ADផ្ទាំងផ្សព្វផ្សាយពាណិជ្ជកម្ម

ផ្អើលឆោឡោអស់ខ្ទង់ម៉ឺនដុល្លារ ក្រោយពេលម្ចាស់ចុះមកមើលហាង

4 ឆ្នាំ មុន

កណ្តាល
០៣ ខែ វិច្ឆិកា ឆ្នាំ ២០១៩ ម៉ោង ១១:០៣

ខេត្តកណ្តាល ៖ បើតាមសេចក្តីរាយការណ៍បឋមបានឱ្យដឹងថា ករណីក្រុមចោរជនជាតិចិនយកកាំបិតភ្ជង់ប្លន់ពីម្ចាស់ហាងក្នុងផ្សារទំនើបសាធារណៈនៅស្រុកកោះធំ រយៈពេល១ខែហើយមិនទាន់ចាប់បានផង ស្រាប់តែមានករណីក្រុមចោរចូលគាស់ទូដែកក្នុងផ្សារស៊ីងឡុង យកលុយអស់ខ្ទង់ម៉ឺនដុល្លារ និងទ្រព្យសម្បត្តិមួយចំនួនទៀត រួចរត់គេចខ្លួនបាត់ដោយសុវត្ថិភាព បង្កឱ្យមានការភ្ញាក់ផ្អើលកាលពីម៉ោង១២ថ្ងៃត្រង់…

សេចក្តីរាយការណ៍បន្តថា ជនរងគ្រោះខាងលើឈ្មោះ អ៊ូ លីនស៊ីវ ភេទស្រី អាយុ៣៥ឆ្នាំ ជាជនជាតិចិន ស្នាក់នៅភូមិជ្រៃធំ ឃុំសំពៅពូន ស្រុកកោះធំ ខេត្តកណ្ដាល មុខរបរលក់ដូរក្នុងហាងលក់ទំនិញគ្រប់មុខយីហោ «ផ្សារទំនើបស៊ីងឡុង» ចំណែកជនសង្ស័យមិនស្គាល់អត្តសញ្ញាណនោះទេ បានរត់គេចខ្លួនបាត់។

បើតាមរបាយការណ៍របស់ស្នងការដ្ឋាននគរបាលខេត្តកណ្តាល បានឱ្យដឹងថា ជនរងគ្រោះ បានមកបើកហាងលក់ដូរទំនិញគ្រប់មុខដែលមានយីហោ «ផ្សារទំនើបស៊ីងឡុង» ស្ថិតក្នុងភូមិ-ឃុំកើតហេតុនេះរយៈពេលជាងមួយឆ្នាំមកហើយ ពុំដែលបាត់បង់អ្វីនោះឡើយ ។ លុះនៅថ្ងៃទី៣១ តុលានោះ ជនរងគ្រោះ និងក្រុមគ្រួសារបាននៅលក់ដូរធម្មតា រហូតដល់ម៉ោង១អធ្រាត្រឈានចូលថ្ងៃទី០១ ខែវិច្ឆិកា ជនរងគ្រោះបានបិទហាងដោយចាក់សោត្រឹមត្រូវ រួចនាំគ្នាទៅសម្រាកនៅបន្ទប់ជាន់ទី២

ប្រភពដដែលបន្តថា លុះដល់វេលាម៉ោង១២និង០០នាទីថ្ងៃត្រង់ខែឆ្នាំដដែល ប្ដីរបស់ជនរងគ្រោះបានចុះមកមើលហាង ស្រាប់តែបាត់មិនឃើញសោរដែលកិបទ្វារពីក្រៅនោះទេ តែទ្វារនៅបិទ ពេលនោះក៏នាំគ្នារុញទ្វារចូលទៅមើលក្នុងហាង ស្រាប់តែបាត់ទូដែក ដែលដាក់នៅហាងនោះតែម្ដង រួមទាំងសម្ភារៈមួយចំនួនដូចជា ទូដែកដែលមានប្រាក់រៀលប្រមាណ ៤០០.០០០រៀល, ប្រាក់ដុល្លារប្រមាណជាង ១០.០០០ ដុល្លារអាមេរិក, ខ្សែ.កប្លាទីន១ខ្សែ និងខ្សែដៃប្លាទីន១ខ្សែ ព្រមទាំងលិខិតឆ្លងដែន(ប៉ាស្ព័រ) ២ក្បាល និងកាតធនាគារ មួយចំនួន និងអត្តសញ្ញាណប័ណ្ណជនជាតិចិន១សន្លឹកផងដែរ។ លុះនៅម៉ោង៤ល្ងាច ទើបរាយការណ៍មកកាន់សមត្ថកិច្ច នគរបាលប៉ុស្ដិ៍សំពៅពូន ។

បច្ចុប្បន្នសមត្ថកិច្ចជំនាញ និងប៉ុស្ដិ៍ បានកំពុងធ្វើការស៊ើបអង្កេត និងស្រាវជ្រាវ ដើម្បីកំណត់មុខសញ្ញាតាមចាប់ជនសង្ស័យយកមកចាត់ការតាមនីតិវិធីហើយ។ (កែសម្រួលដោយ ៖ បុប្ផា)