្មោះ Torzar jane អាយុ៣៣ឆ្នាំ ជាជនជាតិហ្វីលីពីន។ អ្នកទាំងពីរនាកស្នាក់នៅសង្កាត់ម្តុំវត្តសន្សំកុសល់ ក្នុងសង្កាត់បឹងទំពុនទី១ ខណ្ឌមានជ័យ។
តាមប្រភពព័ត៌មានឱ្យដឹងថា នៅមុនពេលកើត គេឃើញជនជាតិបរទេសទាំង២នាក់បានដើរចូលនៅតាមហាងលក់ដូរនានានៅក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ដោយបានចែកស្រោមសំបុត្រក្នុងគោលបំណងប្រមូលមូលនិធិជួយឧបត្ថម្ភដល់កុមារ។

ដោយមានការសង្ស័យ កម្លាំងសណ្តាប់ធ្នាប់ខណ្ឌជ្រោយចង្វា ក៏បានរាយការណ៍ហើយទទួលបញ្ជាឱ្យនាំខ្លួនសាកសួរ ហើយបានបញ្ជូនទៅទីបញ្ជាការកំរិតស្រាល A៨ ដែលស្ថិតក្នុងសាលាបឋមសិក្សាជ្រោយចង្វារ ដើម្បីឱ្យនគរបាលការិយាល័យគ្រប់គ្រងជនបរទេសត្រួតពិនិត្យ និងសាកសួររកលិខិតស្នាម។

តាមការសាកសួរជនជាតិបរទសរូបនោះបានឱ្យដឹងថា ខ្លួនជាបង្វៀនភាសាអង់គ្លេសនៅសាលាឯកជនមួយ។ នៅពេលទំនេរក៏ស្ម័គ្រចិត្តដើរប្រមូលនិធិជួយឧបត្ថម្ភដល់កុមារនៅទ្វិបអាស៊ី នៅក្លឹបយុវជនជោគជ័យ។ បន្ទាប់ពីឃាត់ខ្លួន និងត្រួតពិនិត្យមានឯកសារត្រឹមត្រូវ តំណាងសាលាក៏បានមកធានា ហើយក៏ដោះលែងឱ្យត្រឡប់ទៅវិញ៕ (កែសម្រួលដោយ ៖ បុប្ផា)



ចែករំលែកព័តមាននេះ