រាជធានីភ្នំពេញ ៖ បុរសម្នាក់ចេញពីកម្មវិធីជួបជុំបងប្អូនមិត្តភក្ដិផឹកស្រាស្រវឹងបើករថយន្តត្រលប់ទៅផ្ទះវិញនៅម្តុំផ្សារអូឡាំពិកធ្វើដំណើរដល់ពាក់កណ្តាលផ្លូវក៏គេចម៉ូតូមួយគ្រឿងដែលវ៉ាពីមុខរថយន្តរ៉េចង្កូតទៅបុកនឹងបង្គោលភ្លើងថ្មបំភ្លឺផ្លូវបណ្ដាលឲ្យបាក់រលំអស់មួយដើមរងការខូចខាត ចំណែករថយន្តបង្កខូចខាតខ្ទេចមួយកំណាត់មុខចំហៀងខាងឆ្វេង។ ហេតុការណ៍នេះដែរបានកើតឡើងកាលពីវេលាម៉ោង11និង15នាទីយប់ ថ្ងៃទី6 ខែវិច្ឆិកា នៅតាមបណ្តោយផ្លូវ271 ខាងជើងស្ពានអាកាសស្ទឹងមានជ័យ100ម៉ែត្រ ស្ថិតនៅក្នុងសង្កាត់ស្ទឹងមានជ័យ1 ខណ្ឌមានជ័យ ។
គ្រោះថ្នាក់នេះបង្កឡើងដោយរថយន្តមួយគ្រឿងម៉ាក lexus RX-300 ពណ៌ខ្មៅ ពាក់ផ្លាកលេខ ភ្នំពេញ 2K-8865 បើកបរដោយបុរសម្នាក់មិនស្គាល់អត្តសញ្ញាណ ។
ប្រភពព័ត៌មានពីអ្នកស្គាល់ម្ចាស់រថយន្តបានបង្ហើបប្រាប់ឲ្យដឹងថា មុនកើតហេតុគឺតៃកុងរថយន្តបង្កទើបនឹងចេញពីហូបស្រាជុំមិត្តភក្ដិបងប្អូនតែគាត់មិនបានបញ្ជាក់ប្រាប់ថា ហូបនៅកន្លែងណាទេ ។ លុះស្រវឹងតៃកុងរថយន្តបង្កក៏បានលាមិត្តភក្តិបងប្អូនត្រលប់ទៅផ្ទះមុននៅម្តុំផ្សារអូឡាំពិកដោយធ្វើដំណើរតាមបណ្តោយផ្លូវ271ទិសដៅពីត្បូងទៅជើងល្បឿនលឿន មកដល់កន្លែងកើតហេតុក៏ជួបគ្នាជាមួយម៉ូតូមួយគ្រឿងមិនចាំម៉ាកវ៉ារថយន្តគាត់ ហើយក៏ងាកចង្កូតគេចមកខាងស្តាំក៏ជ្រុលទៅបុកនឹងបង្គោលភ្លើងថ្មបំភ្លឺផ្លូវពេញទំហឹងបណ្តាលអោយខូចខាតបាក់ដួលរលំអស់មួយដើម ។
ចំណែករថយន្តបង្កខូចខាតខ្ទេចមួយកំណាត់មុខចំហៀងខាងស្តាំហូរប្រេងម៉ាស៊ីនពេញផ្លូវតែសំណាងក្នុងហេតុការណ៍នេះដែរមិនបានបណ្ដាលឲ្យនរណាម្នាក់រងរបួសឡើយរួមទាំងតៃកុងរថយន្តបង្កផងដែរ ។
បន្ទាប់ពីបង្កហេតុតៃកុងរថយន្តបង្កបានគេចចេញពីកន្លែងកើតហេតុបាត់ស្រមោលបន្សល់ទុកតែរថយន្តបង្កអោយសមត្ថកិច្ចជំនាញធ្វើការវាស់វែងយកទៅរក្សាទុកនៅការិយាល័យនរគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរងចាំដោះស្រាយគ្នានៅពេលក្រោយជាមួយម្ចាស់រថយន្ត ៕
កែសម្រួលដោយ ៖ សំណាង
ចែករំលែកព័តមាននេះ